BILANGAN 15
15
Nakanenetek la'eneu tutunu-hohotuk
1 Manetualain fe Musa 2nakanenetek ia-la, fo leoina Israel manaleo nai nusak fo, neukose Manetualain fen neu sila, muse ala tao tungan. 3Soaneu tutunu-hohotu nanatunuk, do tutunu-hohotuk fo bae nasar, do tutunu-hohotuk no dale hihii-nanau mesan-na, do tutunu-hohotuk nai feta-feta biasa soona, emi bole tunu-hotu fe Manetualain: sapi mane, bi'ilopo mane, bi'ilopo do bi'ihiik. Tutunu-hohotuk sila boon-na, neukose nandaa no Manetualain dalen-na. 4-5Ba'eneu see, fo ana tunu-hotu bi'ilopo do bi'ihiik, soaneu tutunu-hohotu nanatunuk neu MANETUALAIN soona, muse nenin no ha'desopuk nana sese'dok mina setun kilo esa no bana sila-la esa, soaneu tutunu-hohotu nana'ak-ka, ma angol oek litel esa boe. 6Metema nanatunu-hotuk ndia, bi'ilopo mane esa soona, muse tunu-hotun no ha'desopu kilo dua nanasese'dok no mina setun litel esa seselik boe, soaneu tutunu-hohotu nana'ak-ka, 7ma oe angol litel esa seselik. Tutunu-hohotuk sila-la, boon-na nandaa no Manetualain dalen-na. 8Metema nanatunu-hotuk ndia, sapi mane esa, soaneu tutunu-hohotu nanatunuk, do tutunu-hohotu bae nasar, do tutunu-hohotu mole-dame soona, 9muse tunu-hotu ha'desopuk kilo telu, nanasese'dok no mina setun litel dua boe, soaneu tutunu-hohotu nana'ak, 10ma angol oek litel dua. Tutunu-hohotuk sila boon-na, nandaa no Manetualain dalen-na.
11Ndia nde, muse nanatunu-hotuk sama-sama no sapi mane esa, bi'ilopo mane esa, ma bi'ilopo do bi'ihiik. 12Metema nanatunu-hotuk ndia, lena neme bana esa mai, soona tunu-hotu ha'desopuk, mina ma angol oek ndia boeo, muse nana popo-tamak tunga esa-esak uuku-dodon. 13Lelek hataholi Israel esa, ana tunu-hotu tutunu-hohotuk soona, muse ana tao tunga dede'ak ndia. Tutunu-hohotuk sila boon-na, nandaa no Manetualain dalen-na. 14Hataholi nusa dea esa, ana leo nai emi nusam dale, nau ana leo ka'da faik de'ubee dalen-na, do ana leo nahele boe, metema ana tunu-hotu nana'ak, fo boon-na nandaa no Manetualain dalen-na soona, ana muse tao tunga basa nakanenetek sila-la. 15-16#Im. 24:22 Basa hoholo-lalanek ma nakanenetek-kala nde been-na, sama soaneu emi ma hataholi nusa dea, fo manaleo nai emi nusam dale-a, nana emi ma sila nde been-na sama, nai Manetualain mata memeten-na. De dede'ak ndia, nanapakek losa dodoon-na.
17 Manetualain fe Musa 18nakanenetek ia-la, fo leoina Israel fo, manaleo nai nusak fo neukose Manetualain fen neu sila, muse ala tao tungan. 19Metema emi mulai mi'a nusak ndia buna-boan soona, emi muse ho'i-ma baba'ek esa fo pe'da fe'en, fo da'di tunu-hotu hehelik soaneu Manetualain. 20Metema emi tunu loti, neme gandum nanake'di makasososak-ka mai soona, muse tunu-hotu fe Manetualain loti ndia, fo ana da'di tutunu-hohotu hehelik soaneun. Tutunu-hohotun sama no emi tunu-hotu gandum fo nanapo'de makasososak-ka. 21Loti fo, emi taon neme gandum nanake'di makasososak ndia, muse emi fen da'di leo tunu-hotu hehelik neu Manetualain losa dodo-na.
22-24Metema emi ta mame'da fa, te emi la'olena nakanenetek esa, neme Manetualain fe basa Musa nakanenetek-kala mai soona, mulai neme faik fo Manetualain fe nakanenetek ndia, losa bobongik leo bobongik neu, ma emi tao salak ndia, nanahu emi ta bubuluk nakanenetek-ka fa, soona emi basa-basamala, muse tunu-hotu sapi mane esa, soaneu tutunu-hohotu nanatunuk. Emi muse tunu-hotu tutunu-hohotu nana'ak ma oe angol, sama-sama no sapi mane ndia, sama leo nakeketuk-ka. Tutunu-hohotuk ndia boon-na, nandaa no Manetualain dalen-na. Fe'ek neme ndia mai, emi muse tunu-hotu bi'ilopo mane esa, soaneu tutunu-hohotu sala-singok hapu do'o do ampon. 25Boema imam-ma muse tao feta sala-singok hapu do'o do ampon soaneu hataholi Israel-la. Soona neukose, ala hapu do'o do ampon, hu kande ta lame'da fa te, ala tao salak so, ma hu kande leni basa tutunu-hohotu sala-singok hapu do'o do ampon, boema tutunu-hohotu nanatunuk neu Manetualain so. 26Basa hataholi Israel-la lala'en-na, ma hataholi nusa dea fo ala leo nai sila nusan dale, neukose hapu do'o do ampon nanahu basa-basan taonou nai salak fo, ta lame'da fa te, ala taon so.
27 #
Im. 4:27-31
Metema ka'da hataholi esa, ta name'da fa te, ana tao sala-singok, soona muse ana tunu-hotu bi'ihii tenak esa, besak-ka teuk esa, soaneu tutunu-hohotuk fo, sala-singok hapu do'o do ampon. 28Imam-ma muse tao feta sala-singok hapu do'o do ampon, nai Manetualain, matan, fo ela hataholi ndia sala-singon, hapu do'o do ampon. 29Nakanenetek ndia boeo, la'e see fo, ta name'da fa te, ana tao sala-singok so, nau ndia hataholi Israel, do hataholi nusa dea, fo ana leo nahele nai sila nusan dale boe.
30Tehu metema, hataholi Israel esa, do hataholi nusa dea esa, ana bubuluk nakanenetek-ka, tehu ana tao sala-singok soona, ndia nana'de nakadadaek Manetualain. Soona muse hukunisa hataholi ndia, 31nanahu ana la'ban Manetualain, ma ana bubuluk Manetualain paletan-na, tehu ana la'olenan. Soona hataholi ndia mate, nanahu salan-na.
Hataholi fo ana la'olena fai Sabat-ta nakaneneten-na
32Lelek hataholi Israel-la bei leme moo solokaek-ka, ho'u-la touk esa hila ai ha'i la'e fai Sabat. 33Boema loo hataholi ndia, neu nataa Musa, Harun ma laun Israel-la lala'en-na, 34boema ala ta po'i touk ndia fali fa, nanahu ala beita bubuluk, muse taon le'e fa. 35Boema Manetualain nafa'da Musa nae, “Muse hukunisa hataholi ndia. Muse no hataholi ndia leo lalaa oofuk-ka deak neu, fo basa hataholi Israel-la lala'en-na, muse tapan nenik batu, losa maten neme ndia.” 36Boema basa-basas loson leo lalaa oofuk-ka deak neu, de ala tapan nenik batu losa maten, sama leo Manetualain paletan-na.
Nakanenetek la'eneu lafa fifikon-nala
37 Manetualain nadenu Musa 38#Ul. 22:12 nafa'da leoina Israel-la nae, “Tao fifikok neu emi bua papakem-mala pe'dan dae, ma pa'a tali balau neu basa fifikok sila-la. Emi muse tao leondiak neme bobongik leo bobongik neu. 39Fifikok sila-la da'di neu nasanene'dak: Nai lelek emi mitan, soona neukose emi mafandele Au paletang lala'en-na fo emi tao tungan. Ma hu kande fifikok sila-la, de neukose emi mafandendelek Au, fo emi ta tunga emi hihii-nanau mesam-ma fa. 40Neukose fifikok sila-la fe nasanene'dak neu emi, fo emi tunga la'iesak Au paletang-ngala, nalosa te'e-te'e emi da'di Au nuung. 41Au nde emi Manetualain; Au o emi kalua meme Masir mai, fo ela Au da'di emi Manetualaim-ma, nana Au nde Manetualain-na.”
Actualmente seleccionado:
BILANGAN 15: twu
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
