BILANGAN 13
13
Manamakuk ka sanahulu duak-kala
(Ul. 1:19-33)
1 Manetualain nafa'da Musa nae, 2“Neme Israel leon esa mai soona, madenu mauli-malangan esa neu mamaku dae Kanaan fo neukose Au fen neu hataholi Israel-la ndia.” 3-15No Manetualain paletan ndioa, boema Musa nadenus de ala la'o leme moo solokaek Paran-na mai. Hataholi sila-la nde been-na, basa-basas mauli-malangan nai hataholi Israel-la dalek. Naden-nala nde ia:
| Leo | Mauli-malangan |
|---|---|
| Ruben | Syamua, fo Zakur anan-na |
| Simeon | Safat, fo Hori anan-na |
| Yehuda | Kaleb, fo Yefune anan-na |
| Isakhar | Yigal, fo Yusuf anan-na |
| Efraim | Hosea, fo Nun anan-na |
| Benyamin | Palti, fo Rafu anan-na |
| Zebulon | Gadiel, fo Sodi anan-na |
| Manasye | Gadi, fo Susi anan-na |
| Dan | Amiel, fo Gemali anan-na |
| Asyer | Setur, fo Mikhael anan-na |
| Naftali | Nahbi, fo Wofsi anan-na |
| Gad | Guel, fo Makhi anan-na |
16Hataholi sila-la nde, manamakuk fo Musa nadenus leu maku besa-besa loo nusak ndia. Musa nggati heni Hosea, fo Nun anan-na na'den-na, de na'de Yosua.
17Lelek Musa nadenus fo ala la'o-a, ana helus nae leo ia, “La'ok leo kii meu, soona la'ok masale leo dae Kanaan-na boboan kona meu, basa soona, makandoo leo dae mapupukuk-kala meu. 18Palisak matalolole, nusak ndia leobeek, ade laun-na ba'uk-ka do lumanak, ade mabe'i-balakaik-kala do tapandoes-sala do ta. 19Palisak, ade nusak ndia malole do ta, ma ade laun-nala leo lai nggolok-kala, nai masadokek, do lai kota-kota fo makota musuk-kala dalek. 20Matetea-mahehele emi dalem-ma. Mete su'dik, daen-na maoe-maisik, ma ain-nala ba'uk-ka do ta. Mafandendelek, fo seu meni ai manamolik manai naa-la, boan lumanak dei.” Lelek ndia, la'e fai ketu-seu angol-la boa makasososan-na.
21Boema, hataholi sila la'ok leo kii leu, de ala palisak matalolole nusak ndia, mulai neme moo solokaek Zin-na, nai boboak kona, fo leo kii neu, losa kota Rehob-pa, fo deka no enok manaleo Hamat neu-a. 22Makasososan-na, leu leo nusak ndia boboan kona leu, de ala losa kota Hebron-na, fo hataholi Ahiman, Sesai, ma Talmai, fo Enak tititi-nonosin-nala, mamana leleon-na. Kota Hebron-na, napadedeik nakahuluk teuk hitu, neme kota Zoan-na nai Masir. 23Boema, ala losa bafak Eskol-la. Ala ke'di leni angol boak, longek esa, boan makadotok nanseli, nalosa muse hataholi dua ndolon. Ala ho'i leni dalima boak ma kaa boak de'u bee boe. 24Loke mamanak ndia soona, lae Bafak Eskol, nanahu hataholi Israel-la, ke'di leni angol boak, longek esa neme ndia mai.
25Manamakuk sila-la, ala maku besa-besa loo nusak ndia, faik haahulu dalen-na, boema ala fali ma'is, 26de lafa'da Musa no Harun, ma basa hataholi Israel-la, bei lakabubua lai Kades, fo nai moo solokaek Paran-na. Ala tui hata fo sila litan so, ma latu'du ai boak fo, sila lenik-ka. 27Lafa'da Musa lae, “Ami palisak matalolole nusak ndia so, de ami mita daen-na kamasu'ik, ma maoe-maisik, ma ami seu meni ai boak lumanak nde ia, neme naa mai. 28Tehu nusak ndia, laun-nala, ao makadelek mesa-mesan. Nusan-nala matuaina mesa-mesan, ma makota musuk. Bai te, ami mita hataholi ao matua, ei madema-la tititi-nonosin-nala lai naa. 29Hataholi Amalek-kala, leo nai nusak ndia, boboan kona; hataholi Het, Yebus ma Amori-la, leo nai nggolok mapupukuk-kala; hataholi Kanaan-nala, leo nai nggolo tasi su'uk-kala, ma nai ndolo-ndolo Lee Yarden-na, su'un-na.”
30Tehu Kaleb nakatetesa-nakatatamak hataholi fo dalen-na falahaa neu Musa. Kaleb nae, “Ita muse sapu-ta nusak ndia, fo ata loso-tan besak ia boe, nanahu ita balakain-na dai, soaneu ita sengis.”
31Tehu hataholi manafali ma'is sama-sama loo Kaleb sila-la lafa'da lae, “Ta, ita balakain-na ta dai, soaneu teu sapu talas. Nusak ndia, laun-nala balakain lena ita.” 32Boema leu tui hataholi Israel-la dede'a pepekok, la'eneu nusak fo, sila leu maku besa-besa loon ndia. Lafa'da lae, “Nusak ndia, mangalaun-na seli, lena-lenak laun-na bai. Ami mita hataholi manai naa-la, ao matuaina mesa-mesan. 33#Kej. 6:4 Nakalenak, ami mita hataholi-la, sama leo hataholi ao matua, ei madema-la, fo nde hataholi Enak-kala tititi-nonosin-nala. Metema nakasasamak ami mo hataholi sila-la soona, ami mame'da-nana, ami sama leo lamak-ka, de tao leo bee-o, sila boeo dale nameme'dan-na leondiak soaneu ami boe.”
Actualmente seleccionado:
BILANGAN 13: twu
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
