Dwata 8
8
Ktulón Musis du kul yóm tey kehyu yóm tonok hfun Dwata kul
1Yó bud mon Musis mò kul, “Yó kem hlau htugod Dwata dou ebélê ye kemdaw ni, hol ye hteneb mimón du anì mowil ye ne mból ye ne henek ye ta yóm tonok tehe fasad Dwata yó kem tehe fù ye. 2Hol hentulón ye nawa yóm kmò kwit Dwata kuy bè yóm tey nógów mayuk lem yóm benwu laen hol wen tauhen lem yóm fat folò halay. Gel henwit Dwata yu tilów mgel mò gónón temngón du yóm hol nô bè nawa ye ke nimón ye yó kem kun hlau kuy duhen ke là. 3Sotu tehe tilówen kuy, hbitilen yu ominen yó wen mana blayen kuy mò ken ye, yóm ken là deng hnikót ton ye du dalang se yó kem tehe fù ye. Yó gónón mò du yóm yó mò gónó ye temngón du là olon du bè ken gónón mowil tau, okóm mowil le bè kdéen yóm udél Dwata. 4Lem yóm fat folò halay ye mógów, yóm nes ye là kóen na a bolok ne là se kóen na a lembóg ti ye. 5Ni mò hendem ye, yó gel nmò yóm sana kuy Dwata hol gónó mogot wen gónón gel hemtedeng kuy ne wen gónón gel tmafak kuy lómón se yóm mà gel tnafaken yóm ngaen.
6Yó gónóm mon, hol nmò ye yóm deng hlau Dwata kuy. Bè yóm klawi ye mowil, hol lolò ye yó kem kun hlau kuy mung du yóm klikò ye du. 7Yóm sana kuy Dwata hol gónó mogot, du se mit kuy ebè yóm tey tonok hyu ne wen kem él mlel lemen ne wen kem sfuten ne wen tbul él mlel ebè yó kem datalen ne ebè yó kem bulul lemneken. 8Tonok angat hmalay ne wen kem bungu grépen ne figen ne wen pumigriniten. Ne wen koyu uliben ne wen nuhag temneb bè yó snéen. 9Bè yóm tonok yó, là kô ye na e bitil du ne là se kô ye na a élél du. Yó kem botuhen nim benwu ni, wen kem bala tók nô lemen. Ne bè yó kem bulul lemneken, gbek ye mokol bè yó yóm mò gel tenwél ye.#8:9 Yóm monen nokol gel tenwél le yó, yó se yóm tembaga bélê tekuy.Laen kô dù gónó ye élél bè ken ye ne angat dóyón ye Dwata yóm sana kuy Dwata hol gónó mogot, bè yóm tey tonok wen tebasen deng blayen kuy. 10Laen kô dù gónó ye élél bè ken ye ne angat dóyón ye Dwata yóm sana kuy Dwata hol gónó mogot, bè yóm tey tonok wen tebasen deng blayen kuy.
Yóm hetgama Musis kul anì là klifót le ke Dwata
11Hol ye eles temgama anì là klifót ye du yóm sana kuy Dwata hol gónó mogot. Bè yó kem hlauhen htugoden do ebélê ye kemdaw ni, hol bê tô là nimón. 12Ke laen dù bud gónó ye élél bè ken ne ke deng wen gónô tilob hdà ye 13ne ke deng temnù kem safì ye ne kem ubiha ye ne tahu blówón ye ne blówón bukay ye ne ke deng temnù yó kem dumu kimu ye, 14hol bê ye abay hegmón ne bê ye abay klifót yóm sana kuy Dwata hol gónó mogot, yóm deng lemwà kuy gu bè Idyip, bè yóm benwu tehe gónó ye ghesek. 15Bê ye abay klifót yóm tehe kalaken kuy lem yóm tey benwu alì knikò là hyu menwu du, benwu gónón nô yó kem ulal alì malas ne kem syufón. Bè yóm tonok mékéng laen dù élen yó, tódô wen él hesuten bélê ye bè yó gu lem yóm tey botu. 16Bè yóm knô ye lem yóm benwu laen hol wen tauhen yó, wen mana blayen kuy mò ken ye, yóm ken là deng kul hnikót ton du yó kem tehe fù ye. Gel wen yóm tilów mgel hwit Dwata ebélê ye mò gónón tmilów kuy ne mò kuy kehyu. 17Yó gónóm mon, hol bê ye abay hendem ke deng lemwót bè kfasang ye ne bè kgis ye yóm kwen kendengen ye. 18Hol hentulón ye nawa, kaem lemwót bè yóm sana kuy Dwata hol gónó mogot yóm kwen kendengen ye. Yó gónón mò du bélê ye yóm yó, abay se là gbeken kmifót du yóm deng senfasad le yó kem tehe fù ye.
19Hol bê ye abay klifót yóm sana kuy Dwata hol gónó mogot ne bê ye abay beklil ebè yó kem dumu dwata ke tô ye tmaba ebélê le ne ke tô ye mtud bukol bè solu le. Ke ni se nmò ye, eles tulónu kuy kemdaw ni angat ye tódô gotu meglà. 20Ke là nimón ye ke Dwata, angat ye gotu mimot meglà lómón yóm keglà Dwata yó kem dumu but tau nô ta yóm tonok blayen kuy.
Actualmente seleccionado:
Dwata 8: tbl
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2007, Wycliffe Bible Translators, Inc. All rights reserved.
