Dwata 28
28
Któbóng Dwata yóm tau mimón
1Yó bud udél Musis ebè yó kem tau Israél, monen, “Ke hol nimón ye yóm sana kuy Dwata hol gónó mogot ne ke hteneb ye mimón du yóm kdê hlauhen deng tulónu kuy kemdaw ni, angat hegeta Dwata yu senta yó kem dumu but tau talak tonok. 2Hol nimón ye yóm sana kuy Dwata hol gónó mogot anì ton ye yóm kdê tóbóngen kuy nii.
3Angat nuyag Dwata yu bè yó kem benwu gónó ye nô ne bè yó kem tonok gónó ye gel mò hulu.
4Angat nuyag Dwata yu anì hol wen ngà ye ne anì hol wen tebas ye. Balù yó kem safì ye ne yó kem ubiha ye tey wen ngà le se kul.
5Angat tnóbóng Dwata yu anì tendo wen lem yó kem abì ye ne tendo wen lem kuleng ye.
6Angat nuyag Dwata yu balù kihu gónó ye e solu, bè yóm hendu kógów ye ne bè yóm bud kkól ye.
7Ke wen hohon ye mundug kuy angat hegmò Dwata yu bélê le. Bè yóm kundug le kuy, tek sotu lan lolò le. Okóm bè yóm klóy le mulék, tódô le gotu sekla.
8Angat tnóbóng Dwata yu bè yóm gel kmò ye nmò ne angat tódô hennoken yóm fol ye. Angat tendo nuyagen yu ta yóm tonok blayen kuy.
9Ke nimón ye yóm sana kuy Dwata hol gónó mogot ne ke gotu lolò ye yóm kdê hlauhen kuy, henbalingen yu mò hol kun tau lómón yóm deng fasaden kuy. 10Lemwót bè nim nmò Dwata bélê ye ni tódô kdê yó kem tau bè klamangen benwu angat gotu mton du yóm deng kélék Dwata kuy mò hol kun tau ne gotu le likò kuy.
11Tey angat kehból Dwata kuy, angat hwenen safì ye ne tey angat kwen tebas ye ta yóm tonok deng tehe fasaden yó kem tehe fù ye mò blayen kuy. 12Sok gel kól bè yóm bulónen kmulón, angat gel hkulón Dwata eta yóm tonok ye lemwót gu bè longit ne tey kuyagen kuy bè kdê yóm gel nmò ye. Lemwót bè yóm kuyagen kuy yó, botong hutóng ye yó kem tey dê dumu bung tau bè dumu benwu. Okóm kuy, là kô ye na a mutóng. 13Yó nmò yóm sana kuy Dwata hol gónó mogot, là kô nmoen kuy tau mò halak bè dumu tau. Okóm yu yóm fen malak kul. Ke hteneb ye lemolò du yóm kdê hlau Dwata kuy deng tulónu kuy kemdaw ni tendo hyu kógów klowil ye ne laen kô gónón là deng ke wen nmò ye. 14Okóm hol bê ye tô là mimón ne hol bê ye abay lolò yó kem dumu dwata duhen ke tô ye tmaba ebélê le.
Heglumfak Dwata yóm tau là mimónen
15Okóm ke là nimón ye ke Dwata yóm sana kuy Dwata hol gónó mogot, ne ke là hteneb ye mimón du yóm kdê hlauhen tulónu kuy kemdaw ni, ngem kà angat glumfak ye du yóm tafak Dwata kuy.
16Angat tnafak Dwata yu bè yó kem benwu gónó ye nô ne bè yó kem tonok gónó ye mò hulu.
17Angat tnafak Dwata yu anì laen dù lem abì ye ne anì laen dù lem kuleng ye.
18Angat tnafak Dwata yu anì là holen wen ngà ye ne anì là holen wen tebas ye. Balù yó kem safì ye ne yó kem ubiha ye, là kóen hol wen kngà le se kul.
19Angat là kô knudung Dwata kuy balù kihu gónó ye e solu, bè yóm gel kógów ye ne bè yóm bud gel kulék ye.
20Ke mò ye sidek ne ke kenbê ye Dwata, angat wen tey glumfak hwit Dwata ebélê ye ne senbewegen kmò kehedem ye. Angat tey keglayam ye. Ngangen mò kuy efet ye gotu meglà yóm kdê ye. 21Angat hwit Dwata ebélê ye yó kem des mò gónó ye matay efet laen dù bélê ye tebel ta yóm tonok móyón nfun ye. 22Angat wen tey des sidek mahil gónó gbót hwiten ebélê ye, mung du yóm des bnolok ne des kinì. Ne bud heglumfaken kuy snéen yóm tey ékét kinì kdaw ne yóm tey lenos kinì mò hemsidek yó kem hulu ye. Ni kem heglumfak Dwata kuy ni, ngangen mò kuy efet ye gotu matay. 23Angat là kô hkulón Dwata du eta yóm tonok ye efet gotu baling mgel, hol lómón kgelen bala tók. 24Mom yó nmoen bélê ye, hwiten ebélê ye yóm tey lenos mit kfung, ngangen mò kuy efet ye gotu meglà.
25Ke nundug ye yó kem hohon ye, angat hegmò Dwata lu bélê ye. Bè yóm kundug ye kul tek sotu lan lolò ye, okóm bè yóm klóy ye mulék tódô ye gotu sekla. Yó kem tau bè klamangen benwu, ya tey sidek klikò le bè yóm kton le du yóm ktafak Dwata kuy. 26Ke matay ye, yóm lówó ye gotu ken yó kem onuk gel mken matay ne yó kem ógóf lem bnes ne laen kô dù tau nô bè yó mò hmikò kul.
27Angat wen tey hisa hwit Dwata ebélê ye lómón yóm deng tehe nmoen bè yó kem tau Idyip. Yóm lówó ye, tódô tfeng mgas ne tey sidek kketelen. Ne laen kô dù bulung gembek hkó du yóm des yó. 28Yó sotu bud tafak Dwata kuy, angat hlengelen mata ye. Angat hbutóen yu ne hesbewegen kehedem ye. 29Angat ye tódô mógów migóf baluen ke kemdaw, hol lómón ke yóm tau butô là kô tonen du lanen. Yóm kdê yó kem gel nmò ye laen kô dù uléken. Angat tey kehegnok le kuy yó kem dumu tau lel le mnagaw bélê ye, balù sotu tau ke wen tmóbóng kuy.
30Yóm libun deng leninti ye, deng mom tólóng tau myehen du. Yóm gónó hdà ye deng mom tólóng tau nô tahen. Yóm grép hulu ye là kô yu du mken bunguhen. 31Yó kem safì ye angat tódô tnétê le bè solu ye, balù udì ke gken ye. Dalang se yó kem kudà asnu ye, angat tódô nalak le lu lem mata ye ne là kô bud hulék le kul ebélê ye. Yó kem ubiha ye gotu blay le lu ebè yó kem hohon ye, balù sotu tau ke wen tmóbóng kuy. 32Bè yóm igò ye temngel, lemwót yó kem ngà ye logi ne kem ngà ye libun gotu blay le lu ebè yó kem tólóng tau bè dumu benwu mò hesek le. Tódô ket kdaw ye temngel ebè lan tô hemdón kul okóm là kô ton ye kul. 33Angat gotu nwa yó kem tólóng tau yó kem hulu alì leniteg ye, laen dù guta ye se kuy. Mom hen-gnok le yu ne hensidek le yu. 34Lemwót bè yóm alì ksidek glumfak ton ye gefet bè yó kem dumu ye hmilol kuy, botong lengel mata ye. 35Angat tnafak Dwata yu, tódô tfeng hisa bè lówó ye nbuten bè kulu ye efet kól bè ti ye yóm hisa là gbek bnulung du.
36Yó angat nmò Dwata, gotu hegefen yu gomong yóm tau hol geta bélê ye ebè yó kem tólóng benwu, yóm benwu là deng kuy hnikót tngón du dalang se yó kem tehe fù ye. Bè yóm benwu yó angat gónó ye tmaba ebè yó kem dwata kéng gel nmò le gu bè koyu ne gu bè botu. 37Yó kem tau nô bè yó kem benwu angat gónó Dwata e semkla kuy yó, tey sidek ketnga le bè yóm kton le du yóm tey gfà ye. Ne yó nmò le bélê ye, tey kehlowon le kuy ne tey kesedekà le kuy.
38Angat wen tey bnék hulu ye, okóm tek udì nuta ye abay se gotu ken yó kem tlangas yó kem hulu ye yó. 39Yó kem grép angat hulu ye tey kesgifà ye kul, okóm laen kô dù bungu nuta ye ne laen se kô dù tifas nmò ye mò gel ninum ye, abay se gotu ken kuled yó kem lefaen. 40Yó kem angat koyu ulib ye gotu le tmowok bè klamangen tonok ye, okóm laen kô dù hnolo guta ye du abay se tódô gotu tbó yó kem bunguhen. 41Angat wen ngà ye logi ne wen ngà ye libun, okóm angat le gotu lana bélê ye abay se gotu negef le lu. 42Ne kdê yó kem koyu ye ne yó kem hulu ye angat gotu ken kuled lu. 43Angat wen kem tólóng tau menwu lem blóng ye, sónmoen temnù yóm kfasang le mogot kuy, okóm yóm kuy kfasang sónmoen se minut lana. 44Yó angat nmò le bélê ye, wen filak hutóng le kuy. Okóm kuy, laen kô dù hutóng ye kul. Ngang le mò kuy efet lu mogot kuy.
45Ke là nimón ye ke Dwata, yóm sana kuy Dwata hol gónó mogot ne ke là lolò ye du yóm kdê hlauhen kuy, angat gefet bélê ye ni kem heglumfak Dwata ni efet ye gotu meglà. 46Ni kem angat heglumfak Dwata kuy ni mò gónó ye angat temngón du yóm deng ktafaken kuy, dalang se yó kem angat lugod ye, yóm tafak laen kô tul sónen. 47Yóm Dwata, tey tendo kuyagen kuy bè kdê yó kem gel nmò ye. Okóm kuy, là kóen lemwót bè nawa ye yóm klolò ye du. 48Ne yó gónóm mon, angat ye nô lem hólól yó kem hohon hwit Dwata ebélê ye. Laen kô dù bud ken ye ne laen kô dù bud ninum ye ne laen se dù bud nes ye. Angat lus Dwata yó kem hohon ye mò hemsidek kuy efet ye gotu meglà.
49Angat wen sotu but tau hwit Dwata ebélê ye lemwót bè yóm benwu bè hol són tonok mò gmida kuy, yóm benwu là deng kuy hnikót tngón du udél le. Yóm kmò le kuy, hol lómón ke semkot kemfô yóm banug. 50Tey sidek klóbô le laen kô dù kodu le, balù ngà duhen ke tuha gotu hensidek le. 51Yó nmò yó kem sendalù le, angat gotu tnétê le yó kem ógóf ye ne gotu ken le yó kem hulu ye ne fen ye gotu matay lemnus yó dum kuy. Laen kô dù hulu tebel le bélê ye ne laen se dù tifas grép tebel le ne laen se dù hnolo uliben. Yó kem ngà safì ye ne kem ngà ubiha ye, laen kô dù tebel le bélê ye efet ye gotu matay lemnus. 52Angat nundug le kdê yó kem syudad gónó ye nô bè yóm benwu angat blay Dwata kuy yóm sana kuy Dwata hol gónó mogot. Ne yó kem beng geta alì mbegel hmilol yó kem syudad ye, yóm beng snalig ye mò gónó ye gel heklung gotu genbà le. 53Bè yóm angat keslibut le du yó kem syudad ye angat tey keslaf ye mebel ken, okóm laen kô dù ken ton ye. Balù kem ngà ye, yó kem ngà deng blay Dwata kuy, botong glef ye mken kul bè yóm kdaw yó. 54Balù yóm tau alì hulung kmodu kem dumuhen ni kmoen ni, lemwót bè yóm alì kbitilen bè yóm kdaw yó, balù udì ke wen bud koduhen yóm hol dumuhen setwoli, dalang se yóm yehenen alì kenbong nawahen ne yó kem ngaen dù mowil. 55Lemwót bè yóm alì kbitilen, balù udì ke wen blayen kul bè yóm kkenen unged yóm sotu ngaen, abay se laen dù bud dumu kenen lemwót bè yóm deng keslibut kem hohon ye du yó kem syudad ye. 56Dalang se yóm libun boi alì hulung kmodu kem dumuhen ni kmoen ni, yóm libun là gelen mógów tmonok, bè yóm kdaw yó baling sidek kmoen se kun bè yóm yehenen deng kenbong nawahen, dalang se bè yóm ngaen logi ne bè yóm ngaen libun. 57Lemwót bè yóm alì kbitilen lan kem hohon ye smibut du yó kem syudad ye, botong limeng kenen yóm ngaen lomi sut ne yóm klunónen abay se laen dù bud dumu kenen.
58Ke là hteneb ye mimón du yóm kdê hlau Dwata kuy deng snulat bè nim bok ni, ne ke là knikò ye du yóm tey klinggel yóm kun boluy Dwata, yóm boluy bang gónó likò, yóm boluy yóm sana kuy Dwata hol gónó mogot, 59angat tnafak Dwata yu dalang se yó kem ngà ye. Tafaken kuy yó kem des là mkóhen ne yó kem des alì leed mógów lem benwu. 60Angat bud hwit Dwata ebélê ye yó kem des sidek deng tehe glumfak ye bè Idyip. Ne yó kem des yó, là bud lowil ye du. 61Angat bud hwiten ebélê ye snéen yóm kdê kay des, ne yóm kdê kay des alì leed mógów lem benwu, yó kem des là deng tulónen du bè nim Bok Hlau ni ne angat ye gotu meglà. 62Balù yóm deng tey kból ye ni kmoen ni, lómón kwen ye yó kem blotik bè longit, okóm bè yóm kdaw yó angat tek hilu dù mowil abay se là kô nimón ye ke Dwata yóm sana kuy Dwata hol gónó mogot.
63Bè nim kmoen ni, tey kehyu nawa Dwata bè yóm bud kehguléken klowil ye ne bè yóm tey kehbólen kuy. Okóm lemwót bè yóm là kimón ye elem hulin kdaw, bud hyu se nawahen bè yóm angat ktafaken kuy ne bè yóm angat keglaen kuy. Angat gotu hlanahen yu ta yóm tonok móyón nfun ye ni. 64Angat gotu senkla Dwata yu elem blóng yóm kdê but tau bè klamangen benwu talak tonok. Ne bè yóm knô ye bè yó, angat ye tmaba ebè yó kem dwata kéng nmò le bè koyu ne bè botu, yó kem dwata là deng kuy hnikót tnaba du dalang se yó kem tehe fù ye. 65Ne bè yóm knô ye lem blóng le, laen kô dù gónón menek nawa ye. Sónmò ye likò, ne laen kô dù bud nebel mata ye ne laen se kô dù bud nefet nawa ye. 66Bè yóm kdaw yó, deng megewu ne klowil ye, tódô senflós ye likò abay se deng ye moni bè hatay. 67Angat sónmoen tendo slang katay ye bè kdê yó kem sidek gel ton ye. Lemwót bè yó kem dê gel knikò ye, ke hlafus kóyô ye ke géhél kifu ne ke kifu kóyô ye ke géhél mwas. 68Angat hesfulék Dwata yu ebè Idyip smakay bè kafal, balù yóm deng tehe kmonu du mò kuy là bud ye mulék etu. Ne bè yóm benwu yó gónó ye tô hembalù knô ye bè kem hohon ye mò hesek le, okóm laen kô dù móyô kuy.”
Là gomongen bè nili yóm tsaptér 29. Yó tulónen bè nim tsaptér ni yóm bud kehtulón Musis du bè nawa yó kem tau Israél yóm tehe fasad le ke Dwata. Ke là nmò le du yóm fasad le du yó, tey angat ktafak Dwata kul, gomong megtafak bélê le yóm tonok le.
Actualmente seleccionado:
Dwata 28: tbl
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2007, Wycliffe Bible Translators, Inc. All rights reserved.
