Dwata 17
17
Là gomongen bè nili bérs 1 efet kól bè bérs 13. Yó tulónen bè ni kem bérs ni yóm kmò kwit le kukum.
Yóm hlolò Musis kul bè yóm angat kélék le yóm tau hol geta mò mogot benwu le
14Yó bud mon Musis, “Ke deng ye nô ta yóm tonok blay Dwata kuy yóm sana kuy Dwata hol gónó mogot, ne ke deng ye henek tahen, omin ye yó he semsatul du yóm kmò kélék ye yóm tau hol geta bélê ye mò mogot benwu ye, hol lómón yóm kul gel nmò yó kem dumu but tau hmilol kuy. 15Yó kmò kélék ye du yóm tau yó, hyu ke hol du yóm tau deng kun nélék Dwata. Sotuhen, là hyuhen ke là lemwóten bè kuy kwen. Hol bê ye abay mélék bè yó kem tau milo menwu lem blóng ye ke mò mogot benwu ye. 16Yóm tau nélék ye, hyu ke là hwenen du kem kudaen mò snakay yó kem sendaluen ne là se hyuhen ke wen tau hógówen mò na a bemli kudà bè Idyip, abay se deng tehe mon Dwata mò kuy hol bê ye abay bud mulék ebè Idyip. 17Yóm tau nélék ye, là hyuhen ke dê yehenen déke mom dalil gónón glayuk bè Dwata. Là se hyuhen ke hdengen bè tahu blówón ne bè blówón bukay.
18Ne ke deng baling tau hol geta mogot benwu, hyu ke hol hsulaten yó kem hlau Dwata ne yó kem dumu tolok Dwata anì wen nô béléen. Yóm hlau hsulaten yó, lemwót bè yóm Hlau Dwata henyu yó kem sfu Libay, yó kem tau gel blóng ebè Dwata. 19Hyu ke hol tendo nô béléen nim snulat ni ne tendo senfalahen bè yóm klawihen mowil anì yó wen klikoen ke Dwata ne hotuhen nawahen mimón du yóm kdê hlolò Dwata nô lemen. 20Lemwót bè yóm gel kesfalahen du, là kô gbeken du ke hegetahen knóen senta yó kem dumuhen Israél ne là se gbeken mulé du yó kem hlolò Dwata kul balù yó kem olo leneken. Ke ni se nmoen yóm tau hol geta, angat tahà kogoten benwu efet kól bè yó kem angat sfuhen. Balù hilu bud lugod le, tódô seflós kogot le yóm benwu Israél.”
Actualmente seleccionado:
Dwata 17: tbl
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2007, Wycliffe Bible Translators, Inc. All rights reserved.
