Salmos 48
48
1Nayë́pisëtërëʼ Xanruʼ, ateʼ run bayudxi cúʼuruʼ-nëʼ yöl-laʼ ba idú ládxiʼruʼ
ga zoa lu yödzö queëʼ Dios queë́ruʼ le zoa lu guíʼa láʼayi queëʼ.
2Lachi, en sibi naca guíʼa láʼayi naʼ,
ateʼ raza ládxiʼgaca bönachi idútë yödzölió ca naca.
Caní naca guíʼa Sión le röʼö tsöláʼalö ga zaʼ böʼ ziaga.
Lu yödzö naʼ dë ga zoa Bönniʼ Unná Bëʼ nayë́pisëʼ.
3Ruluʼë lahui Dios sóaruʼ tsutsu cuitëʼ Lëʼ
ga zoa lu yuʼu lidxëʼ.
4Gulaʼdáʼbagaʼ nupa taʼnná bëʼ lu yu ni,
en gulaʼbíguiʼë raʼ yödzö láʼayi naʼ.
5Cateʼ bilaʼléʼenëʼ yödzö naʼ buluʼbáninëʼ.
Gulaʼböʼë böniga, en laʼ buluʼzxúnnajtëʼ.
6Raʼ yödzö naʼ gulaʼzxíziëʼ.
Gulaʼzacaʼ ziʼë ca raca queë́nu nigula chizóa uzóanu-biʼ bíʼidoʼ.
7Risö́l-lëʼë Dios tu böʼ budunuʼ,
le rusuniti yuguʼ barco zxön que yödzö Tarsis.
8Biyönruʼ ca nácagaca le zxön benëʼ Dios,
ateʼ naʼa riléʼe quéziruʼ le runëʼ,
lu yödzö láʼayi queëʼ Dios quégaca niʼa nëʼë guizxi yu,
en náquiëʼ caʼ Dios queë́ruʼ.
Tsaz naguixjëʼ yödzö naʼ.
9Ga zoa lu yudoʼ quiuʼ, Dios,
röjnetuʼ ca naca yöl-laʼ dxiʼi ladxiʼ quiuʼ.
10Ca nayë́pisëtërö Loʼ, Dios,
caʼ taʼgúʼu Liʼ yöl-laʼ ba bönachi idútë yödzölió.
Ca naca le naca tsahuiʼ rinná bëʼu.
11Uluʼdzeja bönachi nacuáʼ yödzö Sión.
Uluʼzíʼinu xibé nigula zxíʼini xiʼsóëʼ Judá
tuʼ ruchiʼa rusörö́uʼ netuʼ ca naca le naca tsahuiʼ.
12Guliʼdá idú gásibiʼilö ga dë yödzö Sión,
en buliʼlaba yuguʼ yuʼu sibi tun chiʼi yödzö naʼ.
13Buliʼyú ca naca zöʼö run chiʼi yödzö naʼ,
en buliʼyú caʼ le nuzóagaca le tsutsu,
para gaca quíxjöiʼiliʼ zxíʼini xiʼsóaliʼ ca náquiëʼ Dios zxön ni.
14Tsaz náquiëʼ Dios queë́ruʼ, naʼa dza, en dza siʼ zaca.
Uluíʼinëʼ rëʼu nöza tödi gátiruʼ.
Actualmente seleccionado:
Salmos 48: zar
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2009, Wycliffe Bible Translators, Inc. All rights reserved.
