Titus 3
3
Orang Kristen pu sikap ke pemrinta deng ke orang lain
3:1-11
1Titus, ko harus kas ingat orang-orang dong untuk tunjuk hormat ke pemrinta deng ke orang-orang yang ada pu kuasa, trus dengar dong pu printa. Dong harus slalu siap untuk bikin apa saja yang baik. 2Dong tra bole bicara tra baik tentang orang lain, trus tra bole suka baku mara. Dong kas tunjuk sikap yang tenang, baru kas tunjuk sikap deng kata-kata yang baik ke smua orang. 3Karna dulu tong juga tra mngerti apapa tentang Tuhan: Tong tra tunjuk hormat ke Tuhan, tong dapa tipu trus jadi budak dari hidup enak-enak saja sampe tong tunduk ikut yang tong mau saja. Tong bikin smua yang jahat ke orang lain, kitong tra snang liat orang yang lebi dari tong, trus tong tra baku snang.
4Tapi Allah yang kas slamat kitong, kas tunjuk De pu baik deng De pu sayang. 5De kas slamat kitong bukan karna kitong su bikin baik tapi karna De kasian deng sayang tong. De kas lahir kitong kembali deng cara cuci kas bersi kitong; trus tong pu hidup jadi baru lewat Roh Allah. 6Karna lewat Yesus Kristus yang kas slamat kitong, Allah su isi kitong penu deng De pu Roh. 7Roh itu De kasi, supaya lewat Allah pu baik yang su bikin kitong benar depan Allah ini, tong ada pu hak untuk dapat hidup yang trada akir yang tong su tunggu deng yakin ini. 8Yang sa tulis di atas tu smua benar. Sa mau ko harus kastau itu ke orang lain deng yakin skali, supaya dong yang percaya ke Allah, sunggu-sunggu siap untuk kerja apa saja yang baik. Begitu yang baik, trus ada guna untuk smua orang.
9Tapi ko tra bole ikut dalam orang pu baku tanya-jawab tra penting yang bikin tamba tra mngerti. Macam dong pu beda pikiran tentang daftar moyang yang bikin orang baku adu mulut, trus tentang agama Yahudi pu aturan-aturan yang bikin dong baku bakalai itu. Karna smua itu trada guna, baru percuma saja. 10Untuk orang yang bikin jemaat jadi tapisa-pisa begini ni, ko kas naseat dia. Kalo ko su kas naseat satu dua kali tapi de tra dengar, suda! Ambil jarak deng dia. 11Ko tau to, orang-orang begitu memang su tra mo bikin yang benar lagi. Dosa yang dong bikin trus-trus itu yang nanti balik jadi bukti yang kas sala dorang.
Naseat deng salam untuk tutup
3:12-15
12Titus, nanti sa mo suru Artemas ato Tikhikus untuk datang ke ko situ. Kalo satu dari dong dua su datang, ko cepat ke sa di kota Nikopolis sana. Sa rencana mo tinggal disana sampe musim angin ni slesai. 13Sa minta ko bantu Zenas yang ahli hukum tu, deng Apolos dia. Kasi apa ka, ke dong dua, supaya dong tra kurang apapa waktu dong jalan. 14Trus, tong pu orang-orang Kristen yang ada di pulou Kreta tu harus blajar untuk betul-betul kerja apa saja yang baik, deng bantu orang yang memang perlu dapa bantu. Kalo dong su bikin begitu, dong pu hidup ada guna.
15Kam dapa salam dari smua orang yang ada sama-sama deng sa di sini. Kastau sa pu salam juga ke teman-teman yang sayang kitong karna tong sama-sama percaya.
Sa minta biar Tuhan De kas tunjuk De pu baik ke kam smua di situ.
Actualmente seleccionado:
Titus 3: MPapua
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2023 (Active), Wycliffe Bible Translators, Inc. All rights reserved.
