Isaías 31
31
Egipto runakunaman mana confiakuyänanpaq ninqan
1¡Allaw, Egipto runakunaman rugakuq aywaqkuna!
Qamkunam Egipto runakunapa bestiankunaman,
atska carrëtankunaman
y bestian montashqa soldädunkunaman confiakuyanki.
Israel runakunapa santu Diosninmanqa manam confiakuyankitsu.
Dios Yayataqa manam tapukuyllapis tapukuyankitsu.#Prov. 21.31; Isa. 30.16; Ose. 1.7.
2Egipto runakuna yachayyuq kayanqanman confiakuyaptikipis Dios Yayam mas yachayyuqqa.
Paymi runakunata imanö castigayta yachan.
Ninqantam imaypis cumplin.
Mana alli runakunatam compinchinkunatawan castiganqa.
3Egipto runakunaqa manam diostsu kayan, sinöqa runallam.
Bestiankunapis manam poderyuq angeltsu kayan, sinöqa wätallam.
Tsaymi Dios Yaya castigaptin Egipto runakuna y paykunata contrataqkunapis awantayanqatsu.
Paykunam llapan ushakäyanqa.#Isa. 30.1-5.
4 Dios Yayam nimarqan: <<Üshata león wañuskatsiptin llapan mitsikuqkuna qorikaykur qayaykachäyaptinpis leonqa manam mantsakantsu. Noqapis tsay leonnömi kashaq. Tsaymi kuyanqä runakunata Sión lömachö salvaptï pipis mantsakätsimanqatsu. 5Wawanta pishqu tsapaqnömi noqapis Jerusalénta tsapäshaq. Imapis mana päsananpaqmi shumaq rikäshaq. Imayka mana allipitam salvashaq>>.
6Israel runakuna, Dios Yayatam alläpana rabyatsiyashkanki.
Tsaynö kayanqaykipita arrepentikur poderninchö yapay kawakuyay.
7Payta rabyatsirmi qoripita y yuraq qellaypita ïdulukunata rurayashkanki.
Diospa poderninchö yapay kawarmi tsaykunata jitariyanki.
8Asiria runakunataqa Dios Yaya wañutsir manam runakunapa espädanwantsu wañutsinqa, sinöqa kikinpa espädanwanmi.#31.8 Kikinpa espädanwanmi wañutsinqa ninanqa kikin Dios Yayam permïtinqa wañutsiyänanpaq ninanmi.
Espädapita jövinkuna qeshpiyaptinpis achkuskirmi serviqninkunapaq apayanqa.
9Mantsakaywanmi mandaqnin reypis qeshpir aywanqa.
Capitanninkunapis bandërankunata dëjaskirmi mantsakashqa qeshpir aywayanqa.
Tsaynö kananpaqmi Dios Yaya nin.
Contrankunata ushakätsinanpaqmi Sión lömachö ninata rupaykätsin.
Jerusalénchömi jornuntapis wariykätsin.#31.9 Kay textuchömi Dios Yayapa rabyayninta ninaman y jornuman iwalatsin.
Actualmente seleccionado:
Isaías 31: qxn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.
