Isaías 29
29
Jerusalénta atacayänanpaq ninqan
1<<¡Allaw, Ariel marka, Ariel marka!#29.1 Ariel markam Jerusalén karqan. Ariel ninanmi waykana altar ninan.
¡Allaw! ¡Davidpa Markan Jerusalén, imanöraq kanki!
Wata wata fiestäkunata 2ruraptikipis desgraciatam chätsimushaq.
Alläpa waqarmi llakikunki.
Altarchö wätakuna rupayanqannömi jankat rupanki.
3Qammanmi soldädukunata kachamushaq tumat kunchawaskir atacayäshunaykipaq.
Murällayki jananpa lätar yaykayämunanpaqmi törrikunatapis shäritsiyanqa.
4Venciyäshuptikim patsachö mashtakashqa jitaranki.
Parlayanqaykipis patsa rurinpitanömi wiyakanqa.
Alma waqanqannöllam parlayanqaykipis wiyakanqa.
5<<Peru atacayäshuqnikikuna maytsikaq kayaptinpis ñutu allpata wayra illakätsinqannömi illakätsishaq.
Valienti kayaptinpis tsaki päjata shukukuy apaqnömi ushakätsishaq.
6Llapanta mandaq Dios Yaya karmi castiganäpaq shamushaq.
Illaquwan, temblorwan, räyuwan, shukukuywan, mangädawan y lunyaykaq ninawanmi chikiyäshuqnikikunata ushakätsishaq.
7<<Ariel markata atacaqkuna atska nacionpita shamushqa karpis pukutaynöllam illakäyanqa.
Atacayänanpaq markapa murällanta juchutsiqkunapis sueñuychönöllam ushakäyanqa.
8Mallaqaykar puñuq runa sueñuyninchö alli allita mikuykar rikcharkamurpis mallaqaykaqnöllam kayanqa.
Yakunaykar puñuq runa sueñuyninchö yakuta alli upyarpis pishipashqa y jaqrunpis tsakipakashqa rikchamuqnöllam kayanqa.
Tsaynömi kayanqa Sión lömata atacayänanpaq maytsay nacionpita shamuq runakuna>>.
Jerusalén runakuna tutapäpukushqanö kayanqan
9Chikiyäshuqnikikunata Dios Yaya tsaynö ushakätsinanpaq kanqanta ¿manaku creyiyanki?
Mana creyirmi qapranö kaykäyanki.
Washkuta mana upyaykarpis machashqanömi llutankunata yarpachakuykäyanki.
10Alläpa mana tantiyakuq kayänaykipaqmi Dios Yaya permïtishqa.
Llulla profëtakunatapis llutankunata willakuyänanpaqmi pantatsishqa.#Rom. 11.8.
11Dios Yaya revelayäshunqayki willakuykuna segurashqa librunö kaptinmi ni imata tantiyayankitsu. Liyiy yachaqta <<kay libruta liyiykallämuy>> niyaptikim tsay runa niyäshunki: <<Kay libruqa alli segurashqam. Liyimunäpaq manam kichayta puëdïtsu>>.
12Tsaynöllam liyiyta mana yachaq runata liyipuyäshunaykipaq niyaptikipis niyäshunki: <<Manam liyiyta yachätsu>>.
13Dios Yayam nin:
<<Kay runakunaqa janan shonqullam alabayäman.
Shimillankunawanmi <cäsuqmi> niyäman.
Shonqunkunachöqa juktam yarpaykäyan.#Mat. 15.8-9; Mar. 7.6-7.
<Diospitam mantsakü> nirpis kikinkunapa yarpayllanpita yachatsiyanqantam ruraykäyan.
14Tsay runakuna tantiyayänanpaqmi milagrukunata yapay rurashaq.
Tsaynöpam yachayyuq runakunapa yarpayninkunata upayätsishaq.
Yachayyuqkunapis mana tantiyayänanpaqmi permïtishaq>>.#1Cor. 1.19.
15¡Allaw qamkuna!
¡Imanöraq kayanki, Dios Yayapita pakayllapa mana allikunata rurayänaykipaq yarpaqkuna!
Qamkunam yarpäyanki tutapayllapa willanakuyaptiki Dios Yaya mana musyanqanta.
Tsaynöllam niyanki: <<Dios Yaya manam rikämantsiktsu ni musyantsu>>.
16¡Tsaynö yarparmi llutankunata yarpaykäyanki!
Noqantsikqa Dios Yaya ruranqan mankanöllam kantsik.
Manka ruraqnö karmi Dios Yaya noqantsikpaq masta musyan.
¿Ruraqninta manka ninmantsuraq: <<Manam qamtsu ruramashkanki>>?
¿Tsay mitu manka ruraqninta ninmantsuraq: <<Manam qam rurayta yachankitsu>>?#Isa. 45.9; Jer. 18.1-6; Rom. 9.20-21.
Israel runakunata salvananpaq ninqan
17Kananpita pöcu tiempullatanam Líbano jachakunapis muruna chakrakunaman tikranqa.
Muruna chakrakunanam jatusaq muntikunaman tikranqa.#29.17 Líbano muntipaq parlarmi mana alli runakunapaq parlan. Muruna chakrapaq parlarmi qollmi shonqu runakunapaq parlan.#Isa. 32.15.
18Tsay junaqmi Diospa willakuyninta mana wiyaq runakuna wiyayanqana.
Qapranö kaqkunapis tutapäpukushqanö kayanqanpitam rikäyanqana.
19 Dios Yaya yanapaptinmi qollmi shonqukuna kushikuyanqa.
Israel runakunapa santu Diosnin yanapaptinmi waktsakunapis kushishqa kawakuyanqa.
20Mana respitakuqkunam ushakäyanqa.
Mana alli ruraqkunam kayanqanatsu.
Mana alli ruraykunallaman churakashqa kawaqkunapis llapanmi ushakäyanqa.
21Tsaynöllam runa majinta tumpaqkunata,
juezkunata llullatsikuqkunata
y jutsannaq runakunata manakaqta tumpaqkunatapis Dios Yaya ushakätsinqa.
22Tsaymi Jacobpita miraqkunata Abrahamta jipimuq Dios Yaya nin:
<<Jacobpita miraqkuna, manam penqakuychönatsu kayanki.
Manam mantsakashqa puriyankinatsu.
23Tsurikikunata yanapanqäta rikarmi shutïchö agradëcikayämanki.
Santu Diosnikikuna kanqäta tantiyarmi noqallatana respitayämanki.
24Mana cäsumaqkunam cäsuyämanqa.
Conträ shäriqkunam yachatsinqäta cäsuyämanqana>>.
Actualmente seleccionado:
Isaías 29: qxn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.
