Isaías 2
2
Jerusalénman Diosta adoraq aywayänanpaq ninqan
Miqueas 4.1-3
1Kaychömi qellqashqa kaykan Amóspa tsurin Isaíasta Dios Yaya revelanqan. Tsay revelacionchömi rikätsirqan shamuq watakunachö Judá nación y Jerusalén marka imanö kananpaq kanqanta.
2Shamuq watakunachömi Dios Yayapa wajin kaykanqan lömaqa wakin lömakunapita mas respitashqa kanqa.
Tsaymanmi maytsay nacionkunapitapis Dios Yayata adoraq aywayanqa.
3Tsaynöllam Sión lömapita Dios Yayapa yachatsikuyninta maytsayman apayanqa.
Jerusalénpitam maytsaymanpis palabranta willakuyanqa.
Maytsay nacionpita runakuna aywarmi niyanqa:
<<Dios Yaya akranqan lömaman llapantsik witsäshun.
Jacobpita miraq runakuna confiakuyanqan Dios Yayapa wajinman yaykushun.
Tsaychömi kikin yachatsimäshun mandamientunkunata imanö cumplinapaq kanqanta.
Tsaynöpam pay munanqannö llapantsik kawakushun>>.#Isa. 56.6-7; Zac. 8.20-22.
4Atska nación runakuna piñanakuyaptinpis Dios Yayam justiciata ruranqa.
Tsay nacionkuna jatun kayaptinpis paymi juzganqa.
Juk markawan juk markapis guërrata manam rurayanqanatsu.
Guërrachö pelyayänanpaqpis manam previnikuyanqanatsu.
Maytsaychö runakunapis espädankunapitam planchonkunata ruratsiyanqa.
Lanzankunapitanam ösita ruratsiyanqa.#Ose. 2.18.
5Jacobpita miraqkuna, shayämuy.
Dios Yaya ninqanta cäsur kawakushun.
Mana cäsukuqkunata castigananpaq ninqan
6Dios Yaya, kuyanqayki runakunam rupay yarqamunan kaqlächö täkuq runakunanö adivinarnin suerti qatiyta yachakuyashqa.
Tsaynöllam filisteo runakunanö brüju kaytapis yachakuyashqa.
Juklä runakunawan tallukarmi paykunanö mana allikunata rurar kaykäyan.
Tsaynö kayaptinmi Jacobpita miraq kuyanqayki runakunata dëjashkanki.
7Judá nacionchö runakunapam qorinkuna, qellayninkuna y imaykaläya riquëzankunapis atska.
Bestiankuna y guërra carrëtankunam yupayta mana puëdiypaq kayan.#2.7 Mandakuq rey atska bestiata mana qorinanpaqmi nin Deut. 17.16. Judá nacionchömi tsay witsay runakuna Diosman confiakuyanqanpa rantin yarpäyarqan atska qorinkuna, yuraq qellayninkuna, bestiankuna y guërra carrëtankunapis kaptin tsaykunawan imaykapitapis salvakuyänanpaq kanqanta.
8Tsaynöllam maytsaychöpis ïdulunkunata rurayashqa.
Kikinkuna rurayanqan ïdulukunatam qonqurikuykur adoraykäyan.
9Tsaynö rurarmi penqakushqa kaykäyan.
Taytay, paykunata ama perdonaytsu.
10¡Qaqakunachö uchkukunaman y allpakunaman tsinkakuyay!
¡Mantsaypaq, chipakyaykaq y poderyuq Dios Yayapita tsinkakuyay!#Apoc. 6.15.
11Allish tukuqkunatam penqakuyman churanqa.
Orgullösukunatam rugakatsinqa.
Tsay junaqmi Dios Yayallata pïmaypis alabayanqa.
12Llapanta mandaq Dios Yaya castiganan junaqmi orgullösukunata, mana cäsukuqkunata y allish tukuqkunatapis tsoqpakatsinqa.
13Dios Yayam Líbanuchö cedru qerukunata y Basánchö encina qerukunata ushakätsinqa.
14Altu jirkakunata jatun pirushkunatam ushakätsinqa.#2.13-14 Kay versïculukunachömi allish tukuqkunata iwalatsin cedru qerukunaman, encina qerukunaman, altu jirkakunaman y jatun pirushkunamanpis.
15Tsinkakuyänanpaq ruratsiyanqan jatusaq törrikunatam ushakätsinqa.
Marka tsaparaq murällakunatam ushakätsinqa.
16Tarsispita shamuq kuyakuypaq büquikunatam ushakätsinqa.
17Allish tukuqkunatam penqakuyman churanqa.
Orgullösukunatam manakaqman churanqa.
Tsay junaqqa Dios Yayallatam pïmaypis alabayanqa.
18Tsay witsaymi runakuna adorayanqan llapan ïdulukunata ushakätsinqa.
19Mantsakaypaq, chipakyaykaq y poderyuq Dios Yaya runakunata castigananpaqmi kay patsaman shamunqa.
Tsayta rikarmi alläpa mantsakar qaqachö uchkunkunaman y patsa rurinmanpis tsinkakuyanqa.
20Tsay junaqqa qoripita qellaypita rurayanqan ïdulunkunata manana adorarmi ukushkuna y tsiktsikuna pärayänan uchkukunaman jitariyanqa.
21Tsaypitam alläpa mantsakar qaqakunachö uchkunkunaman y machaykunaman tsinkakuyanqa.
Chipakyarraq poderyuq Dios Yaya castigananpaq shamuykaqta rikarmi tsaynö tsinkakuyanqa.
22Runakunaman amana confiakuyaynatsu.
Runakunam jamaynö ushakaqlla kayan.
Actualmente seleccionado:
Isaías 2: qxn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.
