Isaías 15
15
Moab nación imanö kananpaq ninqan
1Kaychömi qellqashqa kaykan Moab nación imanö kananpaq Dios Yaya revelanqan.#Isa. 25.10-12; Jer. 48; Eze. 25.8-11; Amós 2.1-3; Sof. 2.8-11.
Moab nacionchö Ar markatam juk paqasllachö ushakätsiyanqa.
Moab nacionchö Kir markatapis juk paqasllachömi ushakätsiyanqa.
2Tsaymi Dibón markachö täkuq runakuna alläpa llakikuyanqa.
Templunman y altarkunamanmi alläpa llakikur waqaq aywayanqa.
Nebo y Medeba markakunatam ushakätsiyanqa.
Jankat ushakätsiyaptinmi moabita runakuna alläpa llakikur waqayanqa.
Tsaynö llakikurmi aqtsankunata y shaprankunata rutukuyanqa.
3Lütu llatapan shukushqam cällikunapa puriyanqa.
Wajinkuna jananchö#15.3 Tsay witsaymi Israel nacionchö wajita qatayanqanpa rantin teranti jananman tsaqllaskir qetäwan lashtayaq. Tsay jananchömi awakuyaq, aqakuyaq y trïgutapis akrakuyaq. y pläzankunachömi llapan llakikur waqayanqa.
4Hesbónchö y Elealichö täkuqkunam ausiliuta mañakur qayaykachäyanqa.
Qayaykachäyanqanmi Jahaza markayaq wiyakanqa.
Atacayaptinmi moabita soldädukunapis mantsakäyanqa.
Mas valienti soldädukunapis alläpa mantsakarmi tsuktsukyäyanqa.
5Moabita runakuna tsaynö sufriyänan kaptinmi shonqü alläpa llakinan.
Paykunam Zoaryaq y Eglat-selesiyáyaq qeshpir aywayanqa.
Luhitman witsänan cuestapam waqar witsäyanqa.
Horonaimman aywaq nänipam alläpa waqar aywayanqa.
6Nimrimchö yaku pözukuna y qewakunam tsakinqa.
Llapan tseqllimuq jachakunapis jankatmi qarwatanqa.
Manam ima jachakunapis tseqyaranqanatsu.
7Tsaymi imayka qoriyanqantapis Sauci Raqraman apayanqa.
8Timpull timpull waqayanqanmi entëru Moab nacionchö wiyakanqa.
Eglaimyaq y Beer-elimyaqmi wiyakanqa.
9Atskaq wañuyaptinmi Dimónchö yakukunaman yawarpis tallukanqa.
Leonkunatam Dimónman Dios Yaya kachamunqa.
Tsay leonkunam Moabpita qeshpiqkunata mikuyanqa.
Actualmente seleccionado:
Isaías 15: qxn
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.
