Mateo 3
3
Bautizaq Juan wilakushqan
Marcos 1.1-8; Lucas 3.1-9, 15-17; Juan 1.19-28
1Tsay watakunami Judea provinciacho kaykaq chunyaq jirkacho Bautizaq Juan wilakur 2kayno nirqan: <<¡Tayta Dios mandaykashqan chayamushqanami! ¡Jutsa rurayta kacharir Tayta Dios munashqannöna kawapäkuy!>>#Mat. 4.17; Mar. 1.15.
3Tsayno wilakunanpaq profëta Isaías qelqashqanchömi kayno nin:
<<Juk runami chunyaq jirkacho qayaraypa wilakur kayno niykan:
<Tayta Dios shamunanpaq nänita altsapäkuy.
Wenqu nänikunata derechapäkuy> >>.#Isa. 40.3.
4Juanpa röpan karqan camëllupa aqtsanpita awashqami. Wachkunpis karqan camëllu qarapita rurashqami.#2Rey. 1.8. Mikuyninpis chukluskuna y abëjapa mishkinmi karqan.
5Juan wilakushqanta mayananpaqmi Jerusalénpita, Judeapita y Jordán mayu witsan markakunapita runakuna aywapäkurqan. 6Tayta Diosta perdonta manakäriptinmi Jordán mayucho tsay runakunata Juan bautizarqan.
7Tsayman atska fariseo y saduceo runakuna bautizakuq chayashqanta rikarmi Juan kayno nirqan: <<¡Culebra casta runakuna!#Mat. 12.34; 23.33. ¡Pitaq qamkunata nishushqanki Tayta Diospa castïgunpita qeshpipäkunaykipaq kashqanta! 8Jutsaykikunata rasunpa kacharishqa karqa Tayta Dios munashqannöna kawapäkuy. 9Ama yarpapäkuytsu Abrahampa aylun kashqaykipita#Juan 8.33. Tayta Dios salvashunaykipaq kashqanta. Noqa kaynömi nï: Tayta Dios munarqa kay rumikunatapis Abraham aylu runakunaman tikraratsinmanmi. 10Mana wayuq yörakunata sapipita muturir ninaman qaykuqnömi jutsa ruraqkunata castigananpaq Tayta Dios kamarikushqana kaykan.#Mat. 7.19.
11<<Jutsa rurayta kacharir Tayta Dios munashqanno kawanaykipaqmi yakuwan bautizä. Qepäta shamuq kaqmi itsanqa Espíritu Santuwan y ninawan bautizapäkushunkipaq. Noqapita mas munayniyuq kaptinmi mana välïtsu lanqinta apapänaläpaqpis. 12Trïguta wayrananpaq jurquëtan aptashqanami kaykan. Wayrarkurnami trïguta wayinman churanqa. Punshantanami imaypis mana upiq ninaman qaykunqa>>.
Jesústa Juan bautizashqan
Marcos 1.9-11; Lucas 3.21-22
13Juan bautizananpaqmi Jesúspis Galileapita Jordán mayuman aywarqan. 14Chayaykuptin bautizayta mana munarmi Juan kayno nirqan: <<Manami qamta bautizämantsu, tayta. Tsaypa trukanqa noqata bautizaykalämay>>.
15Tsayno niptinmi Jesús kayno nirqan: <<Imano kaptinpis bautizaykalämay. Bautizamänaykitami Tayta Dios munan>>.
Tsayno niptinmi bautizarqan. 16Bautizakurir yakupita yarqaykämuptinmi jana patsa kichakämurqan. Tsaychömi Jesús rikarqan Espíritu Santu palumano urämur jananman rataykaqta. 17Tsaynöpis jana patsapita Tayta Dios kayno nimurqan: <<Payqa kuyay tsurïmi. Paypitami kushishqa kaykä>>.#Sal. 2.7; Mat. 17.5; Mar. 1.11; Luc. 9.35.
Actualmente seleccionado:
Mateo 3: qvmB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2003, Wycliffe Bible Translators, Inc. All rights reserved.