Rut 3
3
Rut jaa ɡaaɡa wa
1Awola bɛl, Naomi ŋɔ Rut be ŋɔ, “N bie, a chɛ kɛ ń nyin jaa tɛɛ ásɛ he ne ó so. 2Baa n liire aa lɔ o nɛɛ laanee Boas he ne o toli aa pɛa dɛɛ ɛ toma la, o ɛ ya lole. Fini jwaana nɔ ne o dɛ ba mea lɔe. 3Anomanta, sɔ ne dɛ́ fɔɡle nosɔɔhsoma dɛ́ do he laaladɛɛɡa dɛ́ kaa bela. Bɛ ɡel o nae ka tel kɛŋɔ waa di kondikwaa dɛ nyɔ sen tonɛ mɔɔ. 4Pese bela waa chɔ, ásɛ waa ba chɔ dom la, hé ka laa yal kpɔ o nakpale ta, dɛ́ chɔ o naa bɔr. Wɛɛ ŋɔ he bee ɡɛ haa ɛ.”
5Asɛ Rut ŋɔ, “Mɛɛ ɛ wobɛlbwa haa bol n be nɔɔ.” 6Anomanta, o la pɛla la ta jwaana la ne la, asɛ dɛ ka ɛ ɡɛ Naomi aa baɡlo la.
7Boas aa di kondikwaa la dɛ nyɔ sen o sie lɛ la, o kaa chɔ mea baa boa a nyoa bil la jwɛh. Asɛ Rut ɛ bɔeeh dɛ ka laa yal kpɔ o nakpale ta dɛ chɔ bela. 8Boas aa chɔa harambaŋa baah ta la, o jarɔ dɛ na kɛŋɔ haah chɔ o naa bɔr. 9Anee o bɔɔ ŋɔ, “Umee nɔɔ?” Asɛ Rut chaŋe ŋɔ, “Menee he bitolo Rut. Haa ɛ n lole tenten nɔ, paɡri he yal la pera bɔle n nɛ.”
10Asɛ Boas ŋɔ, “Korowii tɛɛ hɛɛra. He baɡle he nyina ɡwaa ɡɛ haa ɛa tɛ he helahaah la kwara. Bonɔɔna nɛɛ chɛ kɛ he fe ɛɛ pɛlɛ, hale ba dɔ suuɡa kɛɛ ba nyao. Kɛ he ta an ɡɛ ɛɛ. 11N bie, bɛ ɡel a hiaih. Mɛɛ ɛ wobɛlbwa haa dɛ nyinii tɛɛ, dɛkalkɛ nɛra baa lɔ bwɛɛ nɔ ta bwa jemɛ ɡɛ he wa aa do kaih. 12A ɛ kasinteŋ kɛŋɔ ya ɛ lolanar. Kɛ bɛl tɔ n sie mɔɔ n teŋɛ.#Lew 25:25 13Chɔ n be bonɔ jwaana nɔ ne, ásɛ tɔɔ perɔ chɔɔ aa, ya na kɛŋɔ wɛɛ moe kɛɛ waa hen moɔ. O sɛoh ŋɔ wɛɛ kpɔe yaa, a fe wer kohona. Kɛ dɛ o ta sɛɛh yaa, n ŋwɛɛ Korowii waa lole saŋ bɛlbwa kɛŋɔ mɛɛ kpɔe. He te chɔ bonɔ ka tel kere chɔɔ.”
14Anomanta, o chɔ o naa bɔr bela asɛ dɛ fel ir chɔmbibii bɛlbwa ta on nae, dɛkalkɛ Boas ŋɔ o be ŋɔ waa nyin kɛ nɛra jemɛ kɛŋɔ haah ba pɛla la ta.
15Asɛ Boas ŋɔ o be ŋɔ, “Foo he batakaare ásɛ dɛ paɡru.” Waa paɡru la, asɛ o fuɡe mea dɛ ɛ kuruwa anue doo o kpɔ kaa dem.
16Rut aa tel dem la, o helahaah bɔɔro ŋɔ, “Naomi ɛrɛɛ a ka chiɡ ɔ?” Asɛ Naomi baɡle waa baa la aa ɛa tɛo bwa. 17O ŋɔ, “O tɛ mɛ mea nɔ ŋɔ ń kpɔ ba, dɛ ŋɔ a ta chɛɛ kɛŋɔ n valɛ nɔŋɡbala ba he be ɡɛ.”
18Anee Naomi ŋɔ o be ŋɔ, “N bie, lawɛ bambile dɛ́ na ɡɛ aa ka chiɡ. Dɛ Boas ta waa nɔ sie nae fini naa, o ta ona dɔe.”
Actualmente seleccionado:
Rut 3: mzw
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.