1 Yowana 2
2
Masiya nang naba makare chire
1Bwesi̱mi̱m, mi̱n mwal chimi̱n lwangi̱n di̱du ke ti̱madu ki̱le we. Aya kasi no wuka chi̱n a ma ki̱le, n chi̱ni ki̱ni naba makare wu ki̱danimi̱n ki̱ti̱mu we kakku Tenge, ka nang chikiye, n Yesu Masiya naba yile. 2N ki̱n nang niku ki̱tumangu a da̱u ki̱leti chireye, n ke ka chi̱ni aya ki̱ni ni̱bu ti̱ti̱nimi kwang.
3Ka ni bunti̱ chi yili̱n Kwamatu ki̱fwa ni mi̱nde, ti̱tu ki̱yungdu ni yim ki̱n. 4Ka nii a yiko, “N yim Kwama.” Yinu a bunti̱bu chi ya̱m Ki̱mu ki̱fwadite, n ki̱n naba ti̱kwaniye, a ne bi̱yili̱m we di̱ki̱ne. 5Aya wu ka bunti̱ ya̱m Kwamame, ki̱mi̱la Kwama ki̱kumang we ni̱r ki̱nu. Nang ki̱swi ni yimi̱nu ko ni ya yayu ware n ti Ki̱ne. 6Ka nang wuwule niye wu ka yidu ko ki̱ya yayu ware n ti Kwama, a mwintuwe ka ya yayu yinangu n Yesu Masiya a yangu.
Yilang ki̱fwiyang
7Kebi̱mi̱m bi̱bu mi̱n mi̱ladi̱mu, mang mwal chimi̱nbu lwangi̱n di̱du ke n ni chi̱n yilang ki̱fwiyang, a ya yilangu nang ki̱ku ta yim feredi we tile bi̱rkengu. Yilang ki̱ ka̱ra̱ngu n nang ya̱mu ta tu ta nwemu. 8A bwin yiko, mi̱n mwal chimi̱n yilang ki̱fwiyang. N Yesu Masiya a yung ni ko yilang ki̱ku ki̱yilang. N ti̱n ti̱n, ti̱yungi yiko. Di̱ne da wu a ki̱liye siine ki̱sudu, yiiku ki̱yilangi siinangu a tu a mwe yiiki̱ku.
9N ki̱n wu a yi ko ki̱ya yayu a yiike, yinu a kebu ki̱ni keko, a chirbu we ki̱liye didin. 10Ka n wure wu a ke keko, ki̱ya yayu a yiike, a yobu wuka nii mi̱nbu yare we dako. 11Aya wu a ko ke ko, n ki̱n a ki̱liye, ki̱ya yayu a ki̱liye, a yinti̱bu bwa n ki̱n ki̱yade di̱ne ki̱liye a yo ki̱mi̱n ti̱dui.
12Mi̱n mwal chimi̱nu n ti̱n kebu mi̱mu,
di̱ne ta ya duku ki̱letiyangu we di̱n Yesune.
13Mi̱n mwal chimi̱nu n ti̱n seli̱bu,
ta yim ki̱n wu n we tile bi̱rke.
Mi̱n mwal chimi̱nu n ti̱n bwelemu,
di̱ne ti̱chau ki̱la we fakware.
14M mwal chimi̱n n ti̱n bwesi̱mu,
di̱ne ta yim Te.
M mwal chimi̱n n ti̱n seli̱bu
di̱ne ta yim Masiya,
wu ki̱n we tile bi̱rke.
M mwal chimi̱n n ti̱n bwelemu,
di̱ne dukanu n ti̱ni ki̱n we ya̱m Kwamamu ta yo a ni̱tu chini̱mu,
n ti̱n ti̱chau ki̱la we di̱Setane.
Ti̱mi̱ladu ti̱ti̱nitu we
15Ti̱mi̱ladu ti̱ti̱nitu we, ka chi a ti̱ti̱niye. Ka nii a mi̱la ti̱ti̱nite, mi̱laku Tengu a newe di̱ki̱ne. 16Di̱ne chitu a ti̱ti̱niti kwang, yinang chi bwi ki̱badde n ti chi nui ki̱kubede n ti ngakku kwiyeng, ti̱tu n ke chi ki̱chiredu a Te aya ki̱chiredu a ti̱ti̱ni. 17Ti̱ti̱nitu n ti chi kubeki̱tu kwang ki̱sudu. Aya n ki̱n wu ki̱bunti̱ ki̱ke Kwama ka ya ti̱kuri ki̱diya kwadi.
Fakware Masiya
18Bwesi̱mi̱m, n chi̱ni a diti swan kutei. Yinangu ta tu ta nwengu, fakware Masiya ki̱bedu. Ko no nang ki̱ka̱ngu fakwarbu Masiyamu nabwen a chire. Nang fi ni yimi̱nu ko di swan kute a mwatawe. 19Fakwarbu Masiyamu a no we ware n ti chi̱ni. Aya n chi a du niye, di̱ne feredi n chi n ke bi̱chirem. Di̱ne ka n chi a no bi̱chireme, a no yadu n chi̱ni we ware. Aya yo n chi a du ni ye, a yung n chi n ke bi̱chirem.
20Aya n ti̱n, n Masiya a rii chi̱n ki̱ni Fi̱ki̱m Kwamamu, di̱ne yiko, n ti̱ni kwang ti̱yim bi̱yili̱mu. 21M mwal chimi̱n n ke di̱ne ta yimbu bi̱yili̱me, aya di̱ne ta yim bi̱yili̱me. Ti̱yim ti̱n tiko bi̱yili̱mu a bi̱bbu ti̱kwani.
22N wure naba ti̱kwaniye? Nang fakwarbu Masiyamu. Nii wu a ko a yibbu Te n ti Bwe, nang nii wu a ko Masiya. 23Ka nang wuwule niye wu a ko Bwe, a koti̱ Te ti̱n. Aya ka nang wuwule niye wu a yiu Bwe, a yiti̱ Te.
24Ti̱chakakku ti̱nang bunti̱ miyaki̱ku ta yiu ferediyangu. Ka miyaki̱ku ta yiu ferediyangu a swe we ni̱tu chinte, n ti̱n ti̱n ta chakakku tani̱n kunkadu n ti Bwe n ti Te. 25Ti̱nti̱ne ki̱ku nang bwa̱ki̱ku Bwe a ma ni mi̱nangu, ka nang chikiye, ti̱kuri ki̱diya kwadi.
26M mwal chimi̱n ya̱m bi̱bu di̱ne bi̱bu ki̱baddu ka butu chini̱mu. 27Aya m Masiya a ni chi̱n Fi̱ki̱m Kwamam bi̱bu n we ti̱chini̱mu. Di̱ne ye, ta babu wuka naba yungke. Fi̱ki̱m bi̱bu ki̱miya chimi̱n ka ti̱ti̱le chiye kwang. Ti̱nti̱ne miyaki̱ kangu ki̱yilang n ke ti̱kwani. Di̱ne yiko, ti̱chakakku ti̱nang kunkadu n ti Masiya yinangu Fi̱ki̱mu a miya chimi̱nangu. 28Di̱ne yiko bwesi̱m mi̱m, ti̱chakakku ti̱nang kunkadu n ti Masiya, di̱ne ke ni nwedu tayi we di ki̱lake ko, ni nwe ti̱nu dibwi we. 29Ka tayim tiko m Masiya naba yile, ti̱yim ti̱n tiko ni wu ki̱tum yile n ki̱n n wu Kwama.
Actualmente seleccionado:
1 Yowana 2: Tula
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2015, The Nigeria Bible Translation Trust and Wycliffe Bible Translators, Inc. All rights reserved.
