UGenesisi 1
IBE
1
Umdabuko
1Ekuqaleni uNkulunkulu wadala amazulu lomhlaba. 2Umhlaba wawungelasimo njalo ungelalutho, ubumnyama babengame phezulu kolwandle njalo uMoya kaNkulunkulu wawuzulazula ngaphezulu kwamanzi.
3Yikho uNkulunkulu wasesithi, “Akubekhona ukukhanya,” lakanye kwabakhona ukukhanya.
4UNkulunkulu wabona ukuthi ukukhanya kwakukuhle, wasekwehlukanisa ukukhanya lobumnyama. 5UNkulunkulu wabiza ukukhanya ngokuthi “lusuku,” lobumnyama wabubiza ngokuthi “yibusuku.” Yikho kwabakhona ukuhlwa lokusa – usuku lokuqala.
6Njalo uNkulunkulu wathi, “Kakubekhona umkhandlu phakathi kwamanzi ukwehlukanisa amanzi kwamanye amanzi.”
7Ngakho uNkulunkulu wehlukanisa amanzi angaphansi komkhandlu kulawo amanzi angaphezulu kwawo. Kwaba njalo.
8UNkulunkulu wabiza umkhandlu ngokuthi “ngumkhathi.” Njalo kwabakhona ukuhlwa, kwabakhona njalo ukusa – usuku lwesibili.
9Njalo uNkulunkulu wathi, “Kakuthi amanzi angaphansi komkhathi aqoqane ndawonye endaweni eyodwa, njalo kakuvele umhlabathi owomileyo.” Ngakho kwaba njalo. 10UNkulunkulu wabiza umhlaba owomileyo ngokuthi “ngumhlabathi,” lamanzi aqoqeneyo wathi “yizilwandle.” Njalo uNkulunkulu wabona ukuthi kwakukuhle.
11Yikho uNkulunkulu wasesithi, “Umhlabathi kawuthele izimila: izihlahla ezizala intanga lezihlahla emhlabathini ezithela izithelo ezilentanga phakathi, kusiya ngemihlobo yazo eyahlukeneyo.” Kwaba njalo. 12Umhlaba wathela izimila: izihlahla ezilentanga kusiya ngemihlobo yazo, lezihlahla ezizala izithelo ezilentanga phakathi kwazo kusiya ngemihlobo yazo. Njalo uNkulunkulu wabona ukuthi kwakulungile.
13Kwabakhona njalo ukuhlwa, njalo kwabakhona ukusa – usuku lwesithathu.
14Njalo uNkulunkulu wathi, “Akube lezibane emkhandlwini womkhathi ukwehlukanisa imini lobusuku, njalo zibe luphawu lokubonisa izibanga zomnyaka, lezinsuku leminyaka, 15njalo mazibe yizibane emkhandlwini womkhathi ukuletha ukukhanya emhlabeni.” Kwaba njalo. 16UNkulunkulu wenza izibane ezimbili ezinkulu – isibane esikhulu ukubusa emini lesibane esincinyane ukubusa ebusuku. Wenza futhi lezinkanyezi. 17UNkulunkulu wazibeka emkhandlwini womkhathi ukuletha ukukhanya emhlabeni, 18ukubusa imini lobusuku, kanye lokwahlukanisa ukukhanya lobumnyama. Njalo uNkulunkulu wabona ukuthi kwakukuhle. 19Njalo kwabakhona ukuhlwa, kwabakhona njalo lokusa – usuku lwesine.
20Njalo uNkulunkulu wathi, “Akuthi amanzi anyakazele ngezidalwa eziphilayo, njalo akuthi izinyoni ziphaphe ngaphezulu komhlaba zidabule emkhandlwini womkhathi.” 21Yikho uNkulunkulu wadala izidalwa ezinkulu zolwandle layo yonke into ephilayo lehambayo enyakazelayo emanzini, kusiya ngemihlobo yazo, lezinyoni zonke ezilamaphiko, ngemihlobo yazo. Njalo uNkulunkulu wabona ukuthi kwakukuhle. 22UNkulunkulu wazibusisa wathi, “Zalani lande ngobunengi ligcwalise amanzi ezilwandle, njalo akuthi lezinyoni lazo zande emhlabeni.” 23Njalo kwabakhona ukuhlwa, kwabakhona njalo lokusa – usuku lwesihlanu.
24Njalo uNkulunkulu wathi, “Akuthi umhlaba uveze izidalwa eziphilayo kusiya ngemihlobo yazo: izinanakazana ezihuquzela emhlabathini, kanye lezinyamazana zeganga, yilezo kusiya ngemihlobo yazo.” Lakanye kwaba njalo. 25UNkulunkulu wenza izinyamazana zeganga kusiya ngemihlobo yazo, izifuyo kusiya ngemihlobo yazo, njalo zonke izinanakazana ezihuquzela emhlabathini kusiya ngemihlobo yazo. Njalo uNkulunkulu wabona ukuthi kwakukuhle.
26UNkulunkulu wasesithi, “Asenze umuntu ngesimo sethu, ngomfuziselo wethu, njalo kabuse phezu kwezinhlanzi zolwandle lezinyoni zemoyeni, phezu kwezifuyo, phezu kwawo wonke umhlaba laphezu kwazo zonke izinanakazana ezihuquzela emhlabathini.”
27Ngakho uNkulunkulu wamdala umuntu ngesimo sakhe, wamdala ngesimo sikaNkulunkulu; wadala owesilisa lowesifazana.
28UNkulunkulu wababusisa wathi kubo, “Zalani lande ngobunengi; wugcwaliseni umhlaba, liwubuse. Busani phezu kwezinhlanzi zolwandle lezinyoni zemoyeni laphezu kwezidalwa zonke ezihambayo emhlabathini.”
29UNkulunkulu wasesithi, “Ngilinika zonke izihlahla ezizala intanga eziphezu kwawo wonke umhlaba lazo zonke izihlahla ezilezithelo ezilentanga phakathi. Zingezenu ukuthi lizidle. 30Njalo nginika zonke izihlahla eziluhlaza kuzo zonke izinyamazana zomhlaba lakuzo zonke izinyoni zemoyeni lakuzo zonke izidalwa ezihambayo emhlabathini – yonke into ephefumula impilo phakathi kwayo – ukuba zibe yikudla kwazo.” Kwaba njalo.
31UNkulunkulu wakubona konke lokho ayesekwenzile, njalo kwakukuhle kakhulu. Njalo kwabakhona ukuhlwa, kwabakhona njalo lokusa – usuku lwesithupha.

Ndebele Contemporary Version (IBhayibhili Elingcwele) Copyright © 2003, 2006 by Biblica, Inc.®

Conocer más acerca de IBhayibhili Elingcwele