Ozhi ndu ishi-ozhi 14

Iwhe l'eme lẹ Ayikóniyomu

1O rwukwaawho lẹ Ayikóniyomu, Pọlu yẹle Bánabasu bahụlekwawho l'ụlo-ndzuko ndu Ju, je ekfua okfu ono kfuta iya nke ọwhu igweligwe ndu Ju mẹe ndu Girísu woru onwowhe ye Kuráyisutu l'ẹka. 2Ọle ndu Ju ọwhu l'ete ekwetaa jeru je akpalia ndu ọwhu l'ẹte abụa ndu Ju, yeru whẹ ọku nke ọwhu whẹ kpọru ụnwunna ono ashị. 3E megelee, ndụ-ishi-ozhi ono nọlee ọdu l'ẹka ono. Whẹ nọdu l'ẹka Onye-Nwe-Ọha asa okfu ẹhu iya kaa kaa. Onye-Nwe-Ọha mee tẹ whẹ kabaa ọdu ike anọ eme iwhe-awhụrulenya, dụ biribiri. Whẹ shi nno egoshi l'iwhe ono, whẹ l'ezhi lẹ nke eze-iwhe-ọma iya ono bụwho ọkpobe-okfu. 4Ndu mkpụkpu ono tsua onwowhe ẹbo: ndu zụru yeru ndu Ju l'ọo nke whẹ bụ iya, ndu zụru yeru ndụ-ishi-ozhi l'ọo nke whẹ bụ iya.

5Ndu l'ẹte abụa ndu Ju, mẹe ndu Ju ọbu l'onwowhe, mẹe ndu ishi whẹ chịa idzu t'e ripyabe ndụ-ishi-ozhi ono tugbushia whẹ l'ẹwhuru. 6Ọo ya bụ l'ama abya agbaarụ ndụ-ishi-ozhi ono, whẹ gbalaa jeshia mkpụkpu Lị́sutura mẹe Dabyi. Mkpụkpu labọ ono dụkota lẹ Layikóniya, whẹ jegekwaawho alị ọdo, duwhetaru mkpụkpu ono mgburumgburu. 7Whẹ je anọdu l'ẹka ono ezhi ozhi-ọma ono.

Iwhe l'eme lẹ Lị́sutura mẹe lẹ Dabyi

8Lẹ Lị́sutura b'o nweru nwoke lanụ ọbu, iwhe lọnwushiru ọkpa. O shi nọduta ngvụru nkeshi ne nwụru iya. Ọ bụleruwho anọdu bẹ l'ọonoduje, toko jebua ije. 9Ọ nọdulewho l'ẹka ono ngabẹ nchị l'iwhe Pọlu l'ekfu. Ọo ya bụ, Pọlu whụlewho l'o kwetawaru nke ọwhu l'ee-me iya t'o mehu. Pọlu bya adazhịbe iya ẹnya l'iwhu, 10bya apalia olu kfushia ya ike sụ: “Gbalihu kfụru akfụru l'ọkpa ghu!” Nwoke ono zhilihu tsoru ẹka lile jewhelahaa. 11Igwe-ọha ono whụlewho iwhe Pọlu meru, whẹ gude okfu Layikóniya, bụ okfu-alị whẹ chishia sụ: “L'ọo oke agwa, bụ iya doberu anyi bẹ ghọ-geeru madzụ byakfuta anyi.” 12Whẹ sụ l'ọwhube Bánabasu bụ oke agwa Zeyúsu; woo: Pọlu bụru agwa ọwhu ẹwha iya bụ Hémisu nkele ọo ya bụ onye ọwhu l'ekfu ekfu, aaka aka. 13Ọo ya bụ, onye l'agwajẹ agwa Zeyúsu ono shi l'eze-ụlo agwa ono, dụ l'ọnu mkpụkpu ono, je akpụkoo oke-eswi; mekoo igu ooshi bya etubegee ya, lụfuta-shia l'ọnu ẹka l'eeshije abata lẹ mkpụkpu ono tẹ yẹle igwe-ọha ono gbua, gude gwaa ndụ-ishi-ozhi ono.

14Bánabasu yẹle Pọlu nụlewho iwhe whẹ l'abya ememe, whẹ zhiwashichaa uwe whẹ ẹbo, gbagbụa gbakfu igwe-ọha ono je adaba whẹ l'echi chishia sụ: 15“Ndu mu! ?Ọo gụnu bẹ unu l'eme nno? ?Unu ta amadụ l'anyi bụa madzụ g'unu bụ? Iwhe anyi byarụ kwa t'anyi bya ezhia unu ozhi-ọma, t'anyi mee unu t'unu tụko agwa ono, l'ẹte adụa iwhe whẹ bụ gbẹeru azụ, lwakfuta Chileke, nọ ndzụ, mbụ Chileke, bụ iya meru igwe mee alị, mee eze-ẹnyimu, mekwaawho iwhe lile, bu ebubu l'ime whẹ. 16Lẹ mbụlembu b'ọ harụ ndiwhe, whẹ l'eshi ụzo, dụ whẹ ree. 17Ọle oogudeje iwhe dụ ree, l'ọonoje eme, gude egoshi ẹgube onye ya bụ. Ọochijeru unu mini, tẹmenu iwhe unu meberu l'alị bẹ l'oomeje, ya eyee mebyi lẹ mgbe iya, l'ọonuje unu nri, nụ iya unu nke etsutsu iya, tẹmenu l'oomejekwawho t'ẹhu tsọ unu ụtso.” 18Whẹ l'ekfu nno mbụ ndụ-ishi-ozhi ono, o wuduzhiawho nwanshị mẹ whẹ ta adụ ike gude iwhe whẹ l'ekfu ekfu l'ọnu, kpọshia mkpụkpu ono ọgba ẹja ono, whẹ tụberu.

19L'ọonwukwadua nno, ndu Ju, shi lẹ Ántiyọku Pyisídiya mẹe lẹ Ayikóniyomu wụ-rwua. Whẹ bya ekfubuta igwe-ọha ono, igwe-ọha ono tụru ike yeru whẹ. Whẹ bya atụlahaa Pọlu ẹwhuru. Whẹ tụta iya ẹwhuru ono jeye nteke whẹ doberu gẹ whẹ tugbuwaru iya. Whẹ lọo ya wuru-wuru lọfu lẹ mkpụkpu ono. 20Ndu nke Kuráyisutu bya adowhe iya mgburumgburu, ọ gbalihu. Whẹ dawhushia azụ l'ime mkpụkpu ono. O rwua echile iya yẹle Bánabasu lịru jeshia Dabyi.

Pọlu whẹ l'adawhu azụ lẹ Ántiyọku Siriya

21Pọlu whẹ bya ezhia ozhi-ọma nke Chileke shii lẹ Dabyi. Whẹ kfubutakwawho ndu ha l'igwe, whẹ bya etsolahaa ụzo nke Jisọsu. Whẹ tụgbua nteke ono dawhushia azụ lẹ Lị́sutura, shiwaro l'ẹka ono jeshia Ayikóniyomu, shikwawho lẹ Ántiyọku jeshia Ántiyọku Pyisídiya. 22Whẹ je je emee t'obu shihugee ndu nke Kuráyisutu, nọ l'ẹka ono ike. Whẹ bya agbẹe whẹ ọkpu-ike tẹ whẹ nọshilekwawho ike l'iwhe ono, whẹ kwetaru. Whẹ l'ezhi ndu ono l'iwhe bụ ẹka whẹ jeru sụ: “Unu makwarụ l'anyi jefutaje iwhe-ọtsulanu, ha l'igweligwe nnta gẹ l'eeshi t'anyi bahụ l'ẹka Chileke bụ eze.” 23Whẹ bya ahọfutachaa madzụ, mee whẹ ọgurenya chọchi lẹ chọchi lile. Whẹ bya aswịa ẹgu, kfuru nụ Chileke bụ iya bụ onye whẹ kwetaru l'ọo ya bụ Onye-nwe-whẹ-nụ, wota ndu ono ye iya l'ẹka.

24Whẹ jegelewho Pyisídiya, whẹ jeshia Pamfíliya. 25Whẹ bya ekfugee okfu Chileke lẹ mkpụkpu Pega, whẹ jeshia mkpụkpu Atáliya. 26Whẹ shi l'ẹka ono tụgbua jeshiwhu mkpụkpu Ántiyọku Siriya azụ bụ iya bụ ẹka ono, a nọdu wota whẹ ye l'ẹka Chileke t'o mejeru whẹ iwhe-ọma l'oje ozhi ono, whẹ jefuru l'ishi ntaa ono.

27Whẹ rwua Ántiyọku Siriya; whẹ bya ekukobe ndu chọchi l'ẹka lanụ, kọoru whẹ iwhe lile, Chileke gude whẹ mee; kọkwaaru whẹ whọ gẹ Chileke gude gụhaaru ndu l'ẹte abụa ndu Ju ụzo, tẹ whẹ kweta nkiya. 28Pọlu mẹe Bánabasu, whẹ lẹ ndu nke Jisọsu ẹka ono, nọo ọdu l'ẹka ono.

Actualmente seleccionado:

Ozhi ndu ishi-ozhi 14: Ezaa

Destacar

Copiar

Comparar