Malika 5
5
Ieisu vaitabu kapoidi iveuqeuqedi tomoqo waineye'eqa
Madiu 8:28-34; Luke 8:26-39
1Ieisu mekanatovemulivo itupa ilekwa Waya Galili doleneye, no vikainina waineye me Gelasa tomo'otoqa divikai. 2Tutuyanina ilekwa Ieisu wageye'eqa iobu, vedimadimanaeqa tamo tomoqo ovu#5:2 Ovu dede mesaida me Diu kaditaumata towapa waidie iyatoyatodi. waineye'eqa imai. Tomoqo dede vaitabu kapoidi iluguya isasasaleni. 3-5Basenaqaida ge tamo aitoi kanasala inavekuniqeni—tutuya matatabuna kaqena wete dimana seni beqa iyoqoyoqonidi we seni isisidabadabadi beqa ge tamo aitoi kanasala inasenia. Kaiata wete lovana naqedie isasasala koya waineye we ovu gamwadie imiamia ieqoleqole wete taunina gileueqa ilalaqi. 6We kaiatanina kanikie'eqa ikisanaqo Ieisu ikiseni matautauda ilaukwavina inaqo manawaneye isobwanu. 7-8We Ieisu ivoneni ivo, “Vaitabu kapoina tomoqo waineye'eqa kusauyemu!”
We tomoqo iveqole bonana bwaiginaeqa ivo, “Ieisu Yaubada Tabwaotoqineye Natuna! Vakai wayaqimu waigue? Yaubada kanawavaqaeqa avelaukuiemu ge kikaniqodadaqegu!”
9We Ieisu ivelautolieni, “Banikodiqa kamuavaqa?”
We ibaivila ivo, “Dede meyokoma beqa kamawavaqa Ligioni.” #5:9 Ligioni mesaida 6,000 Loma tolauqaviavo. 10We vaitabu kapoidi giladi ielaukui-veluveluluna Ieisu waineye ivo, “Ge wayaqima kikwavinema kaisauyema dede vikainina waineye.”
11We koya vikaineye bawe yoko bwaigina iduaduala, 12beqa vaitabu kapoidi Ieisu ivelaukuieni ivo, “Kuvetunema kainaqo bawe waidie kailugu.”
13Ieisu itagwanedi mesaida inavalabubunedi, we vaitabu kapoidi tomoqo waineye'eqa isauyedi inaqo bawe waidie ilugu. We koya waineye'eqa bawenidiavo matatabudi mepatalina kadiyoko 2,000 ivelalaukwavina iobu bwaqale waya naqeneye ivekalamonumonu.
14We bawe kaditovekisabodabodanidiavo igololo ideqa inaqo taoni bwaigidi wete taoni siaidi waidie vakai isauyeni ivesipupuyedi. No waineye tomo'otoqa puedi inaqo wayaqidi vakai isauyeni inakiseni, 15we Ieisu waineye imai ikiseni tomoqonina base vaitabu kapoidi iluguyaqa kanawavaqa Ligioni. Kanakaleko ikweseni imiamia we nuana ge idaqau, beqa tomo'otoqa puedi igololo. 16Tomo'otoqanidiavo ikiseniqa tomo'otoqa tupwaidiavo ivonedi vakai isauyeni tomoqonina vaitabu kapoidi iluguya wete bawe paipaidi. 17Beqa Ieisu ivelaukuieni divikai inakiaweni.
18Tutuyanina Ieisu wageye idododoqa, we tomoqonina vaitabu kapoidi iluguyaqa Ieisu ivelaukuieni ivo, “Kanasala taiauda tainaqo?” 19We Ieisu ge idatagwaneni beqa ivo, “Kuvila mususuvo waidie kuvonedi Tomwaya saku bwaigina ivalabubuni waimue ikavegiagiamaimu, we mwaqitana ivenapwayewemu.” 20Beqa tomoqonina inaqo vanuqa bwaigidi kadiyoko Teni Kawalawa (Dekapolisia) waidie iesipupu vakai Ieisu gunabeida ivalabubuniqa paipaina, we puepuedi inoqai nuadi ivilele.#5:20 Valea dede isauyeni vikainina tomo'otoqanidiavo Denitali. Beqa taiyagovi paina tupwaidiavo bawe no vikaineye imiamia. Base Yaubada naketoboda Mosese waineye iveleniqa, ivona ivo, “Bawe ge kaisaya maqemaqetana,” beqa me Diu ge bawe ina'alatovonidi o vaiqodi inakanidi. Dede wete igiavemaqetai mesaida Ieisu tomoqonina ivoneni nasusuvo inavonedi vakai Yaubada ivalabubuniqa paipaina. Tutuyanina Ieisu me Diu taiauda tomo'otoqa ivonedi ge inanaqo no tupwaidiavo ediavo inavonedi inavo kima Ieisu ikavegiagiamaima.
Iailo natuna vavinena wete vavine viviqidi Ieisu ikavegiagiamaidi
Madiu 9:18-26; Luke 8:40-56
21Ieisu wagaeqa itupa ivila-vaituqana ibalama Waya Galili doleneye. Tutuyanina ibalama vikaineye waya doleneye itovotovoi, wete tomo'otoqa imai itovoi-kwaikwaipipineni. 22We tamo tomoqo kanawavaqa Iailo imai no waineye gumanina sinagogi#5:22 Sinagogi tamo vikai kabavelaukui we kabaveyagoyagova Buki Giamaina paipaina we kabamiakauqa paipaina. kanatogumeta. We tutuyanina Iailo Ieisu ikiseni inaqo ilekwa waineye kaqena iveketonokuyedi. 23Matautauda ivelaukui-veluveluluna ivo, “Yau natugu vavinena saiqanaqa inawapa beqa tainaqo dimamu kiyatoi waineye inavegiagiamai inamiamia.”
24Beqa Ieisu taiauda inaqonaqo, wete yoko bwaigina iemulieni iekaibibibineni, we Ieisu gamwaneye itautauya. 25We tamo vavina noko vevine kadiviqa ikewadi dayaqa iulaula diqaba 12 naqedie. 26Disaku wete digileu matatabuna ikalaqeiedi doketa waidie, we ge idakavegiagiamaidi. Kaia ilalailolomo we kadiviqanina iebwaiga. 27-28Tutuyanina Ieisu valeana inoqai kaisedi ienuana ivesipupu ivo, “Kanasala kago kanakalekoqa kadakavekavini we kadavegiagiamai.” Beqa inaqo mulineye yoko gamwadie kanakaleko ikavikavini. 29Ge tutuya kaniakwanina dayaqa iulaula isaya, we ivebaedi kadiviqa gunabeida ikakava.
30No kaiatanina waineye, Ieisu iyagovi naveluluna isauyeni kanalautovona ilautovoni itunuvilai yoko gamwadie ivelautoliedi ivo, “Aitoi kagukaleko ikavikavini?”
31We Ieisu kanatovemulivo ivoneni ivo, “Kukiseni tomo'otoqa iekaibibibinemu beqa banikodiqa kivonedi, ‘Aitoi ikavikavinigu?”
32We Ieisu ikisalelele wayaqina inakiseni tomo'otoqanina ikavikavini. 33Vavina igololo wete ielaudididiqa paina iyagovi vakai isauyeni waidie, beqa imai Ieisu waineye mataneye isobwanu matautauda vakai puepuena paipaidi ivesipupuyedi waineye. 34Matautauda Ieisu ivonedi ivo, “Natugu, kwavetumaqanegu beqa kwavegiagiamai. Kamiviqa gunabeida ikakava beqa memimwasana kwainaqo.”
35Tutuyanina Ieisu iesipupu, tupwaidiavo tomo'otoqa imai Iailo navanuqe'eqa we ivoneni ivo, “Natumu vavinena gunabeida yawaina ikakava beqa tovekaivevena ge kigiaveqauya.”
36We Ieisu gunabeida inoqai vakai Iailo iesipupuyeni waineye matautauda waineye ivo, “Ge kigololo kaia kivetumaqanegumo.”
37We Ieisu inaqo Pita, Iemesa, we taina Ioni imaseagadi taiauda inaqo—ge tupwaidiavo yoko idatagwanedi taiauda inanaqo. 38Tutuyanina Ieisu mekanatovemulivo kadikaitonu ilekwa Iailo navanuqe, we tomo'otoqa puedi ikisedi itaitaiqa-bwaubwau wete itaiqavolovoloqa. 39Beqa Ieisu ilugu vanuqa naqeneye ivo, “Vakai paipaina nuami ikapo kwataitaiqa? Gwamana dede ikenokeno ge idawapa.”
40We inamaqaoqeni, we tovemoqai matatabudi Ieisu ivonedi isauyedi maleweye. Matautauda gwamana inana tamana wete kanatovemulivo kadikaitonu taiauda ilugu tamo tutudaba naqeneye gwamana ikenokeno waineye. 41Ieisu dimaneye ikavikavina ivoneni ivo, “Talita komu.” #5:41 Talita komu Vona dede me Alemika bonadi. Kanasivila, “Gwamana siaimu, avonemu kutovoi!”
42We vedimadimanaeqa itovoi isasasala. (We gwamananina kanadiqaba 12.) Beqa tomo'otoqa nuadi ivilele-otoqa. 43We Ieisu iloinedi ivo, “Ge tamo aitoi kwaivoneni. Gwamana kanikani kwaiveleni inakani.”
Actualmente seleccionado:
Malika 5: mzz
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2023 (Active), Wycliffe Bible Translators, Inc. All rights reserved.