Luka 4

Ceyɗaan jarrabake Yeesu

(Matta 4.1-11 ; Markus 1.12-13)

1Yeesu ivoyi maayo Urdun e heevi *Ruhu Ceniiɗo. Ruhu oon yahari mo nder ladde. 2Toon *Ceyɗaan jarrabii mo balɗe arba'iin (40). Nder balɗe ɗeen fuu o nyaamaay koo ɗume. Ɓaawo ma'ajum o dolii korey.

3Ceyɗaan vi'i mo :

— To a *Ɓiɗɗo Allah kam, vi' nde'e haayre laatoo nyaamdu.

4Yeesu vi'i mo :

— Ɗum vinndaama : Naa e nyaamdu tan neɗɗo foofrata.#4.4 Tokkitaaki Tawreeta 8.3

5Sey Ceyɗaan yahari mo woɗnde yaayre townde, holli mo laamuuji duuniyaaru fuu nder maƴƴannde yitere, 6vi'i mo :

— Mi hokkete baawɗe e risku ɗi'i laamuuji fuu, gam mi hokkaama ɗum. Miin boo, emi waawi hokkugo ɗum mo ngiɗanmi fuu. 7Gam ma'ajum, kul a diccake a sujjidanii yam, ɗum fuu ɗum laatoto ɗum maaɗa.

8Yeesu vi'i mo :

— Ɗum vinndaama : Sujjidan Allah Jawmiraawo maaɗa. Kanko tan kaanɗaa jagganaago.#4.8 Tokkitaaki Tawreeta 6.13

9Ceyɗaan ɓesdi yahari mo Urusaliima, darni mo toon dow hoore *Wuro Allah Seniingo, vi'i mo :

— To a Ɓiɗɗo Allah kam, diw gada ɗo'o 10gam ɗum vinndaama : Allah no vi'ey malaa'ika'en muuɗum ndeen maa.#4.10 Jabuura 91.11

11Kadimaa Ɓe taɓɓo maa nder juuɗe maɓɓe gam to' kosngal maaɗa fii haayre.#4.10-11 Jabuura 91.12

12Yeesu vi'i mo :

— Ɗum vinndaama : Ta'a godo Allah Jawmiraawo maaɗa.#4.12 Tokkitaaki Tawreeta 6.16

13Nde Ceyɗaan heyni jarrabaago Yeesu, sey o dilli o woori mo faa goɗɗum wakkaci.

Yeesu fuɗɗii kuugal muuɗum nder Gaaliili

(Matta 4.12-17 ; Markus 1.14-15)

14Yeesu vitti lesdi *Gaaliili e heevi baawɗe *Ruhu Ceniiɗo. Habaru ma'ako sankitii nder lesdi ndiin fuu. 15Emo ekkitina nder *cuuɗi-ga'ajorɗi Yahuudu'en. Yimɓe fuu e mana mo.

Yimɓe Najaratu calake Yeesu

(Matta 13.53-58 ; Markus 6.1-6)

16Yeesu yahi Najaratu, si'ire to o mawni. *Nyannde-fooftiinde o natti *suudu-wa'ajordu Yahuudu'en, noon no o voovi waɗgo. Sey o ummii gam o jannga *Deftere Seniinde. 17O hokkaa deftere annabi Ecaaya, o omti nde, o janngi aayaaje to ɗum vi'i :

18« Ruhu Jawmiraawo e dow am,

gam o suɓii yam mi wa'ajina sooyɓe *Habaru Belɗum.

O lilii yam mi ma'atina honaaɓe habaru joofeeki mu''en,

mi vumtina vumɓe,

mi waɗa ɗum rimɗina torreteeɓe,

19mi ma'atina duuniyaaru vi'igo hitan barkaa Jawmiraawo warii. »#4.18-19 Ecaaya 61.1-2

20Ndeen o taggi deftere ndeen, o hokkiti nde kuwoowo ɗoon, o jooɗii. Wonɓe nder suudu-wa'ajordu nduun fuu e cutii mo. 21Sey Yeesu vi'i ɓe :

— Ɗe'e aayaaje ɗe nanɗon, hannde ɗe keevii.

22Ɓe fuu ɓe nani belɗum ma'ako. Ɓe kaayɗini e bolle booɗɗe burtiiɗe honnduko ma'ako. Ɓe mbi'i :

— Naa o ɓii Yusufu naa ?

23O vi'i ɓe :

— Ɗum baɗoojum mbalndanon yam ngo'ol balndol bi'ingol : Nyawtoowo#4.23 Waato likitaajo., nyawtu hoore maaɗa ! On mbi'a kadimaa : Ko min nani a waɗii nder Kafarnahum, waɗ ɗum ɗo'o nder si'ire maaɗa boo.

24Kadimaa o vi'i ɓe :

— Emi vi'a on goonga : daɗey annabiijo jaɓɓoraaka no haani nder si'ire muuɗum. 25Emi vi'a on goonga : e jaamaan *annabi Iliya e woodi rewɓe ɗuuɗɓe nder lesdi Isiraa'iila ɓe worɓe mu''en maayi. E jaamaan ɗuum, iyoonde toɓaay duuɓi tati e lebbi joveego'o, veelo manngo waɗi nder lesdi ndiin fuu. 26Ammaa Allah lilaay annabi Iliya to koo go'oto maɓɓe, sey to debbo mo si'ire Jarifat nder lesdi Sidon, mo gorko muuɗum maayi. 27Kadimaa e jaamaan annabi Eliica e woodi ɓe nyawu *kuturta ɗuuɗɓe nder Isiraa'iila, ammaa walaa jamɗitinaaɗo nder maɓɓe, sey Na'aaman neɗɗo lesdi Suuriya.

28Nde yimɓe wonɓe nder suudu-wa'ajordu Yahuudu'en nduun nani bolle ɗeen, ɓe fuu ɓe kuunƴi korey. 29Ɓe ummii, ɓe mburtini mo yaasi si'ire, ɓe njahari mo gaɓɓude baamngel to si'ire maɓɓe nyiɓaa, gam ɓe ndiirta mo, 30ammaa sey o ivi hakkunde maɓɓe, o dilli.

Yeesu vurtinii ginnol

(Markus 1.21-28)

31Yeesu yahi si'ire Kafarnahum nder lesdi Gaaliili, emo ekkitina yimɓe *nyannde-fooftiinde. 32Ekkitinol ma'ako haaynii ɓe, gam emo volira e baawɗe.

33E woodi goɗɗo mo *ginnol nder suudu-wa'ajordu nduun, o wulli e semmbee, o vi'i :

34— Wayyoo ! Ɗume hawtu maa e amin, aan Yeesu mo Najaratu ? A warii gam halkugo min naa ? Emi anndi a moye : a Ceniiɗo ivoyɗo to Allah !

35Yeesu nyaaɗani ngol vi'i :

— De''u ! Vurta nder ma'ako !

Sey ginnol ngool do''i neɗɗo oon yeeso yimɓe, ngol vurtii ngol nawnaay mo.

36Ɓe fuu ɓe kaayɗini, ɓe mbaɗi ga volvugo hakkunde maɓɓe, eɓe mbi'a :

— Ɗum iri ɗeye, ɗe'e bolle ? Gam nder baawɗe e semmbee emo vi'a ginnaaji mburtee, ɗi mburtoo.

37Habaru ko Yeesu waɗi sankitii nder lesdi ndiin fuu.

Yeesu yamɗitinii yimɓe ɗuuɗɓe

(Matta 8.14-17 ; Markus 1.29-34)

38Ɓaawo Yeesu woorii *suudu-wa'ajordu, o yahi wuro Simon. Esoo Simon debbo e wondi e yontere naawnde, ɓe torii Yeesu hoyna mo. 39Yeesu ɓattii jontaaɗo oon, tuurnii dow ma'ako, o vi'i yontere ndeen yoofa mo, sey nde yoofi mo. Ɗoon e ɗoon debbo oon ummii veerni ɓe.

40Nde futuro waɗi, yimɓe fuu woonɓe nyawɓe ɓe nyawuuji feere-feere ngaddi ɓe to Yeesu, o yowi juuɗe ma'ako dow go'oto-go'oto maɓɓe, o yamɗitini ɓe. 41Ginnaaji maa mburtii nder yimɓe ɗuuɗɓe, eɗi ngulla, eɗi mbi'a :

— Aan a *Ɓiɗɗo Allah !

Ammaa o nyaaɗani ɗi, o haɗi ɗi volvugo, gam eɗi anndi kanko woni *Almasiifu.

Yeesu wa'ajinii nder suudu-wa'ajordu

(Markus 1.35-39)

42Nde veeti, Yeesu vurtii si'ire ndeen yahi woɗnde yaayre to walaa koo moye. Jama'aare waɗi ga yillaago mo. Nde ɓe keɓti mo, ɓe ngiɗaa o dilla o woora ɓe. 43Ammaa o vi'i ɓe :

— Doole mi wa'ajina *Habaru Belɗum ɗum *laamu Allah nder ci'e goɗɗe boo, gam sabu ma'ajum liloyaami.

44Ndeen o waɗi ga wa'ajingo nder *cuuɗi-ga'ajorɗi lesdi *Yahuudiya.

Actualmente seleccionado:

Luka 4: fuq

Destacar

Copiar

Comparar