1 TIMOTE 6
6
1Lini nanagelay mborɓiina halaŋ hum u malayasina hu tlena bel, kay a sa mba ŋgul sem Lona u haɗ mamiraɗi lay. 2Mborɓii suu malayasina ni suu vina lini nanagelay asi mba hum usiya, kay asi ni gorsesina, asi mba sunusi jivi ni suni na ɗow, suu fi warakŋa kay sun masira ni suu asi minisina.
Gaɗta cora u begera gasira
Gola ni boy ma aŋ a damma a haɗam kina lay. 3Lini sana haɗ gaɗta daŋŋi ka taɓi u boy ma gasina vi Bu Suuna Yesu Kristuɗi, ka u haɗta vi viigiraɗi lay. 4Nam ŋga tammi ŋgaay ɦawaa ka wi vaɗi, ciwayra ki egemmi ko tuguɗira na, li honira kay boyna ɦawaa, hu li ma namma mbay ni honira, hoo vunna, u ŋgulla, saara cora. 5Suu u saara cora egesina ciwayra duk ɦoŋosira ka daɓ kiɗi lay, asi ka wi gasiraɗi lay, asi gol ko vira hu boyna vi Lona ni va ma a ɦiz tasi kina na.
6Gorsenna vira ni va ma ŋgolna kay sana, lini nam furi u va ma nam vi umma. 7Kay ndaɗta aygi mbaa va ka uygi kay ndaŋgara tanɗi lay, aygi ka tli va ha uygiɗi lay. 8Kay ndaɗta lini tina ka may, barawna ka may ni ndakaygi wa. 9Suu hal a ɦiz tasi kina cuk kaŋga hu ndemba wa, saara cora gunusi yowosi wa, ta zuɗ suuna ha hu ɓalakka a baasi kira. 10Minda vi gursura ni sari dlara vi njaf cora halaŋ, suu ɦiw ni ŋgiziɗ hurusi na, asi viɗ tasi ki day eg vira, asi oy hurusi u yoora ŋgolo.
Gaɗta maŋ Timote kay tamba
11Aŋ sana vi Lona hin dlara halaŋ wanda kiyo, hal ɗoɓira njun taŋ eg Lona u vira, minda, ɗilira, lalamba. 12Duu duu ma jivina vi vira, vi iirira ka a daɓ kiɗira, Lona yaŋŋi kay aŋ wi iiri mayra ndaɗta, hu li ma aŋ diki kay viiŋga duk suu humuŋ dlaaŋga bolowo. 13Fok Lona ma ɦal iirira maŋ tlena halaŋŋa fok Yesu Kristu ma diki kay dlara jivira vi vira fok Pons Pilat, an gaɗaŋu, 14hum u gaɗta jiviya, ŋgomoɗ na gak gak bay li cora, gak gak hu buu ma Bu Suuna mayna Yesu Kristu hin mbana. 15Hu buu ma ŋgaayna faɗta nam hin a mbara ni buu namma col ay ni ko Lona, mul ŋgol maa dew, ma fi sari jivira, mulna vi mulina, Bu Suuna vi Bu Suuna. 16Nam dew ni ma ka miɗɗina, nam kaki hu kiɗik mayra sa ka tuɗ ha huɗira, sa waɗ kaɗi lay, sa ndak a waɗɗi lay, geleɗta u saɓak ma ka daɓ kiɗina ni mam a fafatɗa. Amin.
17Gaɗ suu ka ɦizi hu duliyara tanina asi ŋga tasiɗi, dasi ana asi tin saa masira kay ɦizza bay gasira ndaɗtaɗi, tiniɗ ni kay Lona ma ɦaygi tlena ndakaygi ki halaŋ a aygi mba lak u furira. 18Gaɗasi kay a li jivira kak ɦizi hu sunda jivira, taŋ loɓ kay ɦala ɦal maŋ suunaɗi, njun u suu daŋŋa daŋŋa. 19Asi li wa na ni asi tokŋi tlegeyesi suu jivina kolo kay fokka, ni asi hin fi iiri mayra gasira.
20Aŋ Timote gol dlara ɦaŋga koŋ wanda jiviya, hin boy ma fiyek ma bay umma ma ka taɓ u viraɗina kiyo, u dla mayra yaɗ ana wira ta ka u voɗoɗɗira hiniɗ kiyo. 21Suu daŋŋa ɦiw ni ka u wi mayra ndaɗta, asi mbuɗ ki day eg vira.
Ko oora vi Lona kak u agiya.
Actualmente seleccionado:
1 TIMOTE 6: BMS
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Bible Moussey © Bible Society of Chad, 2002.
