1 TIMOTE 5
5
Sunda vi suu vina
1Yal sa maana u eŋgaɗi, takam ko ndal nammi buŋŋa may. Li u gorzoŋina ko gorseŋŋa na. 2Boyogi suu maana golosi ko somoyoŋ na may, boyogi suu gorina ni ko gorseŋŋa na may ni u huu ma teteɗna.
3Njun u boyogi suu dono suu gasina, geleɗesiya. 4Lini ca mayra hin donora goryoɗ li kaa u suu gorina huwa ni asi haɗ tasi a njun u somoyosi u sunda vi suu vina, ni asi ndak a njun somoyosi u somoyosi ŋgolona lay, ni va ma asi ndak a lasinana. Dla ndaɗta ni jivi ii Lona. 5Cara donora gasira sa ka egeɗɗi, ndaɗ tin saa maɗta kay Lona wa joɓom njunda nam njun uɗta u cenda hu buuna tew tew. 6Cara donora li u min maɗta kay taɗta kini miɗiya, lini ndaɗ ka ni iiri lay kini miɗiya. 7Ni va ma aŋ a gasi humusi kamma, kay sa mba fasi ŋgul egesiɗi. 8Lini sana ka gol suu mamsinaɗi, su saɓaki ni kay suu varam vona, nam hin kini vira, ni nam co su sa ma bay vina.
9Cara donora aŋ gaɗ duk ndumba vi suu donona ni basaɗaɗ tew ki su dok karkiya ni ko ndaɗ li ay kaki u njufna ni yaɗ dew daŋ. 10Suuna halaŋ waɗ ki u sun maɗta jivira ndaɗ wul goryoɗ jiviya, ndaɗ gol suu mba varaɗna jiviya, ndaɗ mbus sem suu vina vi Lona njun u suu hahawra li sunda jivira halaŋ.
11Ndum gor boyogi suu gorina duk suu dononaɗi. Lini saa masira mbuɗ wa ana asi a kak u njufu ni asi hin noy Kristu kiyo. 12Asi mbuɗ ki ni suu cona kay asi ɓalak viisira jewra kiyo. 13Dlara co saɓakira ni kay asi poy vi suuna na cow cow, va ma co saɓakina olo ni asi mbuɗ ki ɦalira ka ŋgay boy hurusi oloɗi, asi ɓak boy ma sa ka gin a dambina. 14Kay ndaɗta an min ana boyogi suu dono suu gorina kak ki u njufina, kay asi ndak a vuɗ goora, gol tasi kay tasiya kay a suu may suu gonokka mba di va ma co egeygiɗi. 15Kay boyogi suu dono suu ɦiw hoŋ ki dagani hin voɗta ɗegeera ki tani tuɗ u Satanna. 16Lini cara vira boyogi suu donona ka hu njafaɗu ni ndaɗ njun usiya, hinisi nekesi kay suu vi Kristunaɗi, kay suu vi Kristuna ndak a njun u suu dono suu gasi kay tasina.
17Suu ŋgolo suu gol suu vi Kristuna jivina ndaki a fi warakŋa ŋgolo, saɓak su ni suu di boyna u suu haɗ suuna. 18Magaara di ana, «Mbutlna a to wana ni aŋ njunum vunumbi,» «Sa li sunda ndaki kay warak mamma.» 19Boy ma co ma suuna kaam kay suu ŋgolona aŋ vam zak bay suu dikina li mba' u hindiɗi. 20Yal suu li cora ki duk suuna halaŋ, kay suu hiŋŋa hin mbuɗ ndaana may.
21An suuruŋŋi fok Lona, fok Yesu Kristu u fok suu sunda huulona suu mansina hum u gaɗta ndaɗta bay ka iira, eg gege lay hu dlaaŋga aŋ laɗta. 22Tin koŋ kay sana zak a ɦam sunda duk suu vi Kristunaɗi, kal taŋ duk cora vi suu hiŋŋaɗi, gol taŋ jivi pasiyak.
23Hin ci mayra aŋ ci yona holli, ci sum veŋŋa nde nde kay huruŋu kay aŋ tew tew ka u tuguɗira.
24Suu taa ɦiw aŋ wasi coosira ki kiɗik ɗal ɗal bay sa kaasi ɓak kasi tu lay. Suu daŋŋa ka ɦiw wasi coosira ni dagan tu may. 25Sunda jivira wi ki ni kiɗik gaw ta sa ka waɗ ki kiɗik gawɗira lay ni ka viɗiɗi.
Actualmente seleccionado:
1 TIMOTE 5: BMS
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Bible Moussey © Bible Society of Chad, 2002.
