1 TIMOTE 4
4
Suu haɗ gaɗ mayra ka u voɗoɗɗira
1Musukka di ki gasi ana lina hin fok a daɓ daganda wanni suu ɦiw hin vira kiyo, asi hin mbuɗ hum u ŋgussa ganyamba u haɗta vi fulina. 2Asi hin viɗ tasi ki u humba hum u suu hurusi mbambana u kaboyna, ni wiisira fokka ki miɗiya, ko sa ŋgalaɗ ki ko kawina gi ay ki tlawra kuŋgura na. 3Suu asina haɗ ana a sana ɗum cara ni ka jiviɗi, tlesuu taa ɦiw lay ni tasiɗi lay, Lona li tlena halaŋŋi a suu vi suu wi gasira cenem kasi wa ni tiya. 4Tlesuu Lona lasina halaŋŋi jiviya ma sa a noyom ki kaɗi, fasi halaŋŋi u gi deɓpa maŋ Lona. 5Boy Lonana u cenda cenemba mbuɗ tlena ki jivi halaŋ fok Lona.
Sa ma sunda vi Yesu Kristu ma jivina
6Lini aŋ haɗ gorseŋŋa na ni aŋ hin mbuɗ ni sa ma sunda vi Yesu Kristu ma jivina ni tak ki ana aŋ ti tina vi Musukka u boyna vi vira, li wa na ni aŋ tuɗ ni u haɗta vi gaɗta gasi. 7Hin dlara njunjunda tafaɗira vi boyogi suu maana, ta garak u boyna vi vira kiyo, haɗ taŋ a vi u Lona na ɗow. 8Haɗta vi mbalatara jivi maɗta ka ŋgolɗi, vira vi tara eg Lonara ni ŋgol su na ɗow. Nam ɦaygi iirira cecemba ni lay, ta ha fokka lay. 9Gola boyna wanni boy ma gasina ndaki a sa vamu. 10Gola aygi laygi sunda loɓ taygi lay ni kay juɓ Lona ma iirina, nammi Sa ma Suɗta vi suuna halaŋ, su saɓaki ni kay suu vina.
11Gaɗa, haɗ tle asina halaŋ. 12Hu zoŋ maŋga ni hin sa a ŋguluŋgi, tak taŋ ki a suu vina tli uŋu, u vunuŋ ma ɓak boyna, u poy maŋga, u min maŋga, u viiŋga, u ɗegee maŋga. 13A juɓun a an tuɗ hara wanni haɗ taŋ a ndum magaara ki fok suuna halaŋ a di boyna a haɗta lay. 14Gol ɦala Musukka ɦaŋgara lalasɗi, ta aŋ faɗ ay ko suu jok vun Lona di kaɗta u mayra suu ŋgolona tin kosi kaŋga. 15Li jiviya a li sunda ndaɗta u voɗoɗu, ɦal taŋ ki na halaŋ kay suuna, kay suuna halaŋ wi ana dlaaŋga tuɗ foko. 16Gol taŋ u haɗ maŋga jiviya, kak ɗili hu dla ndaɗta halaŋ, lini aŋ li ko ndaɗta na ni aŋ hin suɗ taŋga kiyo u suu humuŋŋa lay halaŋ.
Actualmente seleccionado:
1 TIMOTE 4: BMS
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Bible Moussey © Bible Society of Chad, 2002.
