Sam 2
2
Loorong Soksoxolik At Ne Moroa
1Tila ba, limixin at levenabung mixin petpes di sevut li leventaangas kapmek kusu dinoxok lok maxopok at ne Moroa? Tila ba limixin di mumu asu lodoxoma gamasa xerepmo? 2Lavaorong at mo levengkot, di gagas ti esep eburu mi ne Moroa. La luvuttadi amgomgo dit kis buru ri puse ngas ti lox asi Leeme Silok, eburu mi loorong no neni ga soxolik ka i. 3La di lok, “Ata lox asepmus dik basinge lamgomgonga atnedu, la ataba ke xepe levelinga atnedu.”
4To vana at loxot kitkis orong teren at lebelen laxalibet, Leeme Silok ing longon mumu mo lodoxoma atdi, la i paase kalise ba ridi. 5La melemu neni i belengatngas tinotno, la i paase sok di la lumukmusak silok teren ing long amarat aleng tinotno di. 6Ni i lok tidi, “To Saion at lakaana xaala rak, ara vaxaxis aulis li vam Loorong Silok tarax e.”
7Loorong Silok i lok, “Anaba vaase asu bok levempanga Leeme Silok i tong ali i. La ni ga lok tia, ‘Nenu ne Nuruk; ningina nia a lok ngan ne Tamam. 8Una sing ia, la nia anaba raba u mi larabung mixin axap; unaba ruuna ka axap lavatbung menemen. 9Unaba sak tup midi mi lolos silok taram. La unaba sep kapmek di ngan laradi i sep povorok lavasosopen kangka.”
10Kuren la nemi lavaorong, mina xasep at levelinga rak la nemi lubung amgomgo at na lavatbung menemen, mina ronga avukat na levempapaase aronga. 11Mina lok ngangao at ne Moroa mi lanmarat, la minak lok maxopok teren. 12Minat kis tintiding to melamgo ren; naba lok kapmek do ni na musak la soso mun nemi axap mina uu. Nedi axap dik sixit uto saparap ne Moroa kusu ne Moroa na lok see atdi, dinaba momo.
Actualmente seleccionado:
Sam 2: mmx
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.