KAHBHAO 1
1
Lingpü Büshah
1Chongpangpülei Kahvangi vangshothü hatü kahdoknyü ling. 2Kahdoknyü-ü dhaomü mehe deiaeiyao neshiüi kong mü nyuteke hatü yungching ilangmong shak kü vangnyaki jümtü ha shangkü Kahvang laangha#Hebrew shah kü “Ruah” shei ejema, “Laangha” nevaijü “Vanglük” nevaijü “Ngan” shei nyinghen aok. kamteiyei nyu. 3Hapheikü Kahvangi, “Vangngai vamtuh” shei e, hatü vangngai vam. 4Kahvangi vangngaiyü meiangke shei vei, hatü Kahvangi vangnyak kübü vangngai hanhü. 5Kahvangi hapa vangngai kü, “Nyihnüng” hatü vangnyak kü, “Yanüng” shei nyük, hatü om dhüei peihpheikü dhom vam, hapayü shongpü nyih nyuteke.
6Hapheikü Kahvangi, “Yung kübü yung handaitü ha aa kü shingkong vamtuh” shei e. 7Kahvangi shingkong ling, hatü ha shingkong dok kübü yung mü ha shingkong phang kübü yung nyi baong hanhü, hatü ha vamteke. 8Kahvangi hapa shingkong kü, “Vangshang” shei men, hatü om dhü, hatü dhom shei nyipabü nyih nyuteke.
9Hapheikü Kahvangi, “Vangshang phang kübü yungthü shing hükei thaidaituh, hatü kahvan vamtuh” shei e, hatü ha vam. 10Kahvangi ha kahvan kü, “Kahdok” shei men, hatü thaiyei shüngpü yung kü, “Yungching” shei men. Hatü Kahvangi hayü meiangke shei veiteke. 11Hapheikü Kahvangi, “Kahdoknyüi phenhavunglak vamhütuh; livang kohpü püthü, vang kohtü betjük jükpü püthü lem laolao vamtuh” shei e, hatü ha vam. 12Kahdoknyüi hathü vang kohshi betjük jükpü püthü lem laolao vamhü, hatü Kahvangi hayü meiangke shei vei, 13hatü om dhü, hatü dhom shei nyih jempabü nyuteke.
14Hapheikü Kahvangi, “Vangnyak kübü vangngai hanhen shingvaishi vangshangei vangngaithü vamtuh, hatü hathüi hepak vangpan, nyih hatü bongthü nyinghen nyangeihepü hük vaihütuh, 15hatü hathüi kahdoknyü kü vangngai shuohhen shingvaishi vangshangei vangngai kei nyemnyu” shei e, hatü ha vamteke. 16Kahvangi vangngai longpü nyi linglongpüba vangngaiyü nyihnüng nyahen vanghe, hatü maanpüba vangngaiyü yanüng nyahen lennyü hatü lithathü ling. 17Kahvangi kahdoknyü kü vangngai shuohhen, 18hatü nyihnüng hatü yanüng kü vanglem lemhen, hatü vangnyak kübü vangngai hanhen vangshangei shih-ei tuh, hatü Kahvangi hayü meiangke shei vei, 19hatü om dhü hatü dhom shei alipabü nyih nyuteke.
20Hapheikü Kahvangi, “Yungi yungyen vamhütuh, hatü kahdok shak kü vangshangei ouhiyüh piteituh” shei e. 21Hanangkü Kahvangi yungching yem longpü hatü yungmongei kamteipü yemhimak lem laolao hatü ouhiyüh lem laolao ling, hatü Kahvangi hayü meiangke shei vei. 22Kahvangi hathü kü, “Cheha sheiyei daeishetuh hatü yungching mahütuh, hatü kahdoknyü kü ouhiyüh daeishetuh” shei moihimanei e, 23hatü om dhü hatü dhom shei ngapabü nyih nyuteke.
24Hapheikü Kahvangi, “Kahdoknyüi yemhimak lem longi vamhütuh: haümyem hatü lüei kampü yemhimak, hatü phaüyem lem laolao vamhütuh” shei e, hatü ha vamteke. 25Kahvangi haümyem, phaüyem hatü lüei kampü yem lem laolao ling, hatü Kahvangi hapayü meiangke shei vei.
26Hapheikü Kahvangi, “Jeni jenei deiaei leshi hangkuli lingshah, hatü hapa hangku-i yungching yemhathü, shangouthü, haümyem, phaüyem hatü kahdokei lüei kamteipü yemhamakha peü shak kü khei nyemvai” shei e.
27Hanangkü Kahvangi hangkuli#Hebrew shah mü “Adam” shei enyüke. büpalei deiaei kei,
Kahvangei deiaei kü büpai
jomphong nyüha, baha shei ling.
28Kahvangi jomphong kü, “Betjük jüktuh, hatü daeishetuh, hatü kahdoknyü mahütuh, hatü ungei-aeiyei tuhtuh, hatü yungching yemhathü, shangouthü hatü kahdoknyülei nyupü yemhimak peü shak kü khei vaituh” shei moihimanei e.
29Hapheikü Kahvangi, “Veituh, ngei am kü kahdok shak kü livang vampü pühivung lemphü hatü vang kohtü betjük jükpü lemphü ammi hahhen shingvaishi shuohnyüpeih. 30Kahdoknyü kübü yemhimak lemphü, hatü shangouthü, kahdok shakei lüei kamteipü yem, yangnyu ngü nyupü yem lemphü, hatü pühivung peü ammi hahhen shuohnyüpeih” shei e, hatü hapakei nyuteke. 31Kahvangi büpai lingpü lemphü kü meiangke shei mongongei vei, hatü om dhü hatü dhom shei vokpabü nyih nyuteke.
Actualmente seleccionado:
KAHBHAO 1: PHOMBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.