Versículos más leídos de la Biblia Njé gə́ Rɔmə 1

Compartir

Mbata m’ra kəmkul dɔ Tagə́maji’g lé el: yee to siŋgamoŋ lə Ala gə mba kaji nana ɓa gə́ ɔm mée dɔ’g lé Jibje kédé ɓa Grekje keneŋ ɓəi.

Tɔgərɔ ya Tagə́maji lé riba dɔ meekarabasur lə Ala lé təsərə gə goo meekun ləm, mbata meekun lé ləm tɔ to gə́ ndaŋg mee maktub’g pana: Njemeekarabasur lé meekun ɓa yeḛ a si ne kəmba ya.

Nɛ néje gə́ maji kɔr njoroŋ lə Ala gə́ dumkoo ləm, gə siŋgamoŋ ləa gə́ to gə no̰ ləma, gə rɔkunda ləa gə́ yeḛ unda ləm tɔ lé inja kəm dəwje’g təsərə, ndɔ tum gel naŋg saar ɓasinè, mbata néreaje lai ɔr ginee njai ar dee d’oo. Bèe ndá loo kunda goso lə dəwje godo ŋga

mbata deḛ gər Ala lé gao ya nɛ rɔnduba gə́ wɔji dəa lé d’ula dəa’g el ləm, deḛ rəa oiyo el ləm tɔ. Takə̰ji lə deḛ gə́ gə mḭdé ba lé uru dee wala ləm, kəmkàr gə́ godo meḛ dee’g lé ar meḛ dee ndul ne njudu-njudu ləm tɔ.

Deḛ lé tel kankəmta lə Ala lé gə́ taŋgɔm ləm, d’wa nékunda lə Ala meḛ dee’g d’ula ne rɔ dee ndòo d’aree ur dɔ Njekunda néje lai gə́ si gə dɔkaisəgərə gə ləbee-ləbee saar gə no̰ lé ləm tɔ. Amen.

Ala riba dɔ oŋg ləa gə́ ḭ dara ɔm dɔ ndɔlje lai gə́ dəwje ndɔlee ne ləm, gə dɔ néra majelje lai gə́ dəwje ra d’wa ne dɔ kankəmta d’orè gə́ naŋg lé ləm tɔ.

Gelee gə́ nee ɓa Ala sula dee ne sɔgɔ dan nérɔkulje gə́ d’ula pər meḛ dee’g lé, mbata denéje lə dee kara tel rɔ dee gə́ ram-denéje nai ne dɔ na̰’g ləm, diŋgamje kara d’ya̰ goo denéje lə dee ndá tel nai ne dɔ na̰’g ar mal né gə́ deḛ ra gə na̰ lé o̰ meḛ dee lèm-lèm, ar dee ra gə na̰ nérɔkul gə́ to kəm koo el ləm, ar ndəm gə́ deḛ ndəm neelé d’iŋga ne lar-kaiya lə dee, d’uga gə rɔ dee ya ləm tɔ. To gə́ deḛ d’un ne kəm dee rəw dɔ gər Ala’g lé ndá yeḛ nja sula dee ne sɔgɔ dan néraje’g lə dee gə́ kərm-kərm’g gə mba kar dee ra néra gə́ ram lé ya.

Deḛ ɓar rɔ dee njékəmkàrje nɛ deḛ tel to mbə-dəwje. Rɔnduba lə Ala gə́ mina̰ el lé deḛ telee d’unda gə́ magə ndaji ne dəwje gə́ mina̰ ləm, gə yelje ləm, gə daje gə́ gɔl dee sɔ-sɔ ləma, gə néje gə́ d’ag naŋg gə ta meḛ dee ləm tɔ.