Versículos más leídos de la Biblia Pr 12

Compartir

A somc'ojlal, caw wal tzyac' cus qui c'ojlec; ax junc wach' paxti', to tzyac' qui tzaljc'ojlalec.

Caw 'ay qui nab'enec toto tzqui chajec 'ajxoc cuenta qui b'a, ax toto matz qui chajec 'ajxoc cuenta qui b'a, caw may qui nab'enec.

A eb' amancotn spaxtini, tzyac' cus eb' sc'ojl yit 'anmal yet' spaxti tzcomn alej, ax eb' wach' snab'en, caw tzniwnc'ojlax eb' 'aych 'a scusc'ojlal yuj spaxti eb' tzyala.

A eb' may snab'en, a tzyutj eb' snani to wach'n̈j smasnil tas tz'el sb'on eb', ax eb' 'ay snab'en, tzchaj eb' yab' tas tzalx 'a 'a.

Toto may qui nab'enec, caw yajn̈ej tzqui ch'oxnec 'el cowal; ax toto 'ay qui nab'enec, wach'xam tzon̈ 'ixtxec, palta ton̈j tz'ec' 'el junc chi cujec 'ixta'.

A 'ix 'ix caw wach'n̈j tas tzb'o'o, 'icha wal junc corona yaj 'ix 'a win yichmil, caw tzalj win yet' 'ix. Ax 'ix 'ix tu sb'eyb'al jun, 'icha to 'aych syab'il win yichmil 'ix chi yu'uj, masnto tzc'och yab'n win syal 'a yol sb'acl yuj 'ix.

Tzchacl Jehová eb' 'a'm 'es, ax eb' matz 'ixtn yit 'anma'il, caw tzalj yet' eb'.

Toto wach' qui nab'enec, tzqui jucb'tzejec eb' quit 'anmal 'a swach'il, ax toto tu qui nab'enec, caw tzquijec 'at eb' quit 'anmal chi 'a maysch'olnil.

A eb' tzpaxtin wal 'a yel, may b'a'n̈ 'oj satl eb'; ax eb' 'a'm 'es, yajn̈j wal cha, tzsatl eb'.