Versículos bíblicos populares de انجیل مَتّی 2

وَختی اُ تِک خونَه چِدِت و اُ بَچ خاد نَنَشو مریم شُدی، سُجدَه شُکِه و آن بَچا پرستش شُکِه. بعد صندوکچَه‌یّاشو واز شُناکِه و طِلا و کُندُر و مُر اُ مِ بَچا تَکدیم شُکِه.

عیسی تِی زَمون هیرودیسِ پادشاه، تِی شهر بِیت‌لِحِم که تِک منطکَهِ یهودیَه هاد اُ دنیا اُمَ، بعد از دنیا اُندَهِ عیسی، چنتا عالم اِستَرَ شناس که از مَجوسِنِیا هادِت، از سرزمین شَرک اُ شهر اورشلیم اُندِت، و شُگُت: «پادشاه یهودِنیا که تازَه اُ دنیا اُندِ کُئِه؟ اَسِی که اِستَرَهِ آنا تِی شَرک مُدی و اُندِستِم اُشبِپَرَستِم.»

آنایا وَ دِدَهِ اِستَرَ بُری خوشحال و خارام آبُدِت.

تِی خُو اُ اِستَرَ شِناسیا هشدار دَدَ بو که اُ حَدِ هیرودیس پادشاه آنِگَردِت، پَ آنایا هم از رَهِیدو اُ مملکت خوشو چِدِت. بعد از چِدَهِ اِستَرَ شِناسیا، یَک فرشتَه خداوند تِی خُو اُ یوسف ظاهر بو و اُشگُت: «آپابِش، اُ بَچِ و نَنَشو واسِه و اُ مصر بِگُروخ و تِی آنکا وامان تا اُ تو خبر هاتام، اَسِی که هیرودیس اَزدُمِ بَچِئِه تا نابود اُشبِکو.»