Versículos más leídos de la Biblia Epesodeniza 2

Compartir

Deopa taide nauato taporrari: —Occa tonauatobaqquinarra uima bicanira inanemananitoui. Ouattiza madimanauissa tauitoui −nazapa Poua Bedi Zeso Cristo zosse inaronarrari, pouarrine inauatomanizati iquerrenaniuarrine.

Abi Deopa titouideni uati cauanari canarraria tiadeni tonassiuauabaqquirrari. —Zeso Cristo parrissa itoui zoqquerrari −tiquenezape tiadeniza tossiuauehe inanarraro. Tirrinedeni rrerani. Abi Deo touini naza manaconi rrirehe tiadeniza inanarraro. Parrissa, Deo tiadeni tonassiuauabaqquirraripa bicaqquiri tiquenarrarorrine rrerani. Uima bicani tinanemanarrarorrine rrerani. Narrarorrine madirrapa: —Bica onarrarorrine Deo oua tonassiuauarrari −narrarauitoui.

Deopa touati uanehe sse tarrari. Itoui uati cauanari canarrari. Uimasiri sseqquiri inarrarorrinepe pina ecotarrarossa inaccade. Naraha Zeso Cristocca madirra iquerrenezape Deopa iaza camittehe zati da inarraro. Pocca touati uanehepe bica tani, deni torrani. Narraroma tiadeniza uati cauanari canaza tiadeni tonassiuauabaqquirrari.

Madirra ia bazima pina ecotarrarossa ineraha Deopa Zeso Cristo inauatoniza ia naqui poua tezerre ia tonauatonibaqquirrari. Nezape memeuarri Deo Pouarrine Cristo tezerre rrassi inarinitoui.

Zodeo tiquerrena-rrerarraro tiadenipe pina zama onihicca madirrassa, pina zama cappiremanarraridenissa tiquenaporaha rridapanape Zeso Cristoza parrissa tiquenezape Deocca madirra tezerre tiadeni naqui pocca ozacca madirra tiquerrenani. Tiadeni naqui Deoza: —Abi −tiquenani. Deorrine Zeso Cristoza tirrariqquimanarraro. Zeso Cristo pocca zozosse tabaqquina Zeso poua tauimari mari mari ihicanabaqquimana narrari. Deo Atti cacomeraqquiri narrarideni naco poua tauimari ehecomeremana neza timittemanezape parrissa tiquenarraro. Uima nema narrarope pina oza canauatoniuarrinecca uimassa narraro. Oza sibaza canauatoniuarrinepe taide poni cauittanicca nami narroraporraro. Zotodena siba ua tamarouarranizape oza tocarrarraro. Zeso Cristocca zozosse tabaqquideni, Deo Atti cacomeraqquiri narrarideni tezerrepa pina oza cauittanicca namissa quenarrari. Tiadenipe pina siba ua tamarouarraninissa tiquenarraro. Zeso Cristopa pina siba bicabotessa narrari.