Versículos más leídos de la Biblia ASSURENG 31

Compartir

“Purani upilé Bézaleel ana' Uri, eppona Hur polé ri suku Yéhuda, sibawa wéréngngi akuwasak-Ku. Uwéréngngi pappéjeppu, amaccang sibawa amampungeng ri lalenna sininna rupanna ébbu-ébbu makessingngé: untu' mébbu rancana iya mapparelluwangngé apanréng enrengngé jamai polé ri ulawengngé, péra'é sibawa gessaé; untu' masai batu paramata iya maéloé ripasang; untu' sobbi'i ajué sibawa untu' sininna rupanna ébbu-ébbu makessing laingngé.

untu' mappallebbangengngi lao ri bangsa Israélié, “Ramé-raméiwi esso Saba'é, esso iya puraé Upattette selaku esso appésaungeng. Untu' mannennungeng mancajiwi iyaro essoé papparéngngerang ri yelle'mu sibawa Iyya, kuwammengngi muwissengngi makkedaé Iyya'na PUWANG, sibawa purani Upancajiko bangsa-Ku muto.

Iyaro essoé iyanaritu séuwai papparéngngerang iya tette'é ri yelle'na bangsa Israélié sibawa Iyya, nasaba Iyya, PUWANG, pura mébbui langié sibawa linoé ri laleng wettu enneng essona, na ri esso mapitué dé' Uwajjama sibawa mappésau.”