Versículos más leídos de la Biblia Isaías 30

Compartir

Pay munanqannö kawarmi alli nänipa aywaqnö kaykäyanki. Tsay nänipita itsuq kaqläpa o derëcha kaqläpa yaqaqnö kayaptikim qepaykikunapita niyäshunki: <<Kaypam näni. Kay alli nänipa aywayay>>.

DIOS YAYAMAN mana confiakuyta munayaptikipis llakipäkuq allillata ruraq kayninwanmi payman confiakuyänaykipaq shuyaraykäyäshunki. Payman confiakuyaptikim llakipäyäshurniki yanapayäshunki. Payman confiakuqkunam alli kawayta tariyan.

Israel runakunapa santu DIOSNINMI niyäshunki: <<Mantsakur kayanqaykipa rantin noqaman confiakayämuy. Tsaynö kayaptikim alli kawakuyänaykipaq yanapayäshayki>>. Peru tsaynö Dios Yaya nikäyäshuptikipis manam cäsuyashkankitsu.

Alläpa ñakayman y llakikuyman churayäshurnikipis tantiyatsiyäshuqniki Dios Yayaqa manam dëjayäshunkitsu, sinöqa imaypis yanapayäshunkim. Yanapaykäshunqaykitam tantiyayanki.

Sión runakuna, mananam waqayankinatsu. Jerusalén runakuna, mañakuyaptikim Dios Yaya yanapayäshunki. Rugakuyanqaykita wiyarmi llakipäyäshunki.

DIOS YAYAM kuyanqan runakunata nin: <<Allaw mana wiyakuqkuna, ¡imanöraq kayanki! Tapukayämanqaykipa rantinmi kikikikunapa yarpayllaykikunata ruraykäyanki. Mana nikäyaptiqmi juklä runakuna yanapayäshunaykipaq willanakuykäyanki. Tsaynö karmi jutsasapa kayanqaykipitapis mas peor jutsasapa kaykäyanki.