Versículos más leídos de la Biblia Apocalipsis 14

Compartir

Ech tek vabꞌi maꞌl u yol qꞌilankꞌasuꞌlin tu Amlika. Tal ve ech tzaꞌ: —Tzꞌibꞌa qꞌu yol tzaꞌ. «Chiꞌbꞌebꞌal tetz qꞌu aanima qꞌuꞌl aꞌ sakamku tiꞌ u kuBꞌaal taabꞌaꞌbꞌen tzaꞌ.» Chia.— Texhtuꞌ. Ech aꞌ tepaj vabꞌi vaꞌt u yol: —Eeꞌ, aꞌ chituꞌ. Ilaꞌm samotxiꞌan tiꞌ qꞌu tzaꞌl, qꞌu peena vetmotxpaalku tiꞌ u Tioxh. Utz satil iqꞌaqꞌal qꞌu bꞌaꞌnil vetmotxiꞌana.— Texh u Tioxhla Espiiritu.

Ech siꞌilchu qꞌu niman tetz u Jesuus, qꞌuꞌl nimamal qꞌul imantaar taqꞌo utz, kꞌujlel ikꞌuꞌl tiꞌ u Jesuus tan, siqꞌiꞌ qꞌu kꞌaxkꞌo.— Texhtuꞌ.

Uncheeꞌ qetun taltu u aanjel ech tzaꞌ: —¡Nimataj! ¡Xoꞌvataj u Tioxh! Utz tꞌanbꞌaꞌtaj. Tan oponyu u qꞌii utz, oponyu u oora aas saꞌtektaqꞌ u choobꞌal paav. Ech oksataj iqꞌii tan, aꞌ vaꞌl bꞌanon u amlika tuchꞌ u vatz txꞌavaꞌ, vaꞌl bꞌanon u mar utz, aꞌ vaꞌl bꞌanon qꞌu chun aꞌ.— Texh u aanjel.

Ech yolon vaꞌt u aanjel tiꞌ; vitoxvaꞌ tekuꞌen. Utz qetun taltu ech tzaꞌ: —Abꞌil soꞌoksan iqꞌii u xaꞌebꞌalla txokop, sikꞌul u mam choobꞌal paav tetz vikꞌaꞌnal u Tioxh vaꞌl molel koꞌn taqꞌo. Antu sakꞌulun qꞌuꞌl saoksan iqꞌii vitzꞌajich vatzibꞌal utz, qꞌuꞌl sataqꞌ tzii soꞌok u techlal tipala oj tiꞌ iqꞌabꞌ. Utz ech saꞌxhtulebꞌe qꞌu aanima tu xamal tuchꞌ tu pultinajla qꞌol vatz qꞌul iaanjel xaannaj el kꞌatz paav utz, vatz u Chelem Karneꞌl majte. Ech bꞌenamen sabꞌukin ijeꞌ visibꞌel itzꞌeꞌ qꞌu aanima tziꞌ. Bꞌenqꞌii bꞌensaj yeꞌk iloꞌtzꞌ qꞌiils aqꞌbꞌal tiꞌ kajay qꞌuꞌl nimotxoksan iqꞌii u xaꞌebꞌalla txokop tuchꞌ vitzꞌajich vatzibꞌal utz, tuchꞌ qꞌuꞌl samotxtaqꞌ tzii soꞌok u techlal vibꞌii tiꞌ.

Aatz maꞌtich viltuka qꞌu kam tziꞌ, aꞌ tek vil txaklich u Chelem Karneꞌl viꞌ u muunte Sioon. Mam tenam imol; maꞌl 144,000 ixaaneꞌ. Utz jolol chit atoꞌk vibꞌii u Chelem Karneꞌl tipala tuchꞌ vibꞌii u Tioxh majte.

Uncheeꞌ vil paj vaꞌt u aanjel, nichixichꞌan ipaal tu amlika. Aꞌ iqꞌomal u yolbꞌal Tioxh taqꞌo vaꞌl bꞌenqꞌii bꞌensaj. Aꞌ sipaxsav paal tu kajay qꞌu aanima tu u vatz amlika txꞌavaꞌ, kꞌuxh kam itenam aanimail, kꞌuxh kam tiloneꞌ utz, kꞌuxh kam iyolbꞌal.

Ech yolon vaꞌt aanjel tiꞌ; vikaꞌbꞌ tekuꞌen. Qetun taltu ech tzaꞌ: —Sotzyu u mam tenam Babiloonia. Sotzyu u eesan tetz qꞌu aanima tu bꞌey tu u vatz amlika txꞌavaꞌ tzaꞌ. Tan echaꞌ qꞌabꞌansamal itxumbꞌal niꞌaneꞌ.— Texhtuꞌ.