Non-dramatized audio in the language of pyen.

Pyen

Nyiˍ nuing peunˉ na baoˉ vaˍ, Paˍsaˍhkaˍ poiˍ naeˍ uiˉ nae hkaoˍ munˉ tangˍ chiˍ baˍ kan nae poiˍ naeˍ uiˉ ang nyamˍ saˉ hkeu laˉ jiˉ. Yit pa rawˉ hek ang huiˍ uiˍ nae Camˉ lik ang hkiˍ saˍ laˉ uiˉ aˍ Yeˍsuˆ na aˉ mae tiˍ kaeˍ kaeˍ yaˍ yao chu ya yao ya saeˍ ceuˇ nae kanˉ sing lang ga jiˉ. Caˇ, yawng muiˉ poiˍ nyamˍ veu chu baoˇ, changˉ ang muˉ ningˉ uiˉ suk sak yaˍ laeˍ naˇ, poiˍ beu ningˉ keung baˍ chu jo nae ha lang ga jiˉ.

Yeˍsuˆ nawˍ Beˍtaˍniˆ hkawngˍ Siˉmunˍ hkiˉ tutˆ yumˉ veu hangˍ hpeunˍ veu duingˉ yao caˍ tangˉ jiˉ. Haeˉ mae beu, hkaˍ ba yaˍ htiˍ hu Naˍduˆ pangˉ na manˍ ang hawmˉ maˉ manˉ nae ang huˍ hka hingˉ hangˉ na laˉ yao, law ba ang pawnˍ kawkˆ hkak veu kan jiˉ hingˉ ngawˍ hpawn yao Yeˍsuˆ ang tuˍ veu lawngˍ biˍ jiˍ. Haeˉ mae beu, changˉ htiˍ baˍ uiˍ nuing ba yinˍ yao ciˍ jiˍ. Ba ceuˇ ha yao na manˍ ang hawmˉ ningˉ na tiˍ chaw naeˇ. Na manˍ ang hawmˉ ningˉ na Deˍnaˍ riˍ sumˍ pakˍ pyaˍ nae kawngˍ ngaˍ yao ang saˍ ang baeˍ yaˍ na piˍ yao ang kaˍ yaˇ nae htiˍ hu nae htiˍ hu hkai lang yao hkaˍ ba yaˍ hiˍ mangˉ na iˍ jiˍ. Yeˍsuˆ maˇ ha biˍ jiˍ. Yang na baˍ iˍ jo. Yang na ba ceuˉ ha yao suk sak biˍ naeˇ. Yaˇ ga na ang maenˍ kanˍ htiˍ ceuˍ ha laˍ byaˇ. Aˉ mae yao nae baoˇ, changˉ ang saˍ ang baeˍ uiˉ aˍ nawng kawngˉ aˉ lawˍ beun muiˉ ang ca yaˇ. Yawng loˉ beu nawng pawngˍ van yao muiˉ ang kaˍ yaˇ. Gaˇ nawng kawngˉ aˉ lawˍ beun muiˉ baˍ ca nae ha biˍ jiˍ. Hkaˍ ba yaˍ ningˍ maˇ yang hkaˉ ha taw naeˉ laˉ mae ha byaˇ. Ga na hyang laˍ naeˍ uiˉ saˍ laiˍ, hingˉ baˍ hkeu langˉ beu, ga ang to veu na manˍ ang hawmˉ lawngˍ htaˍ laˍ byaˇ. Ga nawng na maˉ manˉ nae hkai hkaemˍ laˍ vaˍ. Nuingˉ chaˍ htaˍ nawˆ mawnˍ pyawˉ naeˉ uiˉ ang buinˉ tangˍ maˍ kyaˍ veu aˉ keung na baˍ upˍ hkaˍ ba yaˍ ningˍ mangˉ ha jiˉ kanˉ ningˉ na hao cuiˍ yaˍ camˉ yaˍ yao hkai kyaˍ lang naeˉ yaˇ nae ha biˍ jiˍ.

Hingˉ nawˍ veu, ta peˍ tiˍ cheˍ nyiˍ hu hingˉ hkaoˉ veu htiˍ hu Yuˉdaˆ Iˉsaˍkaˍroˆ maˇ yit pa rawˉ hek ang huiˍ uiˍ laˍ puˍ hkaoˍ veu Yeˍsuˆ na saˉ caˉ tiˍ chaw naeˉ uiˉ saˍ laiˍ yawng ca naeˉ veu aeˉ jiˉ. Yawng muiˉ hingˉ lawng na ya kyaˍ yao mawnˍ pyawˉ naeˉ hkaoˉ veu yang na hpuˉ piˍ laˍ vaˍ nae saˉ caˉ piˍ jiˍ. Haeˉ mae yao, Yuˉdaˆ Iˉsaˍkaˍroˆ muiˉ ang nyamˍ na hu yao, Yeˍsuˆ na saˉ caˉ tiˍ chaw taw naeˉ uiˉ saˍ laiˍ kaˉ ba na kuitˆ yao ca jiˉ.

Tangˍ chiˍ baˍ kan nae uiˉ hkaoˍ munˉ nae poiˍ nuing hingˉ kaˉ hu htiˍ nuing veu, Paˍsaˍhkaˍ poiˍ beu soˉ mangˉ na tanˍ naeˍ uiˉ ang nuing veu, Yeˍsuˆ beu ta peˍ uiˍ aˍ yang kawngˉ laˉ jiˉ. Yawng muiˉ, Paˍsaˍhkaˍ poiˍ nae miˍ hkiˍ hangˍ caˍ naeˍ hingˉ gu aˉ mae taeˉ veu ya haenˍ aeˉ lang naeˉ nae Yeˍsuˆ na naˉ jiˉ. Haeˉ mae beu, Yeˍsuˆ yang ta peˍ nyiˍ hu na ha biˍ jiˍ. Yeˍruˆsaˍlaemˍ vengˍ hkaoˍ veu aeˉ voˍ. Langˉ iˍ hongˍ hapˆ naeˉ changˉ htiˍ hu na nawng ya myangˉ aeˉ naeˉ. Yang nawngˍ veu hkeˍ vo. Yang awngˉ aeˉ naeˉ yumˉ suingˉ mangˉ na, Ga nae ga beu ta peˍ uiˍ kawngˉ Paˍsaˍhkaˍ caˍ naeˍ uiˉ saˍ laiˍ hkaekˆ changˉ ca kyaˉ ang hawngˉ yangˍ aˉ keung jeuˇ nae ga saˍ laˉ ha langˍ ngaeˉ nae ha biˍ vo. Haeˉ mae beu, yang haenˍ yao chiˉ htaˍ jiˍ ang htaˍ htaiˍ veu ang hawngˉ hingˉ na nawng na maˍ laˍ naeˍ yaˇ. Hiˉ keung gu saˍ laiˍ haenˍ hangˉ voˍ nae ha biˍ jiˍ. Ta peˍ uiˍ muiˉ awkˍ taw aengˉ yao vengˍ hkaoˍ veu awngˉ aeˉ beu yawng na Yeˍsuˆ ha biˍ jiˍ lawˉ myangˉ yao, Paˍsaˍhkaˍ poiˍ naeˍ hingˉ haenˍ hangˉ jiˉ. Miˍ hkiˍ sumˍ vuingˉ ngangˉ luiˍ yao, ta peˍ tiˍ cheˍ nyiˍ hu uiˉ nae Yeˍsuˆ htuˍ yaˍ laˉ mae lui jiˉ. Yawng duingˉ yao caˍ beu, Yeˍsuˆ maˇ, Ga nawng na maˉ manˉ nae hkai hkaemˍ laˍ vaˍ. Nawng hkaoˉ veu ga kawngˉ htuˍ yaˍ laˉ mae cawk yao caˍ naeˍ mangˉ changˉ htiˍ hu maˇ ga na saˉ caˉ tiˍ chaw laˍ naeˍ yaˇ nae ha biˍ jiˍ. Yawng kuitˆ mawng laeˍ yao ga laˍ nae htiˍ hu peunˉ yao htiˍ hu Yeˍsuˆ na naˉ jiˉ. Yeˍsuˆ ha biˍ jiˍ. Htiˍ cheˍ nyiˍ hu hingˉ hkaoˉ veu htiˍ hu mangˉ yaˇ. Ga kawngˉ la hkawˍ veu htuˍ yaˍ laˉ mae cawk yaˍ naeˍ mangˉ yaˇ. Changˉ maˇ yang beu awˍ lawng taemˉ jiˉ lawˉ yaˇ ya siˉ naeˉ. Caˇ, Changˉ mangˉ na ap yao piˍ jiˍ mangˉ na nawˍ naˍ hokˍ ang kla yaˇ. Changˉ hingˉ maˇ baˍ keutˍ ya luiˉ uˉ vaˍ yang saˍ laiˍ ya caeˉ yaˇ maenˍ naeˍ nae yawng na ha biˍ jiˍ.

Yawng caˍ yao ca beu, yang hkaoˍ munˉ yangˍ yuˉ yao ang buinˉ na chiˍ mawng laeˍ jiˍ. Peunˉ na yao, yang hkaoˍ munˉ hingˉ hpaetˍ yao yang ta peˍ uiˍ na piˍ jiˍ. Hkaoˍ munˉ ningˉ ngaˍ ga beu ang to yangˍ ngaˇ. Yuˉ yao caˍ bao nae ha biˍ jiˍ. Kawkˆ hkak hingˉ na muiˉ yang yuˉ yao, ang buinˉ na chiˍ mawng peunˉ yao, yawng na piˍ jiˍ. Yawng hkaˉ hko laˉ hko kawkˆ hkak hingˉ na tangˉ jiˉ. Peunˉ na beu, yang ciˍ jiˍ. Kawkˆ hkak ningˉ ngaˍ ka tiˍ saˉ caˉ ang suiˍ na chaˍ lang naeˉ ga beu siˍ yangˍ ngaˇ. Siˍ ningˍ nga changˉ ang byaˍ saˍ laiˍ hkaˉ naeˉ yangˍ ngaˇ nae ha biˍ jiˍ. Ga nawng na maˉ manˉ nae hkai laˍ naeˍ. Hpaˍcaoˍ beu ang meungˉ hkaoˉ veu makˍ sa pit ang chaˉ ang suiˍ ya tangˉ laeˍ beu tiˍ hkeu ga makˍ sa pit ang chaˉ na htiˍ cangˍ baˍ tangˍ laeˍ laˇ nae ha biˍ jiˍ.

Hiˉ nawngˍ veu, yawng cheuˉ peunˉ yao, Saˍlongˍ miˉ kuingˍ veu lae jiˉ. Haeˉ mae beu, Yeˍsuˆ yawng na ha biˍ jiˍ. Nawng hkaˉ hko laˉ hko ga na chiˉ saˍ laˍ naeˍ. Aˉ mae yao nae baoˇ, soˉ po naeˉ mangˉ na ga tuiˍ saeˍ yao, soˉ htiˍ baˍ uiˍ hpakˍ lang yao htiˍ tawngˍ veu htiˍ mangˍ hpangˉ naeˉ nae, Camˉ lik hkaoˉ veu taemˉ jiˉ. Caˇ, ga siˉ yao teˍ laˉ laeˍ naeˍ hingˉ nawngˍ veu nawng huˍ Gaˍliˉlaeˉ ang meungˉ veu ga lae naeˉ yaˇ nae ha biˍ jiˍ. Haeˉ mae beu, Peˍtruˆ ciˍ jiˍ. Hao hkaˉ hko laˉ hko chiˉ saˍ laˍ yao muiˉ, gaˇ baˍ chiˍ sa laˍ nae Yeˍsuˆ na ha biˍ jiˍ. Yeˍsuˆ maˇ, Ga nawng na maˉ manˉ nae hkai hkaemˍ laˍ vaˍ. Miˉ hkiˍ hya hpaˍ nyiˍ cangˍ baˍ tanˍ ngangˉ beu, naˇ ga na sumˍ cangˍ paek taw laˍ naeˍ nae ha biˍ jiˍ. Peˍtruˆ nawˍ, Nang kawngˉ ga htuˍ yaˍ laˉ mae ya siˉ yao muiˉ, nang na gaˇ baˍ paek laˍ nae Yeˍsuˆ na ciˍ tangˍ kaˍ haengˍ nae ciˍ sangˍ jiˍ. Yawng hkaˉ hko laˉ hko uiˉ muiˉ haeˉ mae ciˍ jiˍ.

Hingˉ nawngˍ veu yawng ngaˍ Geˍtaˍseˍmanˍ nae maengˉ jiˉ hiˉ keung hkeu aeˉ jiˉ. Yeˍsuˆ maˇ, Ga ang buinˉ paˉ yao ca beu, ningˉ keung duingˉ yao ca voˍ nae ta peˍ uiˍ na ha biˍ jiˍ. Peˍtruˆ, Yaˍkok nae Yoˉhanˍ yawng na yang kawngˉ htuˍ yaˍ laˉ mae haoˉ yao aeˉ jiˉ. Yeˍsuˆ yang ya hkamˉ yuˉ naeˉ hingˉ na nuing ba mawng yao, Ga ang hkawˍ laˉ maˇ mawng htaw yao siˉ lanˍ jaˇ. Ningˉ keung sa tiˍ tangˍ nae hawˍ yao ca voˍ nae yawng na ha biˍ jiˍ. Haeˉ mae ciˍ yao, Yeˍsuˆ iˉ yaˍ lae laeˍ yao nuingˉ chaˍ veu bawk ngangˉ yao, Ang nyamˍ ningˍ ang piˉ caeˉ laˍ taw nae baoˉ, Oˇ, ga vangˉ veuˉ, naˇ hkaˉ hko laˉ hko na ang taeng hkiˍ yaˇ. Tuk naeˉ hpan naeˉ kawkˆ hkak ningˉ na piˉ caeˉ lao. Hta yao muiˉ, ga a loˍ laˍ mae baˍ aˍ nae nang a loˍ laˍ mae piˉ hpeuˍ laˉ voˍ nae ang buinˉ paˉ jiˉ. Yang hkeu lui lae beu ta peˍ uiˍ yuˍ nuˍ awngˉ ngangˉ jiˉ na ya myangˉ jiˉ. Siˉmunˍ veuˉ, naˇ yuˍ nuˍ awngˉ ngangˉ yaˇ laˍ. Htiˍ naˍ riˍ nae muiˉ naˇ baˍ hawˍ taw laˍ. Nawng hpawngˍ naeˍ uiˉ hkaoˉ veu baˍ yaˍ aeˉ naeˉ uiˉ saˍ laiˍ ang buinˉ paˉ yao hawˍ bao. Nawng vaˍ siˍ naeˉ uiˉ nuing ba ca yao muiˉ, ang saˍ mangˉ kaˉ seu kaˍ dawˍ naeˍ yaˇ nae yang Peˍtruˆ na ha biˍ jiˍ. Yeˍsuˆ haeˉ mae ciˍ peunˍ yao, kaˉ hu veu lawˉ ang buinˉ paˉ lae laeˍ jiˍ. Yang htiˍ cangˍ lui laeˍ beu muiˉ, ta peˍ uiˍ yuˍ siˍ did did biˍ yao yuˍ nuˍ awngˉ ngangˉ jiˉ na myangˉ lui laeˍ jiˍ. Yeˍsuˆ na aˉ mae jeuˉ hkai laeˍ biˍ ceuˉ nae yawng baˍ bae. Sumˍ cangˍ htiˍ cangˍ Yeˍsuˆ lui laeˍ yao ha biˍ jiˍ. Nawng yuˍ nuˍ nawngˉ ngangˉ yao saoˍ duingˉ ngangˉ suing ngaeˉ laˍ. Nawng saoˍ duingˉ naeˉ ningˉ kangˍ byaˇ. Ga ya tuk ya hpan naeˉ nyamˍ hkeungˉ laˉ byaˇ. Changˉ maˇ naˍ hokˍ ang yaˍ uiˍ laˍ puˍ hkaoˍ veu ap laˍ naeˍ na ya hkamˉ naeˉ. Hta laˉ bao. Aeˉ baiˉ seuˍ. Hu bao. Ga na saˉ caˉ tiˍ chaw nae mangˉ langˉ byaˇ nae ha biˍ jiˍ.

Yang haeˉ mae ciˍ yao ca beu, ta peˍ htiˍ cheˍ nyiˍ hu hingˉ uiˉ hkaoˉ veu Yuˉdaˆ nae maengˉ jiˉ mangˉ laˉ jiˉ. Mya saˍ yao tamˉ hpeˍ uiˍ htamˍ nae changˉ ang muˉ uiˉ muiˉ yang kawngˉ laˉ jiˉ. Changˉ ang muˉ hingˉ uiˉ aˍ yit pa rawˉ hek ang huiˍ uiˍ nae Camˉ lik ang hkiˍ saˍ laˉ uiˉ nae awn hoˉ yaˍ mangˍ uiˍ caiˍ yaˍ laˍ jiˍ changˉ uiˉ yaˇ. Yeˍsuˆ na saˉ caˉ tiˍ chaw yao piˍ naeˍ maˇ, ga hawmˉ naeˉ maˇ Yeˍsuˆ mangˉ yaˇ. Yang na chu yao maenˍ nae suiˍ aeˉ voˍ nae maˍ yao chiˉ htaˍ biˍ jiˍ. Haeˉ mae beu, Yuˉdaˆ htiˍ chitˍ nae laˉ yao Yeˍsuˆ htang veu lae htaeˉ yao, Saˍ laˉ veuˉ, nae ciˍ yao, Yeˍsuˆ na hawmˉ lae jiˉ. Haeˉ mae beu, Yeˍsuˆ na yawng chu kap jiˉ. Hingˉ nyamˍ veu ang htang veu cung yao ca jiˉ hkaoˉ veu htiˍ hu maˇ mya yangˍ sawt taw laeˍ yao yit pa rawˉ hek ang kaeˍ mangˍ beu yaˍ cenˍ htiˍ hu mangˉ na cae yao yang beu laˍ suingˍ yangˍ chae jiˉ. Yeˍsuˆ maˇ, Nawng ngaˍ hkingˍ con na chu naeˉ laˉ mae tamˉ hpeˍ mya htamˍ yao ga na chu laˉ laiˍ la. Ga nawng kawngˉ htuˍ yaˍ laˉ mae cu nuing ca yao, ang buinˉ paˉ kyaˉ cawngˉ ang huiˍ hkaoˍ veu seungˍ maˍ yao muiˉ nawng ngaˍ ga na baˍ chu laˍ. Hta yao muiˉ, Camˉ lik veu lawˉ puing kawˉ laˉ naeˉ yaˇ nae ha biˍ jiˍ. Haeˉ mae yao, ta peˍ uiˍ hkaˉ hko laˉ hko Yeˍsuˆ na chiˉ saˍ yao huinˍ hko jiˉ. Yaˍ hkaˍ htiˍ hu yang ang to veu ang hpaenˉ pawnˍ htiˍ hpeunˍ hkawngˉ nga laeˍ yao, Yeˍsuˆ nawngˍ veu hkeˍ jiˍ. Changˉ uiˉ yang na chu jiˉ. Haeˉ mae beu, yaˍ hkaˍ mangˍ muiˉ ang hpaenˉ hingˉ hae laeˍ saˍ yao ang kaˍ ang tum baˍ tum nae tawngˍ cawnˍ nae huinˍ jiˍ.

Hingˉ nawngˍ veu, Yeˍsuˆ na yit pa rawˉ hek ang kaeˍ kawngˉ suiˍ laengˉ yao, yit pa rawˉ hek ang huiˍ uiˍ, awn hoˉ yaˍ mangˍ nae Camˉ lik ang hkiˍ saˍ laˉ uiˉ laˉ chawnˉ hko lang jiˉ. Peˍtruˆ muiˉ Yeˍsuˆ nawngˍ veu saˉ hkeutˆ nae hkeˍ lae jiˉ. Yit pa rawˉ hek ang kaeˍ beu yumˉ kamˉ htuik yumˉ hkaoˉ langˉ kaw veu hkeˍ jiˍ. Kaˉ ba hawˍ hu uiˉ kawngˉ htuˍ yaˍ laˉ mae miˍ htawˍ lumˉ jiˉ. Yit pa rawˉ hek ang huiˍ uiˍ nae aˉ muˍ tatˉ naeˉ changˉ ang huiˍ uiˍ, Yeˍsuˆ na ya saeˍ naeˍ uiˉ saˍ laiˍ si jiˉ saˉ hkiˉ na saˉ jiˉ. Hta yao muiˉ, yawng ngaˍ aˉ mae uiˉ ang si na muiˉ saˉ yao baˍ myangˍ. Yang awˍ lawng na changˉ uiˉ aˍ baˍ yaˍ baˍ keung nae uiˉ saˉ hkiˉ uiˉ na ciˍ jiˍ. Yawng ciˍ naeˍ hingˉ muiˉ htiˍ hu nae htiˍ hu baˍ chaˍ lang. Haeˉ mae beu, changˉ htiˍ baˍ uiˉ aˍ Yeˍsuˆ kaˉ seu baˍ aˍ nae uiˉ saˉ hkiˉ hkamˉ jiˉ yangˍ, Changˉ niˇ maˇ changˉ laˍ puˍ nae taeng jiˉ ang buinˉ paˉ kyaˉ cawngˉ ang huiˍ hingˍ na hpya kangˍ yao changˉ laˍ puˍ nae baˍ taeng nae uiˉ ang buinˉ paˉ kyaˉ cawngˉ ang huiˍ htiˍ baˍ na sumˍ nuing naiˍ veu chaw naeˉ nae ciˍ naeˍ na gu ya kyaˍ byaˇ nae ciˍ jiˍ. Htaˍ yao muiˉ, yawng saˉ hkiˉ hkamˉ naeˉ hingˉ muiˉ baˍ chaˍ lang. Haeˉ mae beu, yit pa rawˉ hek ang kaeˍ maˇ yawng hu veu hta laˉ yao, Naˇ tiˍ htaeˍ nae muiˉ baˍ tawpˍ laeˍ nae ca ngaeˉ laˍ. Changˉ ningˉ uiˉ ciˍ naeˍ saˉ hkiˉ ningˉ ngaˍ aˉ mae jeuˇ nae Yeˍsuˆ na naˉ jiˉ. Hta yao muiˉ, Yeˍsuˆ kyapˆ nae htiˍ ceuˍ baˍ hkai nae ca jiˉ. Htiˍ cangˍ, yit pa rawˉ hek ang kaeˍ maˇ, Naˇ Hkrit mangˍ la. Naˇ Ang buinˉ huiˍ naeˍ mangˉ Hpaˍcaoˍ beu Ang yaˍ mangˍ la nae naˉ laeˍ jiˍ. Yeˍsuˆ mangˉ muiˉ, Gaˇ uiˉ yaˇ. Changˉ nawˍ Laˍ htiˍ yumˉ suingˉ mangˉ beu laˍ maˍ kaˍ seu duingˉ yao na baˍ upˍ, buingˍ htaˍ veu buingˍ hkaiˍ uiˍ na ta yao lui laeˍ naeˍ na baˍ upˍ, nawng ya myangˉ naeˉ yaˇ nae ha biˍ jiˍ. Haeˉ mae yao, yit pa rawˉ hek ang kaeˍ maˇ yang beu hkaˍ lao hingˉ kuinˍ lakˍ laeˍ yao, Ningˉ htaˍ veu aˉ mae uiˉ saˉ hkiˉ na loˉ laeˍ naeˇ. Ang suingˉ Hpaˍcaoˍ na baˍ saˍ baˍ nyamˍ maˍ manˉ yao ciˍ naeˍ ang tangˍ na nawng muiˉ ya kyaˍ byaˇ. Nawng aˉ mae kuitˆ yehˇ nae ha biˍ jiˍ. Changˉ hkaˉ hko laˉ hko uiˉ Yeˍsuˆ nawˍ siˉ yao ang kuingˉ jaˇ nae aˉ muˍ tatˉ biˍ jiˍ. Haeˉ mae yao, changˉ htiˍ baˍ uiˍ a Yeˍsuˆ na hkanˍ hpitˍ jiˍ. Mae kaˍ veu hpuingˍ kap biˍ yao tuiˍ jiˍ. Hpaˍcaoˍ beu pa rawˉ hpaet laˉ mae taeng lae yao gu na upˍ lao nae ha biˍ jiˍ. Yang na hawˍ hu uiˉ muiˉ Yeˍsuˆ na suiˍ aeˉ yao tuiˍ chuik jiˉ.

Peˍtruˆ hkawngˍ tan awˍ kaˍ seu ca beu, yit pa rawˉ hek ang kaeˍ mangˍ beu yaˍ cenˍ hkaˍ ba yaˍ htiˍ hu manˉ laˉ yao,
Miˍ htawˍ lumˉ yao ca naeˉ Peˍtruˆ na myangˉ beu, yang na hu chawk chawk nga yao, Nang muiˉ Naˍzaˍraet vengˍ changˉ Yeˍsuˆ kawngˉ htuˍ yaˍ lawˉ yaˇ ca saˍ jiˍ nae ha biˍ jiˍ. Hta yao muiˉ, Peˍtruˆ nawˍ, Nang ciˍ naeˍ hingˉ na gaˇ baˍ bae baˍ naˍ hki nae caeˉ yao keunˉ langˉ kaw awngˉ laˍ kyaˍ kaˍ seu aeˉ lae yao hyaˍ hpaˍ tanˉ laˉ jiˉ. Htiˍ cangˍ, yaˍ cenˍ hkaˍ ba yaˍ maˇ Peˍtruˆ na hingˉ keung myangˉ laeˍ yao, ang htang veu cung yao ca naeˉ changˉ uiˉ na, Changˉ niˉ maˇ yawng hkaoˉ veu changˉ uiˉ htiˍ hu yaˇ nae ha biˍ jiˍ. Hta yao muiˉ, Peˍtruˆ htiˍ cangˍ caeˉ laeˍ jiˍ. Hingˉ nawngˍ veu tiˍ hkaoˍ ca laeˍ yao ang htang veu cung yao ca naeˉ changˉ uiˉ muiˉ, Naˇ maˉ manˉ yawng hkaoˉ veu changˉ htiˍ hu yaˇ nae ha biˍ jiˍ. Naˇ Gaˍliˉlaeˉ ang meungˉ changˉ yaˇ nae htiˍ cangˍ Peˍtruˆ na ha biˍ jiˍ. Peˍtruˆ mangˉ muiˉ, yangˉ yang saengˉ jiˉ. Nawng ciˍ naeˍ changˉ hiˉ mangˉ na gaˇ baˍ bae nae caeˉ yao hkamˉ jiˉ. Tiˍ chitˍ nae, nyiˍ cangˍ hya tanˉ laˉ jiˉ. Haeˉ mae beu, Peˍtruˆ nawˍ, Hya nyiˍ cangˍ baˍ tanˍ ngangˉ beu naˇ ga na sumˍ cangˍ baˍ bae nae caeˉ laˍ naeˍ nae Yeˍsuˆ ha biˍ jiˍ hingˉ na kuitˆ puiˉ laeˍ yao baˍ otˍ ka nae ungˉ jiˉ.

Escuchar a Maˍkuˆ 14