Библия пэ влахицко романи шыб

© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Исусо, пхэрдярдо Свэнтонэ Духоса, авиля лэ Иорданостар и андярдо сас лэ Духоса андэ мал. Котэ Лэс саранда дес зумавэлас Бэнг. Всавори кадья вряма Исусо нисо на халас. И сар прожыле кала деса, Лэсти фартэ закамляпэ тэ хал. Бэнг пхэндя Лэсти:
— Сар ту Дэвлэско Шаво, пхэн калэ барэсти тэ терэлпэ марнэса.
Исусо пхэндя лэсти:
— Пистросардо, со на екхэ марнэса авэла тэ жувэл мануш.
Тунчи Бэнг вазгля Лэс по баро плай и сыго сикадя Лэсти всаворэ тхагарима пхувьятирэ. И пхэндя Лэсти:
— Мэ пэрэдава Тути всаворо баримос и слава калэ тхагаримастирэ. Када вся отдино манди, и касти закамава, колэсти и дава лэн. Сар Ту тэлёса манди, тунчи када вся авэла тиро.
Исусо пхэндя лэсти:
— Запистросардо: «Тэлюв Рае, Дэвлэсти тирэсти, качи Лэсти ав бутярнэса».
Тунчи Бэнг андярда лэ Исусос андо Иерусалимо, тховдя пэ майучё тхан храмоско и пхэндя:
— Сар ту Шаво Дэвлэско, хук катар тэлэ. Важ кода со пистросардо: «Пэстирэ ангелонэнди пала тутэ припхэнэла, кай онэ тэ дикхэн пала Тутэ. Пэ васт андярэна тут, кай тэ на арэсэспэ тирэ пэрнэса андо бар».
Исусо пхэндя лэсти:
— Кадя пхэндо: «На зумав лэ Рае Дэвлэс пэстирэс».
Тунчи Бэнг пэрэашыля тэ зумавэл Исусос и отжыля Лэстар пэ вряма.

Исусо рисайля андэ Галилея, пхэрдо зораса Духостиряса. Дума пала Лэстэ разжыляпэ пав всавори кодья пхув. Вов ситярэлас андэ синагоги, и всаворэ лашарэнас Лэс.

Исусо авиля андо Назарето, кай выбариля, и андэ субота, сар Вов всавори вряма терэлас, зажыля андэ синагога и вщиля тэ бинэл. Лэсти подинэ лил, саво запистросардя пророко Исая. Вов отпхэрнадя лил и аракхля тхан, кай сас запистросардо:
«Духо лэ Рае Дэвлэско пэр Мандэ,
важ кода со Вов помакхля Ман
тэ роспхэнав Радосаво Лав чёрорэнди.
Вов бишалдя Ман тэ роспхэнав спханглэнди,
со онэ авэна роспханглэ,
корэнди, со онэ авэна тэ дикхэн,
тэ отмэкав колэн, савэ грыжонпэ, пэ воля,
тэ роспхэнав, кай авиля вряма лащи Рае Дэвлэстири».
Исусо запхандадя лил, отдя бутярнэсти и бэшля. Всаворэ андэ синагога дикхэнас пэр Лэстэ. И Вов ля тэ пхэнэл лэнди:
— Адес, тердэпэ кола запистросардэ лава, савэ тумэ икхатар ашундэ.
Всаворэ лашарэнас Лэс, дивосавэнас Лэстирэ лашэ лавэнди и пушэнас:
— Дикхэнтэ, на Иосифоско када шаво?
Вов пхэндя лэнди:
— Акэ, тумэ пхэнэна манди дума: «Врачё! Састяр ежэно пэс». И пхэнэна манди: «Амэ ашундэ, со Ту тердян андо Капернаумо. Стер кадя ж и катэ, кай Ту барилян». Пхэнав тумэнди чячимаса: нисавэ пророкос на прилэн котэ, кай вов бариля. Чячимаса пхэнав тумэнди: андэ вряма, кала сас о Илия, сар на сас трин бэрш епашэса брышынд пай всавори кодья пхув, и сас баро бокхалимос, андо Израилё сас бут пхивлэ жувля. Но на екхатэ лэндар на сас бишалдо Илия, а качи кай пхивли андэ Сарепта Сидоноско. Бут сас насвалэ проказаса андо Израилё, кала сас пророко Елисеё, и ни екх лэндар на жужардиля, качи Неемано сирийцо.
Всаворэ андэ синагога фартэ холяйле, сар ашундэ када. Онэ линэ и выцырдэ Лэс андав форо, и андярдэ по баро плай, кай сас тердо лэнго форо, кай тэ сшон котар Лэс тэлэ. Но Вов прожыля машкар лэндэ тай ужыля.

Исусо жыля андо галилейско форо Капернаумо и сытярэлас андэ суботни деса. И дивосавэнас Лэстирэ сытяримасти, колэсти со андо лав Лэско сас бари зор. Сас андэ синагога мануш, андэ лэстэ сас духо найжужэ бэнгэско, и вов зацыписайля фартэ:
— Эй, со тути амэндар трэбуй, Исусо андав Назарето? Ту авилян тэ умарэс амэн? Мэ жанав, ко Ту! Ту Свэнто Дэвлэско!
— Ашмулком! — припхэндя лэсти Исусо. — Выжа андар лэстэ!
Бэнг шута манушэс машкар синагога и выжыля андар лэстэ. И на тердя лэсти ни сави бида. Всаворэ дарайле и дэнас дума машкар пэстэ:
— Со када кацаво? Вов баримаса и зораса припхэнэл найжужэ духонэнди, и онэ выжан!
Дума пала Лэстэ розжыляпэ пав всавори кодья пхув.

Исусо выжыля андай синагога и зажыля андо чер Симоноско. Кай ромни Симоностири сас насвали дэй, всавори пхаболас, и мангэнас Лэс кай Вов варисо тэ терэл. Вов поджыля латэ, запхэндя насвалимасти, и насвалимос ужыля. Вой андэ кодья вряма вщиля и ля тэ подэл пэ мэсали.
Кала бэшэлас кхам, всаворэ, кастэ сас насвалэ, линэ тэ андярэн лэн кав Иисусо. Вов тховэлас пэ кажно васт и састярэлас лэн. Бэнга выжанас манушэндар и цыпинас:
— Ту — Шаво Дэвлэско!
А Вов запхэнэлас лэнди тэ пхэнэн, колэстар со онэ жанэнас, со Вов — Христосо.

Сар авиля дес, Вов выжыля андав форо и жыля андэ мал. Мануша линэ тэ родэн Лэс, и кала аракхле, мангэнас Лэс, соб Вов тэ ашэлпэ лэнца. Но Вов пхэндя лэнди:
— Манди трэбуй тэ роспхэнав Радосаво Лав палав Тхагаримос Дэвлэско и андэ авэр фороря. Пэ када Мэ бишалдо.
И Вов пхэнэлас лав андэ синагоги Иудеятирэ.

Escuchar a Лукастар 4