Genesis 22
22
Aburahamu nalakwa okhumala Isaka abe omusango
1Kho inyuma wamakhuwa ako Nyasaye namuteema Aburahamu, namusunjila ari Aburahamu; naye nafuchila mbu Endiho. 2Naboola ari Obukule bulaano omwanawo oyo, omwanawo omuteelwa, owa oheelanga, Isaka, otsie mushibala shiaMoria; omumalileyo abe omusango omusambe mushikulu shindi eshia ndakhakhuboolelekhwo. 3Aburahamu nahuuna mumabwibwi, niyaala eshiokhwikhalakhwo khusishiliye, natsia nende abasoliilibe babili, halala nende Isaka omwanawe; niyaasiachile tsikhwi tsiomusango kwenokwo okwokhusambwa, narula natsia habundu aha Nyasaye yali namubooleele. 4Khunyanga yakhataru Aburahamu nachinguula tsimoni nalola habundu tsana nihashili ehalekhwo. 5Aburahamu nabasunjila abasooliilibe mbu Mwikhale hano nende isishili, nasi nende omuyia khutsiekhwo hambeli halia; nakhwinamile Nyasaye, ne khulakalukha khandi. 6Aburahamu nabukula tsikhwi etsio tsiomusango okwokhusambwa natuukha Isaka omwanawe; omwene nabukula mumukhonokwe omulilo nende omubano; mana nibatsia bosi babili halala. 7Isaka namusunjila Aburahamu samwana ari Papa; naye nafuchila mbu Endiho, omwana wanje. Naboola mbu Lola, omulilo ngwokuno, khandi nende tsikhwi nzietsino; ne likondi liomusango omusambe lili heena? 8Aburahamu nasunga ari Nyasaye omwene aleenyoolela likondi liomusango omusambe, omwana wanje; kho nibatsiililila bosi babili halala.
9Kho niboola hatsana aha Nyasaye yali niyamubooleele; Aburahamu niyoombakhaho eshimalilo shiemisango, niyaanzakhwo tsikhwi, naboha Isaka omwanawe, namwalisia khushimalilo shiemisango hekulu, khukhwi. 10Mana Aburahamu nanyiila omukhonokwe nabukula omubano mbu amusinze omwanawe. 11Mana malaika w ewa yali mwikulu namulanga Aburahamu, naboola mbu Aburahamu, Aburahamu; naye nafuchila ari Endiho. 12Nasunga ari Oramuusiakhwo omuyia omukhonokwo, kata okhumukholelakhwo likhuwa ta; okhuba bulaano emalile okhumanya shinga olwa omuriitsanga Nyasaye, shichila shiunyimile omwanawo oyo, ta. 13Mana Aburahamu nachinguula tsimoni nahenga, ne lola, munyumawe limiiku ndielo, nilitiililwe tsinzika mushitsakha; kho Aburahamu natsia nabukula limiiku, nalimala libe omusango omusambe mushilenje shiomwanawe. 14Aburahamu nakulikha eliira liahabundu tsana mbu Yahweh-yire; shinga olwa basunganga kata okhuula olwa leelo, mbu Mushikulu shiOMWAMI shilanyoolekha.
15Mana malaika wOMWAMI namulanga Aburahamu olwakhabili okhurula mwikulu, 16naboola mbu OMWAMI asunga ari Nditsubile khwisie omwene, mbu olwa okholile likhuwa lino, noranyimakhwo omwanawo oyo, omwanawo omuteelwa, ta; 17mbu okhuhaana ikhabi, ndalakhuheelesia iwe ikhabi, khandi okhwinjiyia ndaleenjiyia olwibulolwo shinga tsinyininyini etsiomwikulu, kata shinga omuyeshe okwokhulukuku Iweinyanza; ne olwibulolwo nalwo luliruka ebilibwa biabasuku babwe; 18khandi mulwibulolwo nimwo omwa amahanga kosi keshibala kalhlyoolelamwo ikhabi; okhuba ohuliile omwoyo kwanje. 19Kho Aburahamu nakalukha ewa abasooliili bali, nibarula nibatsia halala okhuula eBeeri-sheba; Aburahamu namenyayo eBeeri-sheba.
Tsinzibulo tsiaNahori
20Mana inyuma wamakhuwa ako Aburahamu yaboolelwa ari Lola, Milika mukha Nahori omwana weenywe naye yesi yeebula abaana; 21mbabano, mbu Uzi nomwana wambeli, Buzi omwana wabwe, nende Kemueli samwana Aramu; 22Khesedi, Hazo, Pilidashi, Yidilafu, nende Betsueli. 23Naye Betsueli niyeebula Rebeka; abo munaane nibo aba Milika mukha Nahori omwana wabwe Aburahamu yeebula. 24Khandi nende omusuriawe, oweliiralie mbu Reuma, yesi niyeebula Teba, Gahamu, Tahashi, nende Maaka.
Actualmente seleccionado:
Genesis 22: OUV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Oluluyia Union Version © Bible Society of Kenya 1975