Genesis 21
21
Okhwibulwa khwalsaka
1OMWAMI yakoonya Sara shinga olwa yali niyasunga, OMWAMI namukholela Sara shinga olwa yali niyaboola. 2Sara nahela inda, niyeebula omwana omusiani, olwa Aburahamu yali nali omukofu, khunduukho eya Nyasaye yali niyamuboolela. 3Aburahamu nakulikha omwanawe owa yeebula, owa Sara yeebula, eliira mbu Isaka. 4Aburahamu namusheba omwanawe Isaka olwa yali namalile tsindaalo munaane, shinga olwa Nyasaye yali niyamulaka. 5Ne Aburahamu yali owemiyika eshikhumi olwa yeebula omwanawe Isaka. 6Sara nasunga ari Nyasaye yambeelesiye okhutsekha; buli mundu yesi ouhulila alatsekhanga halala ninasi. 7Khandi ari Niwina owakhasunjiile Aburahamu mbu Sara yakhanuunia abaana? Okhuba emwibuliile omwana omusiani mubukofubwe.
Aburahamu yaseebula Hagari naIshimaeli
8Omwana naye nakhula, naleshesibwa okhunuuna; Aburahamu naye nakasia lisabo likhongo khunyanga eyo olwa Isaka yaleshesibwa okhunuuna. 9Sara nalola omwana waHagari omuMisiri, owa yeebulila Aburahamu, natseshelelanga. 10Khulwako naboolela Aburahamu mbu Yilusia omukholi uno nende omwanawe; okhuba omwana womukholi uno shialilaamilwa obulaame halala nende omwana wanje, Isaka uno, tawe. 11Ne likhuwa elo niliba lisiro muno imbeli waAburahamu, khulwa omwanawe. 12Ne Nyasaye nasunjila Aburahamu mbu Lileshe okhuba lisiro imbeliwo khulwa omuyia oyo, khandi khulwa omukholiwo; rechelesia omwoyo kwaSara mumakhuwa kosi aka akhusunjila; okhuba olwibulolwo lulikulishilwa muIsaka. 13Khandi omwana womukholi yesi ndalamukhola lihanga, shichila nolwibulolwo. 14Mana Aburahamu nahuuna mumabwibwi tsi, nabukula omukaate nende amatsi mushimuka, naheelesia Hagari namureela khwibeka, nende omwana, namuseebula; naye natsia natiimatiima mushitsiimi shiaBeeri-sheba.
15Mana amatsi akali mushimuka nikahwa, naye niyeebala omwana hasi mushitsakha shindi. 16Natsia niyeekhala ahahengaane nende omwana, ehalekhwo ninaye shinga aha omundu anyala okhulasa eshisele; okhuba yapaara mbu Endeshe okhulola okhufwa khwomwana. Niyeekhala ahahengana ninaye, nachinga omwoyo nalila. 17Nyasaye nahulila omwoyo kwomuyia; malaika waNyasaye ewa yali mwikulu namulanga Hagari, namusunjila ari Obeele orie, Hagari? Oraria ta; okhuba Nyasaye nhuliile omwoyo kwomuyia aha ali yaho. 18Sinjila obukule omuyia, omutiile mumukhonokwo; shichila ndilimukhola lihanga likhongo. 19Nyasaye namulafia tsimoni, nalola liyabo liamatsi; natsia, niyeetsusia amatsi mushimuka tsana, nanyweesia omuyia. 20Nyasaye naba halala nende omuyia, naye nakhula; namenya mushitsiimi, naba omulasi wobuyingo. 21Namenya mushitsiimi shieParani; naye nyinamwana namukhweesia omukhasi owomushialo shiaMisiri.
Indakano yaAburahamu naAbimelekhu
22Mana mundaalo tsienetsio Abimelekhu nende Fikoli omuseesia welihelie nibasunjila Aburahamu bari Nyasaye abeetsanga ninawe halala mukosi aka okholanga; 23kho bulaano unditsubile hano khuNyasaye mbu shiolikholelakhwo akobukaatii ta, isie, kata nende omwana wanje, kata nende omwitsukhulu wanje; ne khulwa tsimbabasi etsia ndakhukholeele, nawe olikholela orio isie nende eshialo eshia obeelenjemwo shinga omucheni. 24Aburahamu nasunga ari Ee, ndaleetsuba.
25Ne Aburahamu yachesiyia Abimelekhu khumakhuwa keliyabo liamatsi elia abasumba baAbimelekhu bali nibamunuulile. 26Abimelekhu naboola mbu Isie shimanyilekhwo niwina oukholile likhuwa lino ta; kata shiwayambooleelekhwo, kata isie okhuhulilakhwo tawe, habula bulaano buno. 27Aburahamu nabukula amakondi nende tsing'ombe naheelesia Abimelekhu; mana nibalia omuuma bombi babili. 28Ne Aburahamu nara ebimeeme biamakondi ebisibini musaafu elubeka bionyene. 29Abimelekhu namureeba Aburahamu mbu Nebiashiina ebimeeme bino musaafu ebisibini ebia oreele bionyene? 30Naye nakalusia mbu Ebimeeme bino musaafu ebisibini, obibukule mumukhono kwanje, mbu bibe ebioburumbusi khwisie, shinga olwa ndali isie owayaba liyabo lino. 31Khulwa akeenako nakulikha habundu yaho eliira mbu Beeri-sheba; shichila mbu beetsubilanaho bombi babili. 32Kho nibalia omuuma habwene yaho eBeeri-sheba, kho Abimelekhu narula, nende Fikolil omuseesia welihelie, nibakalukhayo mushibala shiabaFilisiti. 33Aburahamu naraakaho omusaala kwomukomoli eBeeri-sheba, niyeekayakayilaho khuliira liOMWAMI Nyasaye wobumeli. 34Aburahamu namenyayo shinga omucheni mushibala shiabaFilisiti tsindaalo tsinyinji.
Actualmente seleccionado:
Genesis 21: OUV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Oluluyia Union Version © Bible Society of Kenya 1975