Genesis 18
18
Obusuubisie bwaNyasaye, mbu Isaka yakheebulwa
1OMWAMI namuloleshela ahambi nende emiruba chieMamure, olwa yali niyeekhaale mumuliango weliheema mushise shiomubasu omunji kweshiteere; 2nachinguula tsimonitsie nahenga, ne lola, abasaatsa bataru mbabo, nibasinjiile imbeliwe; nolwa yabalola yarula mumuliango kweliheema natsia tsimbilo okhubaakaanila, niyeenama hasi, 3nasunga mbu Omwami, nimba ninyoolile obukoosia mumonitsio, chama orambirakhwo isie omusumbawo tawe; 4chama amatsi kaleerwe, mwiyosie ebilenje, nimuhuluukha mumusaala kuno; 5nasi ndalaleerakhwo eshiliibwa eshitiiti, munyoole amaani; kho mana mutsie; okhuba mwitsile ewomusumba weenywe. Nabo nibasumga bari Khola orio, shinga olwa osunjile. 6Aburahamu niyeenjila bwangu mwiheema ewa Sara yali, namusunjila ari Kasia bwangu emichelo chitaru chiobusie obunyushe, onyoobe, oteeshe emikaate. 7Aburahamu natsia tsimbilo mubiayo niyeendamwo eshimoosi shieinyama indoro indayi namuheelesia omukhalabani; naye niyaanguyilisia okhushikasia. 8Nabukula amabeele ketsikubuli khandi nende amabeele amayiu, nende inyama yeshimoosi eshia yali niyakhakasia, narenjekha imbeli wabwe; naye omwene nasinjila ahambi ninabo mumusaala, nabo nibalia.
9Kho nibamureeba mbu Omukhasiwo Sara ali heena? Naye nasunga ari Ngwowulia, mwiheema. 10Naye naboola mbu Toto isie ndilikhukalushila olwa eshise shiliula; ne lola, Sara omukhasiwo aliba nende omwana omusiani. Ne Sara yahulila, nali inyumawe mumuliango weliheema. 11Ne Aburahamu nende Sara bali nibakofuule, khandi nibayindiile emiyika eminji; khandi kali nikaleshile okhwikhola khuSara shinga eshiima shiabakhasi olwa shili. 12Kho Sara natsekha omwene yenyene, ari Nasi olwa emalile okhukofula, kho ndakhanyoole obusangaali, omwami wanje naye nali omusaakhulu? 13OMWAMI namusunjila Aburahamu mbu Nishiina eshichila Sara natsekha, ari Nasi ndakheebule omwana toto, nindi omushiele? 14Liliho likhuwa liosi litinyu eliakhamukhaya OMWAMI? Khunduukho eyo ndilikhukalushila, eshise nishiulile; naye Sara aliba nende omwana omusiani. 15Mana Sara niyeeyambakhana, ari Shinzeshilekhwo tawe; shichila yaria. Naye nasunga mbu Tawe; otseshile.
Aburahamu yasabila Sodomu
16Kho abasaatsa abo nibabuukha aha bali, nibahenjia tsimoni tsiabwe eSodomu; Aburahamu naye nachenda ninabo nabakooba. 17OMWAMI nasunga ari Mana emubise Aburahamu aka enzitsa okhukhola, 18olwa Aburahamu aliba lihanga likhongo liamaani, khandi mbu amahanga kosi keshibala kalinyoola ikhabi muye, nohomba? 19Okhuba emumanyile, mbu mana aruchenje abaanabe nende abomwitaalalie inyumawe, mbu balinde injila yOMWAMI, okhukhola akobulunji nende akobuyaasii, mbu mana OMWAMI amuleerela Aburahamu ako aka yasunga khuye. 20OMWAMI nasunga mbu Okhuba tsimbungu tsiaSodomu nende Gomora netsikhongo muno, khandi okhuba obwonooni bwabwe nobubii muno; 21kho ndalakholomokhayo bulaano, endole nibaba nibakholile toto shinga amalilo kabwe olwa kali akanzitsiile; ne nikarali kario ta, khandi emanye.
22Abasaatsa abo nibashiukhana okhurula yaho nibachooma khulubeka IweSodomu; ne Aburahamu yali nashisinjiile imbeli wOMWAMI. 23Aburahamu nasita ahambi, nasunga mbu Wakhasisia abalunji halala nende abamayaanu? 24Haundi bakhabamwo abalunji amakhumi karaano mwitookho; wakhasisia oburahonia litaala elo tawe khulwabo abalunji amakhumi karaano abalimwo? 25Ako shikanyalikha khwiwe ta, mbu okhwira abalunji halala nende abamayaanu, mbu mana abalunji babe abalala nende abamayaanu, ako shikanyalikha khwiwe ta; mbula, Omuyaasii weshialo shiosi shialakhola akali habwene? 26OMWAMI naboola mbu Nimba ninyoola muSodomu abandu abalunji amakhumi karaano mwitaala, kho ndalalekha habundu yaho hosi khulwabwe. 27Aburahamu namukalusia, nasunga ari Kho bulaano enjaachile okhusungana nende Omwami, olwa endi olufu butswa nende likoshe; 28haundi bakhalemakhwo baraano khumakhumi karaano abalunji; wakhamulula litaala liosi khulwa okhulema baraano? Naye nasunga mbu Shindalalimulula tawe, nimba ninyoolayo amakhumi kane nabaraano. 29Khandi namuboolela ari Haundi bakhanyoolekhamwo amakhumi kane. Naye nasunga ari Shindalakholakhwo khulwabo amakhumi kane tawe. 30Khandi naboola mbu Omwami arasinyishila ta, ndalasungakhwo; haundi bakhanyoolekhamwo amakhumi kataru. Naye nasunga ari Shindalakholakhwo nimba ninyoolayo amakhumi kataru ta. 31Naye naboola ari Kho bulaano enjaachile okhusungana nende Omwami; haundi bakhanyoolekha amakhumi kabili. Naye naboola mbu Shindalalimulula tawe khulwabo amakhumi kabili. 32Nasunga mbu Omwami arasinyishila ta, ndalasunga khandi lulala lwonyene; haundi ekhumi bakhanyoolekhamwo. Naye ari Shindalalimulula khulwabo ekhumi tawe. 33Mana OMWAMI natsia, olwa yali namalile okhuboolana nende Aburahamu; naye Aburahamu nakalukha natsia ewuwe.
Actualmente seleccionado:
Genesis 18: OUV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Oluluyia Union Version © Bible Society of Kenya 1975