Psalms 33
33
1ဖြောင့်မတ်သောသူအပေါင်းတို့၊ သင်တို့သည် ဘုရားရှင်ပြုတော်မူသော အမှုတော်အတွက် ဝမ်းမြောက်စွာကြွေးကြော်ကြလော့။ ကိုယ်တော်၏စကားကို နားထောင်သူအပေါင်းတို့ ကိုယ်တော်အား ချီးမွမ်းကြလော့။ 2စောင်းကိုတီး၍ ဘုရားရှင်၏ကျေးဇူးတော်ကို ချီးမွမ်းကြလော့ ကြိုးဆယ်ချောင်းတပ် တူရိယာဖြင့် ရှေ့တော်၌ သီဆိုချီးမွမ်းကြလော့ 3ရှေ့တော်၌ သီချင်းသစ်ကို သီဆိုကြလော့။ သာယာစွာဖြင့် စောင်းကိုတီးကြလော့။ ဝမ်းမြောက်စွာကြွေးကြော်ကြလော့။ 4အကြောင်းမူကား ဘုရားရှင်၏နှုတ်ကပတ်တော်သည် မှန်ကန်ပေ၏။ ကိုယ်တော်ပြုတော်မူသည့် အမှုအရာတို့သည်လည်း သစ္စာတရားနှင့်ကိုက်ညီ၏။ 5ဘုရားရှင်သည် ဖြောင့်မတ်မှန်ကန်မှုကို နှစ်သက်တော်မူ၏။ ကိုယ်တော်၏ ခိုင်မြဲသောမေတ္တာတော်သည် ကမ္ဘာမြေကြီးအား ဖုံးလွှမ်းလျက်ရှိ၏။ 6ဘုရားရှင်သည် အမိန့်တော်ဖြင့် မိုးကောင်းကင်ကိုလည်းကောင်း၊ နေ၊ လနှင့် ကြယ်တာရာများကို ဖန်ဆင်းတော်မူ၏။ 7ပင်လယ်တွင်ရှိသမျှအရာတို့ကို တစ်နေရာတည်းတွင် စုဝေးစေတော်မူ၏။ နက်ရှိုင်းသော သမုဒ္ဒရာများမှရေများကို သိုလှောင်ခန်းများတွင် သိမ်းဆည်းထားတော်မူ၏။ 8ကမ္ဘာလောကသားအပေါင်းတို့သည် ဘုရားရှင်ကို ကြောက်ရွံ့ကြပါစေ။ ကမ္ဘာလောက၌ နေထိုင်ကြသူအပေါင်းတို့သည် ကိုယ်တော်ကို ကြောက်ရွံ့ရိုသေကြပါစေ။ 9အကြောင်းမူကား ကိုယ်တော်မြွက်ဆိုသည့်အခါ မြွက်ဆိုသည့်အတိုင်း ဖြစ်တော်မူ၏။ ကိုယ်တော်အမိန့်ပေးသည့်အခါတွင်လည်း ထိုအမိန့်အတိုင်း တည်လျက်ရှိ၏။ 10ဘုရားရှင်သည် တိုင်းနိုင်ငံတို့၏ အကြံအစည်များအားပယ်ဖျက်၍ လူတို့၏အကြံအစည်များကိုလည်း ဟန့်တားတော်မူ၏။ 11ဘုရားရှင်အကြံအစည်သည် အစဉ်အမြဲတည်၍ ကိုယ်တော်၏စိတ်နှလုံးအကြံအစည်တို့သည် မျိုးဆက်အစဉ်အဆက်တည်၏။ 12ဘုရားရှင်အား မိမိ၏ဘုရားအဖြစ် ကိုးကွယ်သောလူမျိုးသည် မင်္ဂလာရှိ၏။ ကိုယ်တော်၏လူမျိုးတော်အဖြစ် ရွေးချယ်တော်မူခြင်းကိုခံရသောလူတို့သည် မင်္ဂလာရှိကြ၏။ 13ဘုရားရှင်သည် ရွှေမြို့တော်မှ ငုံ့၍ကြည့်တော်မူရာ လူသားအပေါင်းတို့အား မြင်တော်မူ၏။ 14ကိုယ်တော်သည် ကမ္ဘာလောကတွင်နေထိုင်ကြသူအပေါင်းတို့အား မိမိစံပယ်အရပ်မှ ကြည့်ရှုတော်မူ၏။ 15ကိုယ်တော်သည် သူတို့၏စိတ်နှလုံးများကို ဖန်ဆင်းတော်မူသော အရှင်ဖြစ်တော်မူသဖြင့် သူတို့ပြုသောအမှုအားလုံးတို့ကို သိရှိနားလည်တော်မူ၏။ 16ရှင်ဘုရင်သည် စစ်သည်အလုံးအရင်းကြောင့် စစ်ပွဲတွင်အနိုင်ရသည်မဟုတ်။ စစ်သူရဲကောင်းသည်လည်း မိမိ၏ခွန်အားဗလကြောင့် အနိုင်ရသည်မဟုတ် 17စစ်မြင်းတို့သည် အောင်ပွဲရမှုအတွက် အသုံးမဝင်ကြပေ။ သူတို့၏ကြီးမားသောခွန်အားကလည်း သူတို့အား မကယ်တင်နိုင်ပေ။ 18ဘုရားရှင်သည် မိမိအား ကြောက်ရွံ့ရိုသေသော၊ မိမိ၏ခိုင်မြဲသောမေတ္တာတော်ကို ယုံကြည်ကိုးစားသူတို့အား ကြည့်ရှုစောင့်ရှောက်တော်မူ၏။ 19ကိုယ်တော်သည် ထိုသူတို့အား သေဘေးမှ ကယ်တင်တော်မူ၏။ ငတ်မွတ်ခေါင်းပါးရာ ကာလများ၌လည်း ထိုသူတို့အား အသက်ရှင်နိုင်ခွင့်ကို ပေးတော်မူ၏။ 20အကျွန်ုပ်တို့သည် ဘုရားရှင်အား စောင့်မျှော်နေကြ၏။ ကိုယ်တော်သည် အကျွန်ုပ်တို့အား ကူညီမစတော်မူ၍ ကွယ်ကာစောင့်ရှောက်တော်မူ၏။ 21အကြောင်းမူကား အကျွန်ုပ်တို့သည် ကိုယ်တော်၏ သန့်ရှင်းမြင့်မြတ်သော နာမတော်ကို ယုံကြည်ကိုးစားကြသောကြောင့် အကျွန်ုပ်တို့၏စိတ်နှလုံးသည် ကိုယ်တော်အားဖြင့် ရွှင်လန်းဝမ်းမြောက်ကြရ၏။ 22ကိုယ်တော်၏ မေတ္တာကရုဏာတော်သည် အကျွန်ုပ်တို့အပေါ် သက်ရောက်ပါစေ။
Actualmente seleccionado:
Psalms 33: TPV-RV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.