Levitico 6
6
1Ang#Num. 5:5-8. Ginoo naghatag sining masunod nga mga sugo kay Moises: 2“Ang isa ka halad pagahimuon kon ang bisan sin-o makasala batok sa akon, tungod sa iya pagpamalibad sa pagbalik sang ginbilin sang iya kapareho nga Israelinhon agod ipatago sa iya, ukon sa iya pagpangawat, ukon pagdaya niya sa iya, 3ukon sa iya pagbinutig nahanungod sang isa ka butang nga nadula, kag pagsumpa nga wala niya ini makita. 4-5Kon ang isa ka tawo makahimo sang bisan ano lang sini nga mga sala, dapat sia magbayad sang bisan ano nga iya nakuha paagi sa dinaya. Sa tion nga masapwan sia sang iya paglapas, kinahanglan bayaran niya sing bug-os ang tag-iya, kag magadugang sia sing baynte porsiento. 6Magadala sia sa pari sing isa ka karnero ukon kanding nga lalaki nga wala sing bisan ano nga depekto, subong iya halad nga bayad sa akon. Pabilihan ini suno sa opisyal nga talaksan. 7Ang pari magadulot sing halad para sa sala sang amo nga tawo, kag pagapatawaron ko sia.”
Mga Halad nga Ginsunog sing Bug-os
8Ang Ginoo nagsugo kay Moises: 9“Ihatag kay Aaron kag sa iya mga anak nga lalaki ang masunod nga mga pagsulondan para sa mga halad nga sinunog. Ang halad nga sinunog ibilin sa ibabaw sang gatong sa altar sa bug-os nga gab-i, kag padayunon sa pagpadabdab ang kalayo sini. 10Dayon ang pari nga nagasuksok sang iya sutana nga lino kag karsonsilyo nga lino, magakuha sang abo nga nabulit sang tambok nga nabilin sa ibabaw sang altar kag ibutang niya ini sa kilid sang altar. 11Dayon magailis sia sang iya bayu kag dalhon niya ang mga abo sa gwa sang kampo sa isa ka lugar nga matinlo. 12Ang kalayo sa altar dapat padayunon sa pagpadabdab kag indi gid pagpabay-an nga mapalong. Kada aga gatungan ini sang pari, ipahamtang sing pasunod sa ibabaw sini ang halad nga sinunog, kag sunogon ang sapay sang halad sa paghiambit. 13Ang kalayo kinahanglan padayunon sa pagpadabdab sa altar kag indi pagpabay-an nga mapalong.
Mga Halad nga Kalan-on nga Nahimo sa Uyas
14“Amo ini ang masunod nga mga pagsulondan para sa mga halad nga kalan-on. Ang isa ka pari nga kaliwat ni Aaron magadulot sa akon sang halad nga kalan-on sa atubangan sang altar. 15Dayon magakuha sia sang isa ka hakop sang pinili nga harina kag lana, kag ang tanan nga insyenso nga yara sa halad, kag sunogon ini sa altar subong isa ka tanda nga ini tanan nahalad sa akon. Ang kahumot sini nga halad manginkahalamut-an sa akon. 16Ang mga pari magakaon sang nabilin sini. Himuon ini nga tinapay nga wala sing lebadora kag kaunon sa balaan nga duog, sa pasiyuhan sang Tolda sang akon presensya. 17Lutoon ini nga wala sing lebadora. Ako naghatag sini sa mga pari subong ila bahin sang mga halad nga kalan-on. Tama ini ka balaan, pareho sang mga halad tungod sa sala kag sang mga halad nga bayad. 18Sa tanan nga panahon nga palaabuton, ang bisan sin-o nga mga kaliwat nga lalaki ni Aaron sarang makakaon sini subong ila bahin sa gihapon sang kalan-on nga ginhalad sa akon. Ang bisan sin-o nga makatandog sang halad nga kalan-on mahalitan tungod sang gahom sang pagkabalaan sini.”
19Ang Ginoo naghatag sang masunod nga mga pagsulondan kay Moises: 20“Sa adlaw nga ordinan si Aaron kag ang iya mga kaliwat, magadulot sia subong iya halad sa akon sing duha ka libra sang pinili nga harina, pareho kadamo sang adlaw-adlaw nga halad nga kalan-on, ang katunga sa aga kag ang katunga sa gab-i. 21Samuan ini sing lana kag lutoon sa isa ka sartin kag dayon pudporon niya kag idulot sa akon subong isa ka halad nga kalan-on. Ang iya kahamot sini manginkahalamut-an sa akon. 22Ini nga halad pagahimuon sa tanan nga panahon nga palaabuton sang tagsa ka kaliwat ni Aaron nga nagaalagad subong Pinakamataas nga Pari. Pagasunogon ini sing bug-os subong isa ka halad sa akon. 23Wala sing bahin sang halad nga kalan-on nga ginadulot sang isa ka pari nga pagakaunon, kundi pagasunogon ini sing bug-os.”
Ang mga Halad tungod sa Sala
24Ang Ginoo nagsugo kay Moises: 25“Ihambal kay Aaron kag sa iya mga anak nga lalaki ang masunod nga mga pagsulondan para sa mga halad tungod sa sala. Ang sapat nga para sa halad tungod sa sala pagaihawon sa naaminhan nga kilid sang altar, sa diin ginaihaw ang mga sapat para sa mga halad nga sinunog. Tama ini ka balaan nga halad. 26Ang pari nga nagahalad sini nga sapat magakaon sini sa isa ka balaan nga duog, sa pasiyuhan sang Tolda sang akon presensya. 27Ang bisan sin-o ukon ang bisan ano nga makatandog sang unod sang sapat mahalitan tungod sang gahom sang pagkabalaan sini. Ang bisan ano nga panapton nga naagsikan sang dugo sang sapat, kinahanglan labhan sa isa ka balaan nga duog. 28Ang kolon nga ginalagaan sang karne sini dapat pagabuongon, kag kon ang ginlagaan isa ka kaldero, dapat pagahinisan ini kag hugasan sa tubig. 29Ang bisan sin-o nga lalaki sa mga panimalay sang pari sarang makakaon sini nga halad, tama ini ka balaan. 30Pero kon ang bahin sang dugo sini gindala sa sulod sang Tolda kag ginagamit sa hilikuton sa pagkuha sang sala, kinahanglan ang sapat indi pagkaunon, dapat ini sunogon.
Actualmente seleccionado:
Levitico 6: MBBHIL12
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Maayong Balita nga Biblia © Philippine Bible Society, 2012