JAKARIA 1
1
Nampiau Tuhan ra ulun Nano sumaguli' Riso
1 Paat ra sila' kabalu' ralalom bilor karuo ra pamarintaan ru Raja' Darius giu' ra Pirsia, nampasaboi Tuhan ra tanou ti ra Nabi Jakaria anak ri Birikia am akupu ri Ido. 2Tuhan Ondo' Maayo Kaga' Kuasa' nangani' ra susuban ri Jakaria koson mampasaboi ra tanou ti ra ulun Nano, “Aku, Tuhan siminangit kaga' ra kinamatuaan min. 3Kaa' raino mindagu Aku ramuyun: Saguli' kano Raki', am Aku pana sumaguli' ramuyun. 4Pai' kano koson ra kinamatuaan min. Ra galing i, nabi-nabi nampasaboi ra tanou Kuno risilo maa' raginio lumonggo' mambaal ra malaat am mambaal ra tula. Kaa' marara' ilo rumongog Raki' am marara' gumagaya' Raki'. 5Ati kia kinamatuaan min am nabi-nabi i raino? Namagatoi ilo noyo. 6Pinabala' galing ra nabi-nabi, ulipon Kuno, nampasaboi Aku ra susuban am pampakaraan Kuno ra kinamatuaan min. Kaa' kalo nampalio ilo raginio saboi musiti' mansaan ra kinibit nano. Kopongo raginio timinalikur ilo intor ra tula am nangiou ra Aku, Tuhan Ondo' Maayo Kaga' Kuasa', nangukum noyo risilo nontopot ra kasalaan nilo am nontopot ra nangaruan Kuno.”
Pinaintalang intor ra kukula' ngainan kuda
7Paat ra orou karuo ngoopor am apat sila' ru Syibat, iono sila' koopor am rondo' ralalom bilor karuo ra pamarintaan ru Raja' Darius, nampasaboi Tuhan ra tanou Nano raki'. Ralalom ru rondo' pinaintalang paat ra rondom, 8 nakito ku malaikat ru Tuhan nangura' ra sanginan kuda malia'. Minuog io giu' ra rondo' limayak ru puun-puun kemunting. Giu' ra talikuron nano mokoondo' poyo kukula' ngainan kuda – mokoondo' ondo' malia', mokoondo' ondo' tangkakalut, am mokoondo' ondo' mapulak. 9Nangkuot aku riso, “Tuan, atan kia arati' ru ngaangai' kuda ti?”
Taam io, “Tuluin tokou ra arati' nano. 10Inataran ru Tuhan ngaangai' kuda ti koson mongoi pangimumui ra tana' ti.”
11Ngaangai' ru kuda no nambala' ra malaikat, “Inongoi mai liputo' titikop ru tana' am nakito ra titikop ru tana' moonsoi am mamimio.”
12Indagu boo malaikat no, “Iou Tuhan Ondo' Maayo Kaga' Kuasa', siminangit Kou ra Jirusalim am bandar-bandar giu' ra Jiuda buoi tulu' ngoopor ngambilor. Saboi sanggilan kia Okou magulayun sumangit am kalo mangampun risilo?”
13Taam Tuhan ra malaikat no ra ragu ondo' mapabansuk ra guang, 14am malaikat no pana nanusub raki' mampatanou ra ragu ru Tuhan Ondo' Maayo Kaga' Kuasa', “Motogom Aku kaga' ra bandar Jirusalim am mampalio ra bandar Kuno ondo' matulai no. 15Kaa' siminangit Aku kaga' ra bansa'-bansa' ondo' makaliman ra moonsoi am mamimio. Paat ra Aku nongorot ra sangit Kuno ra ulun Kuno, bansa'-bansa' no namparuang ra kaimbalaan ru ulun Kuno. 16Ginio ra siminaguli' Aku ra Jirusalim koson makaasi' ra bandar no. Baloi Kuno baalon saguli' am bandar no punaan.”
17Nanusub malaikat no raki' nampatanou ra tanou ti niayuk, “Tuhan Ondo' Maayo Kaga' Kuasa' minindagu ra bandar-bandar Nano langkaya' saguli' am igondo' poyo mangindangan Io ra Jirusalim am mangiou riso koson ra longgom Nano galama'.”
Pinaintalang intor ra sangau
18Ralalom ru pinaintalang ra bokon, nakito ku apat sangau ru sapi'. 19Nangkuot aku ra malaikat ondo' minindagu raki', “Atan kia arati' ru sangau-sangau no?”
Timinaam io, “Sangau-sangau no tatandu' ru kuasa' pamarintaan ru tana' ti ondo' nampatutuliar ra mamagun ru Jiuda, Israil am Jirusalim.”
20 Tuhan pana nanulu' boo ra apat ngaulun manukang ra basi' ondo' nagibit ra tukul. 21Nangkuot aku, “Atan kia arati' ru rinatangan nilo?”
Taam io, “Minatong ilo koson mampakalalaa' am mampaluir ra bansa'-bansa' ondo' namuso ra Jiuda am niayuk nampatutuliar ra mamagun nano.”
Currently Selected:
JAKARIA 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.