24
I Jisus naayag saguli'
(Mat. 28.1--10; Mrk. 16.1--8; Jua. 20.1--10)
1Ginio ra nokorondom ra orou minggu' ongoi ruandu' rali ra kalabangan i am pagibit ra tatapis maamis owou ondo' pinongo nilai. 2Pakasuku' ilo, kakito nilo ra naluir bo batu pinaangob ra subalan ru kalabangan i. 3Umpos ilo ra ralalom i, kaa' kolondo' natuum nilo ra bangkai ru Tuhan Jisus. 4Am liliwa' ilo minigor ra giu' i am nangimuag mampaguang raginio, bagu pulusat ru ruo ngaulun ungkuyon nambayang ra mapulak manguliat mininggaar risilo. 5Nga nangalaa' tojojo bagu kubu ruandu' rali ra tana'. Kaa' indagu bo ruo ngaulun i risilo, kon nilo, “Kua guat uyumo' min ulun ondo' maayag ra intok ru ulun minatoi. 6Kalio Io ragiti,” kon nilo, “Binayag Io saguli'! Kalo kia nakara' min atan ondo' rinagu Nali paat ra Io soroi ramuyun giu' ra Galilia. 7Kon no, ‘Anak ru Ulun pataakon ra kuasa' ru ulun makatula, salipon am malupus kataluan maayag Io saguli'.’ ”
8Kakara' bo ru ruandu' rali ondo' rinagu ri Jisus i. 9Ginio ra uli' ilo intor ra kalabangan i am pambala' ilo ra ngaangai' ondo' nasauk i ra mopor am rondo' ngaulun maamaya' ri Jisus am ngaangai' ulun ra bokon i. 10Ruandu' rati ondo' nantunung ra ngaangai' ti ra rasul rali, am i Maria Magdalina, i Juana am i Maria ina' ri Jakub, am poyo ruandu' ra bokon ondo' minaya' risilo. 11Kaa' pangkaraan ru rasul rali raragu ak ginio ru ruandu' rali am kalo nangintopot ilo. 12Kaa' ingkakat i Pitrus am nagindibok minongoi ra kalabangan i. Lilig io am konoon pinangulumput i ayuk nakito no. Bagu uli' io ra baloi am nampaguang io tojojo ra atan ondo' nasauk i.#Kuukula' naskah kolondo' ra ayat 12.
Pangkiralanan mongoi ra Imaus
(Mrk. 16.12--13)
13Orou ragili niak, mokoondo' ruo ngaulun maamaya' ri Jisus nangkiralan mongoi ra pamagunan Imaus. Intok ti olo-olo' mopor am rondo' kilometer galur no intor ra Jirusalim. 14Liliwa' nangkiralan, nansusunur ilo intor ra ngaangai' ondo' nasauk ri Jisus ra raitii' ni. 15Taatanga' ilo mansunur, bagu mininggaar i Jisus galama' am sumbaya' risilo minugar. 16Nakito nilo i Jisus, kaa' nakulau bagu panantagan nilai saboi kalo nakaulig ilo Riso. 17Indagu i Jisus risilo, “Atan sunuron min?”
Uog am pongkoror ilo ra bulos patilaut. 18Sangulun i makainggalan ri Kliopas nangkuot ri Jisus, “Okou rorondo' ak kia minongoi ra Jirusalim am kalo naala' ondo' nasauk ra giu' i ra babagu ti!”
19Pangkuot i Jisus, “Atan guat nasauk i?”
Taam ilo, “Ondo' nasauk ri Jisus ulun Najarit i. Io tupo sangulun nabi'. Ngaangai' ragu am baalon Nali kinuasa' ri Aki Kapuuno' am ngaangai' mamagun nangiou Riso. 20Kaa' tingganai imam Jaudi am tingganai ru bulu takau rali nampataak Riso ra pantula' No rano saboi inukuman Io ra potoyon am sinalip nilo io! 21Nalansan akai ragili ra Io no mampalabus ritakau, bulu ru Israil! Kaa' atan poyo, nataluan noyo ra ginii nasauk. 22Mokoondo' niak kuukula' ngaulun rangan mai ra ruandu' nampaimuag ramon. Nokorondom ilo minongoi ra lobong Nali, 23kaa' kalio natuum nilo bangkai Nali. Bagu paruli' ilo am pambala' ra nakakito ilo ra masundu ru Tuhan ondo' nambala' ra naayag Io. 24Mokoondo' kuukula' ngaulun rangan mai poyo ra bokon minongoi ra kalabangan i am ilai' nilo motopot ragu ru ruandu' rali; kaa' kalio nakito nilo Io ra giu' i.”
25Kaa' i Jisus minindagu risilo, “Sasambungon kau tojojo! Mumpara' bo buoi min mangintopot ra ngaangai' rinagu ru nabi' rali! 26Sala' ka kia Mamamayag ondo' sinusub ri Aki Kapuuno' i maaru' maimbolo' galing ra Io kalo poyo katulayon?” 27Bagu pambala' i Jisus risilo ra atan ondo' binatikan intor Riso ralalom ru ngaangai' ru Alkitab, tumalimpuun intor ra tayar ru kitab ri Musa' am niak ngaangai' nabi' rali.
28Maar ilo no sumuku' ra pamagunan angayan nilai, bagu ugar ak i Jisus koson manunggul Io ra pangkiralanan Nali. 29Kaa' ingai' nilo Io, kon nilo, “Pombolong ak ragiti nga mamai' noyo nai am lumondom galing noyo.” Ginio nga ra apit i Jisus am umpos ra intok nilai. 30Panturung Io gulung risilo, alapo' No ruti' i am paringkuanang Io ri Aki Kapuuno'. Am pipilango' No, bagu tatayaro' No risilo. 31Bagu pakaulig ilo Riso, kaa' liot kon no ak ra pagilangan nilai. 32Pagigindagu ilo, “Ka kia mabunduk guang to ra Io minindagu rito ra pangkiralanan tanii, am nambala' rito ra binatikan ra Alkitab?”
33Bagu saguli' ilo ra Jirusalim. Giu' i natuum nilo mopor am rondo' ngaulun maamaya' ri Jisus ondo' natitimung mabaya' ra rangan nilai. 34Indagu ilo ra ka ruo ngaulun i, “Totopot naayag noyo saguli' Tuhan i! I Simon nakakito Riso!”
35Tunungo' bo ru ruo ngaulun i atan ondo' nasauk ralalom pangkiralanan nilai am atan kulaan ilo nakaulig ra Tuhan ra Io namilang ra ruti' i.
Minintalang i Jisus ra maamaya' No rano
(Mat. 28.16--20; Mrk. 16.14--18; Jua. 20.19--23; Rin. 1.6--8)
36Liliwa' ruo ngaulun i lakat ak poyo mantunung, pulusat ri Jisus minigor ra taatanga' nilai am indagu, “Kaansayan ramuyun!”#Kuukula' naskah ra bokon kolondo' ra ragu: am indagu, “Kaansayan ramuyun!”
37Naliangan am nalaa' ilo kaga', nga guang nilai nangambiluo io. 38Kaa' pangkuot Io risilo, “Kua guat kalaa' am kaimamang kau? 39Ilai' min palar ru kalindu' am kalayam Kutu, am ilai' min Aku galama' gitio! Kombongo' min Aku am ilai', nga ambiluo kolondo' kual am bungul, kaa' Aku mokoondo'.”
40Kopongo i Jisus minindagu ragitio bagu patalango' No palar ru kalindu' am kalayam Nano risilo.#Kuukula' naskah ra bokon kolondo' ra ayat 40. 41Kalo poyo nangintopot ilo nga naansukan ilo toojo am nangimuag! Bagu pangkuot i Jisus risilo, kon No, “Mokoondo' kau kia ra akanon ragiti?” 42Anii' nilo Io ra saputul papait tinunuan. 43Alapo' ri Jisus papait i am akano' No ra pinaguluan nilai.
44Kopongo ragili indagu Io risilo, “Gitio noyo rinagu Kuli ramuyun paat ra Aku lakat ak poyo soroi ramuyun i; ra moonong baal ondo' binatikan intor Raki' ralalom Ukum ri Musa', kitab ru Nabi' rali am kitab Mazmur, gitio musiti' ukopon.”
45Kopongo ragili, nampainutun Io risilo atan kon ru Alkitab, 46kon No, “Nabatikan noyo ra Alkitab ra Mamamayag ondo' sinusub ri Aki Kapuuno' i musiti' maimbolo' galing am bagu maayag saguli' malupus kataluan. 47Am poyo, Tanou Moonsoi ti musiti' potonowon ra ngaangai' bulu ru tana' ti, tumalimpuun intor ra Jirusalim. Maa' raginio mansail ra inggalan Ku tumalikur ilo intor ra tula nilono bagu ampunon ilo ri Aki Kapuuno'. 48Am akau no sasi' ondo' mampaintutun risilo ra ngaangai' ti. 49Aku galama' mangator ramuyun ondo' binantu' ri Ama' i. Kaa' musiti' kau maginaa galing ra bandar ragitio saboi mokoowot kau ra kuasa' ti intor ri Aki Kapuuno', bagu mongoi kau pampatanou.”
I Jisus kinayang ra suruga'
(Mrk. 16.19--20; Rin. 1.9--11)
50Kopongo ragili ibito' ilo ri Jisus mongoi ra lisar ru bandar mamaar sumaboi ra pamagunan Bitania. Pakasuku' ra giu' i, kakato' No kalindu' Nali am pamarakat risilo. 51Liliwa' namarakat Io risilo, kakayang Io ra suruga'#Kuukula' naskah ra bokon kolondo' ra ragu: kakayang Io ra suruga'. mangiruan risilo. 52Siminamba ilo Riso am bagu siminaguli' ra Jirusalim nabaya' ra kaansukan nilo toojo. 53Ginio ra masalok ilo mongoi ra Baloi Tuhan koson mongompor ri Aki Kapuuno'.
Loading reference in secondary version...