LUKAS 2
2
I Jisus inanak
(Mat. 1:18-25)
1Paat ragili i Kaisar Agustus nanusub ra ngaangai' mamagun ralalom Empayar Roma, mongoi panulis ra inggalan nilo koson manguntob ra suang ru ulun. 2Panguntaban kasaa' ti pinaugar paat ri Kirinius nasauk ra gabenor ru pagun Siria. 3Paat ragili, moonong ulun mongoi ra pamagunan nilo galama' koson sumuang ra panguntaban ti.
4Pintor boo i Jusup intor ra pekan Nasarit, giu' ra libung ru Galilia, am minongoi ra rondo' pekan makainggalan ra Bitligim ra pagun ru Judia, intok i raja' Daut inanak ra galing i. Minongoi io ra giu' no sabap ra io galama' papag ri Daut. 5Minongoi io suang ra panguntaban ti nabaya' ra tamung nano i Maria, ondo' kaayaan noyo kaga'. 6Pakasaboi ilo ra Bitligim, nasuku' noyo orou paganakan ri Maria. 7Naganak io ra sangulun lalagang ungkuyon. Gitio anak nano ra katuaan. Kusibi' no lalagang no ra konoon am palangano' ralalom rondo' papaakanan ra bibiag sabap ra kolondo' intok pambalangan natuum nilo ra giu'.
Malaikat am magagalung ra domba
8Mamaar ra Bitligim rondom ragili, mokoondo' niayuk kukula' ngaulun magalung ra domba giu' ra pampakatapan. 9Pulusat ru malaikat ru Tuhan i risilo am kasinda ilo ru kinatulai ru Tuhan. Nalaa' ilo kaga'. 10Kaa' indagu malaikat no, “Pai' kalaa'! Aku ti minatong nagibit ra tanou moonsoi ramuyun. Tanou ragitio mampakaansuk ra ngaangai' ulun. 11Orou raiti' sangulun Mamamayag inanak noyo ramuyun giu' ra pekan ru raja' Daut. Io no i Kristus, ioginio Tuhan. 12Gitio tatandu' nano, makatuum kau sangulun lalagang kinusib ra konoon ondo' pinalangan ra rondo' papaakanan ra bibiag.”
13Pulusat boo ru masuang malaikat ra bokon intor ra suruga' nababaya' ra malaikat ra raitii' ni. Nongompor ilo ri Aki Kapuuno', konilo,
14“Koompor toojo inggalan ri Aki Kapuuno' giu' ra rasawat!
Am giti ra tana', kaansayan pataakin noyo risilo ondo' mapabansuk ra guang ru Tuhan!”
15Kopongo malaikat-malaikat no nangiruan risilo am saguli' ra suruga', ulun-ulun magagalung nagigindagu ra rondo' am bokon, “Ongoi takau ra Bitligim am ilai' takau ondo' pinabala' ru Tuhan ritakau ra raitii' ni.”
16Pagindibok ilo ugar, am katuum nilo i Maria, i Jusup am niayuk lalagang ondo' pinalangan ralalom papaakanan ra bibiag. 17Kakito nilo lalagang ti, tunungo' nilo atan ondo' rinagu ru malaikat intor ra lalagang ti. 18Nangimuag ngaangai' ulun ondo' nangkirongog ra tunung nilai. 19Kaa' kinara' am ginuang ri Maria ngaangai' baal raginio. 20Ulun-ulun magagalung riminuli' liliwa' mongongompor ri Aki Kapuuno' ra ngaangai' ondo' norongog am nakito nilai. Ngaangai' no nasauk koson ra rinagu ru malaikat i.
Inggalani' nilo Io ri Jisus
21 Balu' ngoorou noyo buoi lalagang i, sunati' nilo am inggalani' nilo Io ri Jisus. Gitio pinainggalan ru malaikat i Riso ra Io kalo poyo tininai' ru ina' Nali.
I Jisus pataakon ra Tuhan giu' ra Baloi Tuhan
22 Nasuku' noyo orou pangimpasawan maya' ra kaulayan ru Ukum ri Musa, inibit nilo lalagang no ra bandar Jirusalim koson pataakon ra Tuhan. 23 Sabap ra tinulisan noyo ra Ukum ru Tuhan koson ragitio, “Moonong anak katuaan ra ungkuyon pataakon ra Tuhan.” 24Nangani' ilo niayuk ra taak simbalui koson inaru' ra Ukum ru Tuhan, ioginio santuop susuit maningkuluuk kapoam ruo ngainan susuit asang ondo' mamulok.
25Paat ragili giu' ra bandar Jirusalim mokoondo' sangulun ungkuyon, makainggalan ri Simion. Io sangulun motopot ondo' gumagaya' ri Aki Kapuuno' am maginaa ra pamayagan ru Israil. Kinuasa' 26am binalaan io ru Ambiluo ri Aki Kapuuno' no ra kalo poyo matoi io ru kalo makakito io ra Mamamayag ondo' sinusub ru Tuhan. 27Inibit io ru Ambiluo ri Aki Kapuuno' sumubol ra Baloi Tuhan. Paat ragili niayuk minumpos i Jusup am i Maria nagibit ri Jisus koson mambaal ra nanusuban ru Ukum ri Musa no. 28Alapo' am kubibilo' ri Simion lalagang no, am pongompor io boo ri Aki Kapuuno', kono,
29“Tuhan, sinugut Mu noyo bantu' Muli raino.
Polosoo' noyo ulipon Muti mugar mabaya' ra kaansayan.
30Sabap ra nakito ku noyo Mamamayag intor Rirun,
31ondo' inatang Mu noyo ra ngaangai' bansa'.
32 Koson ra sinda mapakatawang ra ralan
manulu' Io ra ulun sala' ka Jaudi rumatong Rirun.
Io niayuk sinda ondo' mampasauk ra ulun Muno Israil urumaton.”
33Matuo ru lalagang no nangimuag nokorongog ra rinagu ri Simion i ra anak nilono. 34Barakati' ilo ri Simion am indagu io ri Maria, ina' ru lalagang no, “Anak ragitio pinili' noyo ri Aki Kapuuno' koson mangukum am niayuk mamayag ra masuang ulun ru Israil. Masauk Io ra tatandu' intor ri Aki Kapuuno' kaa' masuang poyo manggal Riso. 35Am ginio nai mapandayan boo ondo' gogoton ru guang nilo. Am okou pana mangiluk kaga' guang muno ra maagu no koson tobokon ra ilang.”
36Mokoondo' sangulun nabi ruandu' ondo' matutuo kaga' makainggalan i Ana. Anak io ri Panuil, intor ra bansa' ru Asyir. Tulu' io ayuk ngambilor nasimpung ra ralaki nali am nasauk io no ra napuor. 37Raino balu' ngoopor am apat ngambilor noyo kinatuo nano. Orou-rondom io soroi ra Baloi Tuhan koson makiasi' ri Aki Kapuuno' am mampali. 38Nakapaat ragitio niayuk riminatong io am pongompor io ri Aki Kapuuno' am pambala' io intor ra lalagang no ra ngaangai' ulun ondo' maginaa ri Aki Kapuuno' mampalabus ra bandar Jirusalim.
Siminaguli' ra Nasarit
39 Kabaal noyo ngaangai' nanusuban ra Ukum ru Tuhan, i Jusup am i Maria siminaguli' ra intok nilo, pekan Nasarit, giu' ra libung ru Galilia. 40Siminukor lalaing i am maikang, mapintar am tagamin Io kaga' ri Aki Kapuuno'.
Giu' i Jisus ra Baloi Tuhan
41 Moonong bilor matuo ri Jisus mongoi pangiantak ra Orou Paska giu' ra Jirusalim. 42Paat ri Jisus mopor am ruo ngambilor, minongoi ilo poyo ra pangiantakan ragitio, maya' ra kaindalaman nilai. 43Kopongo pangiantakan i, uli' ilo. Kaa' kalo natutunan ru matuo ri Jisus ra lakat ayuk poyo soroi Io ra Jirusalim. 44Indos nilo nakaaya' Io no ra pababaya' nilai. Songorou noyo buoi ilo nangkiralan, bagu uyumo' nilo i Jisus, insan lair minaya' Io ra pabukat kapoam rangan nilai. 45Kaa' kolondo' natuum nilo Io am saguli' ilo po ra Jirusalim mongoi paguyum Riso. 46Kataluan ilo naguyum am bagu katuum nilo Io ralalom ru Baloi Tuhan. Nanturung i Jisus ra giu' no mangkirongog am mangkuot ra mangingila' ra ugama Jaudi. 47Ngaangai' ulun ondo' nangkirongog Riso i nangimuag sabap ra mapintar Io am matanda' toojo taaman Nano. 48Matuo Nali pana nangimuag nagilong Riso. Indagu ina' Nali Riso, “Lagang, kua guat Kou koson raginio? Akai mangkatuo maimamang kaga' Rirun!”
49Taam i Jisus, “Kua uyumo' min Aku? Kalo kia nakapandai kau ra inatang noyo Aku ti soroi ra baloi ru Ama' Kuno?” 50Kaa' kalo nakarati' ilo ra taaman ri Jisus ni.
51Kopongo ragili, saguli' i Jisus baya' ra matuo Nano ra Nasarit am gumagaya' risilo. Nampaguang ina' Nano ra ngaangai' raginio. 52 Siminukor boo i Jisus am gaai-gaai kapintaran Nano am niayuk kasagain Io ri Aki Kapuuno' am ulun.
Currently Selected:
LUKAS 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.