YouVersion Logo
Search Icon

JUNUS 1

1
Inanggal ri Junus susuban ru Tuhan
1 Paat ra sangarawan, indagu Tuhan ri Junus anak ri Amitai. 2Indagu Io, “Ongoi no ra Niniwi, bandar maayo no, mompololob ra mamagun no, sabap ra nakapandai Aku ra mamagun no malaat kaga'.” 3Kaa minongoi i Junus ra intok ru bokon koson minggalur ra Tuhan. Minongoi i Junus ra Jopi, am nakainamot ra kapal ondo' mongoi ra Sipanyol. Pakapambayar ra tambang, sakoi i Junus ra kapal; nasundoi io nababaya' ra ulun-ulun ru kapal mongoi ra Sipanyol, maa' raginio makainggalur io intor ra Tuhan. 4-5Timinuun i Junus ra intok ondo' magana' kaga' am liminuya' ra giu', am nokororot io toojo.
Kopongo raginio namparatong Tuhan ra bagiu' mapuor kaga' giu' ra raat, am kasauk boo bagiu' ondo' makalalaa', am liminapos ra kapal saboi maar magagai. Ngaangai' ulun ru kapal nalaa' am giminolok makiindangan, sigagama' nilo ra dewa nilo galama'. Pinatiran nilo suang ru kapal no ra ralalom ru raat koson mangiruru' ra makalalaa'.
6Paat ra kaptin ru kapal i timinuun giu' ra ragana', natuum no i Junus nombolong ra giu'. Indagu kaptin i, “Ati koson kou mombolong ra baal ragitio? Karat no! Pakiasi' no makiindangan ra dewa muno. Maaru' lair makaasi' io ritakau, am kalo mapuso takau.”
7Kopongo raginio, nagaloi boo i Junus am kaptin ru kapal giu' rasawat, ngaangai' ulun ru kapal nagindagu ilo-ilo galama', “Ibok takau ngai' magugundi' takau maa' raginio makapandai takau osoi makasala, saboi nalumpa' takau ru karaat ti!” Pagugundi' ilo am kaundi' i Junus. 8Konilo ri Junus, “Topot kia okou nangkinibit ra karaat ti? Ati intor am atan bansa' muno? Kua guat ragiti kou?”
9Taam i Junus, “Ulun aku ru Ibrani. Sumamba aku ra Tuhan, i Aki Kapuuno' giu' ra suruga', ondo' nambaal ra raat am lantur.” 10I Junus pana nantunung boo ra io ti nagiru' intor ra Tuhan.
Korongog ragu raginii, malaa' boo ngaangai' ulun ru kapal, am mindagu riso, “Binaal muno makalalaa' kaga'!” 11Liliwa' raginio bagiu' mapuor kaga' liminanja', am ngaangai' anak ru kapal nangkuot ri Junus, “Atan kia musiti' baalon mai rirun koson mampalinos ra bagiu' mapuor kaga' ti?”
12Taam i Junus, “Patiri' min aku ralalom ru raat, am maaru' bagiu' mapuor ti luminos. Nakapandai aku no ra aku ti nangkinibit ra bagiu' ondo' mapuor kaga' ondo' liminumpa' ramuyun.”
13Kaa' ngaangai' ulun ru kapal lakat poyo mirot toojo koson mangkabil ra kapal i mongoi ra lantur. Kaa' bagiu' mapuor liminanja' niayuk mapuor kaga', saboi pirot nilo kolondo' onong. 14Ginio ra golok ilo ra Tuhan, “Iou Tuhan, kitaakon mai, pai' no pamuso ramon sabap mangalap ra painawo ru ulun ondo' kolondo' sala ramon. Iou Tuhan, Okou noyo ondo' makapandai ra ngaangai' baal ragitio; gitio noyo binaal Muno.” 15Kopongo raginio, pinatiran nilo i Junus ra ralalom ru raat, am bagiu' mapuor i limininos ra namulali'. 16Ngaangai' ulun ru kapal i malaa' toojo ra Tuhan. Nampataak ilo ra taak simbalui ra Tuhan am nambaal ra nazar Riso.
17 Liliwa' raginio, nanusub Tuhan ra sangunor papait maayo koson manilus ri Junus. Ginio ra i Junus minayan ra ralalom tinai' ru papait talu ngoorou am talu ngorondom buoi nano.

Currently Selected:

JUNUS 1: TMT

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy