JUANIS 21
21
Minintalang poyo i Jisus ra maamaya' Nano ra Tasik Tibirias
1Kopongo ragili, igondo' poyo minintalang i Jisus ra maamaya' Nano giu' ra Tasik Tibirias. Koson ragitio io nasauk; 2Timinimung poyo i Simon Pitrus, i Tomas (ondo' sabiton ri Nagapir), i Natanil (intor ra pamagunan Kana ra libung Galilia), anak-anak ri Jibidius, am niayuk ruo ngaulun maamaya' ri Jisus ra bokon i. 3 Kon ri Pitrus ra bokon no, “Masaga' aku mongoi pamparalo.”
Indagu ilo, “Maya' akai rirun.” Ginio ra ugar ilo no am sakoi ra parau. Kabalu' pana nosorondom ilo namparalo, kolondo' sangunor pana noowot nilo. 4Ra matawang galing noyo, minigor i Jisus ra nagas ru tasik i, kaa' kalo nauligan nilo ra Io noyo i Jisus. 5Indagu i Jisus risilo, “Kolondo' kia papait noowot min?”
Taam ilo, “Kolondo'.”
6 Indagu i Jisus risilo, “Pataano' ralo mino tampilon ra pamiris ru parau no, am mokoowot kau boo.” Ginio ra pataano' nilo ralo nilai, am kalo boo makabunduk ilo sabap ra masuang boo kaga' papait siminulung.
7Indagu maamaya' tagamin ri Jisus i ri Pitrus, “Tuhan nai ginio.” Korongog ri Pitrus ginio, pambayang io boo (sabap ra inalus no bayang nali) am tapung ra timug. 8Kaa' maamaya' ra bokon no namparau ayuk siminunu', liliwa' namunduk ra ralo ondo' napanu' ra papait. Kalo maalur ilo intor ra lantur, olo'-olo' maatus ngamito ayuk. 9Pakaasak ilo intor ra parau, nakito nilo baa ru apui am papait tinunuan am mokoondo' niayuk ruti' ra giu' i. 10Indagu i Jisus risilo, “Ibito' ra giti kukula' ngaunor papait ra kakarakop mini.”
11Ongoi i Simon Pitrus ra parau i am ralaato' no ralo i, ondo' napanu' ra papait mangasalag. Maatus limo ngoopor am talu ngaunor ringai'. Kaa' kabalu' pana koson raginio suang ru papait i, kalo narilak ralo i. 12Indagu i Jisus risilo, “Pagagakan takau.” Kolondo' sangulun pana intor ra maamaya' Nano nakakau' nangkuot Riso, “Osoi Kou?” sabap ra nakatutun ilo ra Io no Tuhan. 13Inggaar boo i Jisus risilo, pangalap ra ruti' am pataaki' risilo. Kinooi No niayuk papait i. 14Gitio kaintalu ri Jisus minintalang ra maamaya' Nano nalupus Io binayag saguli'.
I Jisus am i Pitrus
15Pakaakan ilo, pangkuot boo i Jisus ri Simon Pitrus, “Simon anak ri Juanis, motogom kou po kia Raki' ka ilo ti?”
Taam i Simon Pitrus, “Iou Tuhan, nakapandai Kou ra motogom aku Rirun.”
Kon ri Jisus riso, “Alungi' noyo anak-anak ru domba Kuno.” 16Kainduo ri Jisus nangkuot riso, “Simon anak ri Juanis, motogom kou kia Raki'?”
Taam io Riso, “Iou Tuhan, nakapandai Kou ra motogom aku Rirun.”
Kon ri Jisus riso, “Alungi' noyo domba-domba Kuno.” 17Kaintalu ri Jisus nangkuot riso, “Simon anak ri Juanis, motogom kou kia Raki'?”
Mangiluk guang ri Pitrus sabap ra nangkuot i Jisus riso saboi intalu ra, “Motogom kou kia Raki'?” Indagu io Riso, “Tuhan, nakapandai Kou ra ngaangai'. Okou noyo nakapandai ra motogom aku Rirun.”
Indagu i Jisus riso, “Alungi' noyo domba-domba Kuno. 18Balain tokou toojo: Buoi okou mamulok, okou galama' tumampos am mugar ra ati ayuk kasagaan muno. Kaa' paat ra okou matutuo, patutuyon mu kalindu' muno am bangkilon kou ru ulun bokon, am ibiton kou ra intok kararaan mu.” 19(Ra ragu ri Jisus raginio mambala' ati kulaan patayan ri Pitrus koson mampatulai ri Aki Kapuuno'.) Indagu boo i Jisus riso, “Baya' no Raki'.”
Mamaya' ondo' tagamin ri Jisus
20 Pangkaili i Pitrus am kakito no maamaya' ondo' tagamin ri Jisus i siminunu' risilo. Io noyo ondo' nakainggaar Riso paat ra ilo nagagakan am nangkuot, “Tuhan, osoi kia mampataak Rirun ra pantula' Muno?” 21Kakito io ri Pitrus, kuati' no i Jisus, “Tuhan, atan nua' masauk ra ulun ti?” 22Taam i Jisus riso, “Amon ru masaga' Aku ra maayag io saboi ra Aku matong saguli', kua kaimamang kou raginio? Kaa' okou baya' no Raki'.” 23Ginio boo ra nakatabual tanou ra gino ngai' ru maamaya' Nano ra maamaya' raginio kalo matoi. Kaa' sotopot no i Jisus galama' kalo minindagu ra kalo matoi io; kaa' kon Nano, “Amon ru masaga' Aku ra maayag io saboi ra Aku matong saguli', kua kaimamang kou raginio?”
24Maamaya' raginio noyo ondo' nampaintutun ra nasauk ti am nanulis noyo ragitio, am nakapandai takau ra motopot kaintutunan nano.
Ragu pupus
25Masuang poyo binaal ri Jisus ra bokon. Kaa' amon ru koyoon tulisi', guang ku titikop ru tana' ti pana kalo sama' pambulian ra kinasuang ru buuk no.
Currently Selected:
JUANIS 21: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.