JUANIS 13
13
Nambagu' i Jisus ra kalayam ru maamaya' Nano
1Songorou poyo am tumalimpuun Pangiantakan ra Paska. Nakapandai i Jisus ra masaboi noyo paat Nano mangiruan ra tana' ti sumaguli' ra Ama' Nano. Masalok Io monogom ra maamaya' Nano, am tinagaman No ilo saboi ra pupus.
2Nagagakan i Jisus am maamaya' Nano, am Tingganai ru riwato no minindagu ra guang ri Judas, anak ri Simon Iskariot, koson mampataak ri Jisus ra pantula' Nano. 3Nakapandai i Jisus ra ngaangai' kuasa' pinataak noyo ri Ama' Riso. Nakapandai Io niayuk ra minatong Io intor ri Aki Kapuuno' am sumaguli' poyo Riso. 4Ginio boo ra ingkakat Io, aluso' No sukub Nali am pobongkoso' No tiwala' ra awak Nali. 5Suangi' ri Jisus rondo' bisin ra timug am tumalimpuun mambagu' ra kalayam ru maamaya' Nano. Kabagui' raiti, piiri' No boo ra tiwala' pinabangkos No ra awak Nali.
6Pakasuku' i Jisus ri Simon Pitrus, kon ri Simon, “Tuhan, topot-topot Kou mambagu' ra kalayam kutu?”
7Taam i Jisus, “Kalo makarati' kou raino, kaa' maagu no makarati' kou ra baalon Kutu.”
8Indagu i Pitrus Riso, “Kalo Tuhan, kalo noyo pabaguin ku kalayam kutu Rirun!”
Kaa' kon ri Jisus, “Amon ru kalo baguin tokou, kalo boo karaan kou ra maamaya' Kuno.”
9Kon ri Simon Pitrus, “Tuhan, amon ru koson poyo raginio, sala' ka kalayam kutu ayuk baguin Muno, kaa' kalindu' am ulu kutu pana.”
10Indagu i Jisus riso, “Osoi ayuk nakapariu', mapasau noyo ngaangai' inan nano; am kalayam nano ayuk boo baguin. Mapasau kano, kaa' sala' ka akau ngai'.” (11Sabap ra nakapandai noyo i Jisus osoi mampataak Riso ra pantula' Nano. Ginio ra rinagu No, “Mapasau kano, kaa' sala' ka akau ngai'.”)
12 Kabagui' ayuk ri Jisus kalayam nilai, bayango' No saguli' sukub Nali am panturung Io po. Indagu Io boo risilo, “Makarati' kau kia kua baalo' Ku ginii ramuyun? 13Mampiau kau Raki' ra Mangingila' am Tuhan. Motopot noyo pampiawan mino, sabap ra Aku no Mangingila' am Tuhan. 14Amon ru Aku ti noyo Tuhan am Mangingila' min, nambagu' ra kalayam min, akau pana musiti' mambagu' ra kalayam ru rondo' am bokon. 15Nanulu' Aku noyo ramuyun, maa' raginio mambaal kau ra atan ondo' binaal Kuli noyo ramuyun. 16 Balain takamin toojo: Sangulun ulipon kalo maatang poyo intor ra tuan nano. Mogondo' niayuk ra sangulun sinusub kalo maatang poyo intor ra nanusub riso. 17Amon ru makapandai kau raginio, mulu' poyo bansuk min amon ru suguton min.
18 Sala' ka akau ngaangai' kon Kuli. Nakapandai Aku osoi pinili' Kuli. Kaa' ragu ru Buuk Kitab ragitio suguton noyo, ‘Ulun ondo' gumulung Raki' mangakan, tumula' io Raki'.’ 19Balain takamin raino ra kalo poyo masugut baal ragitio, maa' raginio ra io masauk ra maagu no, mangintopot kau ra ‘Aku noyo AKU’. 20 Balain takamin toojo: Osoi ayuk mangapu ra ulun sinusub Kuno, Aku pana apuon no. Am osoi ayuk mangapu Raki', apuon no niayuk Io ondo' nanusub Raki'.”
Nanala' i Jisus ra pataakon Io ra pantula' Nano
(Mat. 26:20-25; Mrk. 14:17-21; Luk. 22:21-23)
21Karagu ri Jisus ginio, maimamang am pambala' Io, “Balain takamin toojo: Sangulun intor ramuyun mampataak Raki' ra pantula' Kuno.”
22Pototontong maamaya' Nano ra rondo' am bokon, sabap ra kalo nakapandai ra osoi kon Nano. 23Sangulun intor ra maamaya' ri Jisus nanturung ra sapapa' Nano, io ti noyo ondo' tagamin ri Jisus. 24Ginio ra anii' io ri Simon Pitrus ra pulanu am indagu, “Kuati' ga Mangingila' no, osoi kon Nano.”
25Inggaari' no boo i Jisus am pangkuot, “Tuhan, osoi kon Muni?”
26Taam i Jisus, “Ondo' aniin Ku ra ruti' ra patunjakon ti, io no ginio.” Alapo' boo ri Jisus sangkinis ruti', tunjaki' No am taaki' No ri Judas, anak ri Simon Iskariot. 27Kaalap ayuk ri Judas ruti' i, subol bagu Tingganai ru riwato riso. Indagu boo i Jisus riso, “Baalo' noyo atan guangon muno ra mataki'!” 28Kaa' kolondo' sangulun pana intor risilo ondo' nangakan i, nakarati' kua indagu i Jisus ri Judas koson raginii. 29Sabap ri Judas ti mampaguut ra ruit nilai, ginio ra kukula' intor risilo nangkara' ra sinusub io ri Jisus mambali ra atan ondo' maatang ra pangiantakan, kapoam mantayar ra ruit no ra ulun musikin.
30Kaalap ayuk ri Judas ruti' i, paringkaagou io ingkual. Paat ragili molondom noyo.
Panusuban bagu
31Pakaugar i Judas, indagu i Jisus, “Raino noyo Anak ru Ulun katulayon; am raino niayuk i Aki Kapuuno' katulayon ralalom Riso. 32Amon ru i Aki Kapuuno' katulayon ralalom Riso, katulayon Io niayuk ri Aki Kapuuno' galama', am pongoon No ginio ra mataki'. 33 Anak-anak ondo' tagamin Kuno, kalo boo mabuoi Aku soroi ramuyun. Maguyum kau pana Raki'; kaa' ondo' rinagu Kuno ra tingganai ru ulun ru Jaudi, raino raguon Ku poyo ramuyun, ‘Kalo mokoongoi kau ra angayan Kuno.’ 34 Gitio noyo panusuban bagu ondo' raguon Kutu ramuyun; Kotogom kano ra rondo' am bokon. Koson ra Aku motogom ramuyun, akau niayuk musiti' motogom ra rondo' am bokon. 35Amon ru motogom kau ra rondo' am bokon, bagu mapandayan ru ngaangai' ulun ra akau no maamaya' Kuno.”
Manala' i Jisus ra magali' i Pitrus Riso
(Mat. 26:31-35; Mrk. 14:27-31; Luk. 22:31-34)
36Pangkuot i Simon Pitrus ri Jisus, “Tuhan, ati angayan Mu?”
Taam i Jisus, “Kalo mokoongoi kou ra angayan Kuno raino, kaa' makasunu' kou niayuk ra tauli no.”
37Pangkuot poyo i Pitrus, “Tuhan, kua pai' aku pakaaya' raino? Nakatampos aku noyo mampataak ra painawo kuno koson Okou.”
38Taam i Jisus riso, “Totopot kia mampataak kou ra painawo muno koson Aku? Balain tokou toojo: Kalo poyo maningkuluuk manuk tandaa' no, intalu kono magali' ra makaulig kou Raki'!”
Currently Selected:
JUANIS 13: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.