JUANIS 10
10
Abig ra domba am magagalung
1“Balain takamin toojo: Ulun ondo' sumubol ra kandang ru domba kalo maya' ra kulobon, kaa' mangkiwa' ayuk ra timbok, io no sangulun mantatakou am mampapagaau. 2Kaa' ulun ondo' sumubol maya' ra kulobon, io no magagalung ra sampanon ru domba. 3Io no ukabin ru magagalung ra kandang no, am sampanon ru domba pana mokorongog ra bolos nano ra io mampiau ra inggalan nilo sigagama', am ibiton no ilo mingkual. 4Maingkual no sampanon ru domba no, magulu boo magagalung no am sumunu' ilo riso sabap ra mauligan nilo bolos nano. 5Kaa' marara' ilo maya' ra ulun bokon am magiru' ilo intor riso, sabap ra kalo mauligan nilo bolos nano.”
6Gitio noyo abig ondo' pinatunung ri Jisus risilo, kaa' kalo nangarati' ilo ra kon Nali.
I Jisus noyo magagalung ra moonsoi
7Ginio ra indagu poyo i Jisus, “Balain takamin toojo: Aku noyo kulobon ru domba. 8Ngaangai' ondo' nakasigulu Raki', ilo ti mantatakou am mampapagaau ayuk, kaa' kalo nangkirongog sampanon ru domba no risilo. 9Aku noyo kulobon. Osoi ayuk mangintopot Raki', bayagon io; mingkual am sumubol am poyo makaakanon io. 10Mantatakou matong mongoi pantakou, mamatoi am mampalunsai. Kaa' aku minatong koson ilo ondo' mangkirongog Raki' mokoowot ra kaayagan, io no kaayagan ondo' malabaan.
11Aku noyo magagalung ra moonsoi, am magagalung ra moonsoi mampataak ra painawo Nano ra domba Nano. 12Kaa' ulun gajiin, ondo' sala' ka magagalung kapoam tatangan ra domba no, pai' ru koson raginio. Paat ra makito no taani matong iruanin no ayuk sampanon ru domba no am magiru' io. Ginio ra saamon am pantutuliaron boo sampanon ru domba no ru taani no. 13Magiru' io sabap ra ulun gajiin io ayuk am pai' ru karaan piboo domba-domba no. 14Aku noyo magagalung ra moonsoi. Koson ri Ama' makaulig Raki' am Aku makaulig ri Ama', mogondo' niayuk ra Aku pana makaulig ra domba-domba Kuno am ilo niayuk makaulig Raki'. 15 Aku mampataak ra painawo Kuno risilo. 16Mokoondo' Aku poyo ra domba-domba ra bokon ondo' kalo nakaaya' ra tayar ragitio. Ilo pana musiti' Ku ibiton, am mokorongog ilo boo ra bolos Kuno. Ilo ti simpungon Ku am rondo' ayuk magagalung risilo.
17I Ama' motogom raki' sabap ra mampataak Aku ra painawo Kuno koson maayag Aku saguli'. 18Kolondo' sangulun pana makapamatoi Raki' amon ru kalo iowon Ku. Maya' ra kasagaan Kuno galama' mampataak Aku ra painawo Kuno. Makakuasa' Aku mampataak ra painawo Kuno am maayag saguli'. Ginio noyo nanusuban Raki' ru Ama' Kuno.”
19Ginio nai ra nagagansang boo ulun-ulun ru Jaudi. 20Masuang intor risilo minindagu ra, “Sinubol Io ru riwato! Mantuyang Io! Kua pangkirongog kau Riso?”
21Kaa' bokon i poyo minindagu, “Sala', ulun sinubol ru riwato kalo makaindagu koson raginio. Kalo noyo lair mamabas riwato ra ulun bolou.”
I Jisus kalo inapu ru ulun ru Jaudi
22Nasuku' noyo Pangiantakan Pangurumatan ra Baloi Tuhan giu' ra Jirusalim. Io no nakapaat ra bulintok masimu'. 23Minugar-ugar i Jisus ra langgar ru Baloi Tuhan ondo' inggalanin ra Langgar Salomo. 24Ginio ra tingganai ru ulun ru Jaudi liminimpu ri Jisus, indagu ilo Riso, “Kula' poyo buoi ru kaimamangan mai ti? Pambala' no toojo ramon; motopot kia ra Okou no Mamamayag ondo' sinusub ri Aki Kapuuno'?”
25Taam i Jisus, “Nambala' Aku noyo ramuyun, kaa' kalo nangintopot kau. Ondo' baalon Kuno ralalom inggalan Ama' Kuno, ginio noyo mampaintutun Raki'. 26Kaa' kalo niayuk mangintopot kau sabap ra akau sala' ka domba Kuno. 27Domba-domba Kuno mangkirongog ra bolos Kuno; makaulig Aku risilo am maya' ilo Raki'. 28Mangani' Aku risilo ra kaayagan mantilayun koson kalo mapuso ilo. Kolondo' noyo mampagaau risilo intor Raki'. 29I Ama' Kuno ondo' nampataak risilo Raki', maayo poyo intor ra ngaangai'. Ginio ra kolondo' noyo mampagaau risilo intor ri Ama'. 30Aku am i Ama' no rondo' ayuk.”
31Sabap raginio, tingganai ru ulun ru Jaudi no nanganam ra batu koson momobol ri Jisus. 32Kaa' indagu i Jisus risilo, “Masuang binaal Kuno ra moonsoi maya' ra nanusuban ri Ama'; ati kia rondo' binaal Kuli ra akau momobol boo Raki'?”
33 Taam ru ulun ru Jaudi no, “Sala' ka binaal Muno ra moonsoi pamabalan mai Rirun, kaa' sabap ra nagasab Kou tupo ri Aki Kapuuno'. Okou ti ulun ayuk, kaa' makimogondo' Kou boo ri Aki Kapuuno'.”
34 Indagu i Jisus risilo, “Kalo kia tinulisan noyo ra Ukum ri Musa, kon ri Aki Kapuuno', ‘Akau no tuhan’? 35Nakapandai takau no ra ragu ru Buuk Kitab kalo malulu'. I Aki Kapuuno' galama' nampiau risilo ra tuhan, ioginio ulun-ulun ondo' nampasukuan ra ragu Nano. 36Aku pinili' am sinusub ri Ama' matong ra tana' ti. Kua indagu kau ra magasab Aku ri Aki Kapuuno' ra ragu Kuli, ‘Aku ti Anak ri Aki Kapuuno'’? 37Amon ru kalo mambaal Aku ra kandoi ri Ama', pai' kano pangintopot Raki'. 38Kaa' amon ru baalon Ku, am kalo mangintopot kau ra ragu Kutu, pangintopot kano Raki' ra binaal Kuli. Bagu no makapandai am makarati' kau ra i Ama' masimpung Raki', am Aku pana masimpung ri Ama'.”
39Nangkinam ilo poyo pamparakop ri Jisus, kaa' kalo naalap nilo.
40 Saguli' i Jisus ra sandaup ru Sungoi Jordan, nampariwan ri Juanis ra ulun ragili, am ayan Io ra giu' i. 41Masuang ulun minongoi Riso, am konilo, “I Juanis no kalo nambaal ra kaimuagan, kaa' motopot ngaangai' rinagu nali intor ra ulun ti.” 42Masuang ulun boo ra giu' i nangintopot ri Jisus.
Currently Selected:
JUANIS 10: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.