JUDIT 1
1
Nangayou Raja' Nibukadnijar am Raja' Arpaksad
1Paat ra Raja' Nibukadnijar, raja' Asyur namarinta giu' ra bandar maayo Niniwi, Raja' Arpaksad, raja' ru Midia namarinta giu' ra bandar Ikbatana. 2Raja' Arpaksad nambaal ra timbok pinaliput ra bandar Ikbatana. Sawat ru timbok no 35 ngamito am kapal no 25 ngamito, binaal intor ra batu pinahat, pila' no 1.5 ngamito am gawar no 3 ngamito. 3Moonong kulobon garabang no binaalan rondo' manara ra sawat no 50 ngamito, am kapal ru lugu' no 30 ngamito. 4Sawat ru moonong kulobon ru garabang no 35 ngamito am pila' no 20 ngamito, maa' raginio makapansailan ngaangai' saujor nano, nakasimpung ngaangai' pulalai ru saujor mantana'.
5Ralalom ru bilor koopor am ruo ru pamarintaan nano, nangayou Raja' Nibukadnijar ra Raja' Arpaksad giu' ra tana' limayak malangka' ra liliut ru bandar Ragau. 6Raja' Arpaksad no mokoondo' ra masuang rangan, ioginio ngaangai' mamagun ra kabuluran, mamagun ra kiing ru Sungoi Tigris, Sungoi Iprat am Sungoi Gidaspis am mamagun ru tana' marata' ondo' pinarinta ru Raja' Ariok intor ra Ilumais. Masuang poyo bansa' ra bokon nagamung ra saujor ru ulun Giliud no.
7Raja' Nibukadnijar, raja' ru Asyur pana nampasaboi ra bilin ra bansa'-bansa' ra bokon maa' raginio mangindangan riso. Bilin no pinasaboi ra ngaangai' mamagun ru pagun Pirsia, mamagun ru libung kalasaan, libung Kilikia, Damsyik, Libanon am Antilibanon, niayuk ra mamagun ru nagas 8am mamagun ru libung Karmil, Giliad, Galilia Ralayo am tana' limayak maayo Isdrilon. 9-10Bilin no pinasaboi no niayuk ra mamagun ru Samaria am bandar-bandar ra libung no, namagun ra tampilon kalasaan ru Sungoi Jordan suku' ra Jirusalim, Bitani, Gilus am Kadis, Wadi Il-Aris am bandar Tapni, Ramsis am niayuk titikop ru wilayah Gosyin saboi ra bandar Tanis am Mimpis, riwa' no ra ngaangai' mamagun ra Misir nakasuku' ra balitan ru Itiopia. 11Kaa' mamagun ra titikop ru libung no kalo nampalio ra kimait ru Raja' Nibukadnijar. Kalo masaga' ilo maya' ra mampapatoi, sabap kalo malaa' ilo riso. Mangkara' ilo ra Raja' Nibukadnijar no kalo mapanggol. Ulun-ulun sinusub ru raja' no inasaban am sinusub minuli' ra kolondo' banang. 12Raja' Nibukadnijar pana nakaabus sangit. Nagibot io koson mangani' ra titikop ru karajaan nano ra mangala ra ngaangai' ru mamagun Kilikia, Damsyik, Siria, Moab, Amon, Judia am Misir ioginio ngaangai' bansa' ondo' minayan ra lolot ru Raat Tanga' am Teluk Pirsia.
13Paat ra bilor koopor am tulu' ru pamarintaan nano, Raja' Nibukadnijar nanusub ra ngaangai' saujor nano ralalom pangayawan manggal ra Raja' Arpaksad. Ngaangai' saujor ru Raja' Arpaksad kinala no, nakaaya' pulalai nangkuda am pulalai nangkurita' kuda. 14Raja' Nibukadnijar pana nanguasa' ra ngaangai' bandar giu' ra pagun Midia am binulunsar bandar Ikbatana. Manara-manara ru bandar no ginaau, pasar-pasar no tinakawan am bandar ondo' moonsoi linunsai. 15Raja' Arpaksad rinakop giu' ra kabuluran Ragau, am tinura' ra tanggulan. 16Kopongo ragili Raja' Nibukadnijar am ngaangai' saujor nano ondo' masuang kaga' no siminaguli' ra Niniwi. Apat ngansila' buoi nilo minunsag ra rumamai am naansukan ra giu'.
Currently Selected:
JUDIT 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.