IPISUS 1
1
1 Aku gitio i Paulus, sangulun rasul ri Jisus Kristus sumugut ra kasagaan ri Aki Kapuuno'. Surat ti posoboyon ku ra ulun ri Aki Kapuuno' ondo' sumugut ri Jisus Kristus giu' ra Ipisus.
2Gama' ru i Aki Kapuuno', Ama' takau, am niayuk Tuhan Jisus Kristus, manaak ramuyun ra barakat am pabansayan.
Barakat ri Aki Kapuuno' ralalom ri Kristus
3Paringkuanang takano ri Aki Kapuuno', io no Ama' ru Tuhan takau i Jisus Kristus. Sabap ra ralalom pasimpungan takau ri Kristus, nangani' Io no ritakau ra nansalinut barakat ralalom ru Ambiluo Nano ondo' intor ra suruga'. 4Io kalo poyo nabingkal tana' ti, pinili' takano kalalair ri Aki Kapuuno' ralalom ri Jisus Kristus. Maa' raginio mapasau takau ra pagilangan Nano am kolondo' boo makapanguu' ritakau.
5Sabap ra togom Nano, inaru' noyo ri Aki Kapuuno' ra ralalom ri Jisus Kristus itakau saukon ra anak-anak Nano. Gitio noyo sotopot no kasagaan Nali. 6Omporo' takau i Aki Kapuuno' sabap ra kataawan Nano ondo' kolondo' pogondo' am sabap ra taak Nano ritakau ralalom ru Anak ondo' tagamin Nano! 7 Sabap ra pinatayan ri Kristus ti noyo itakau pinalabus, ioginio tula takali naampun. Mumpara' boo gayo ru kataawan ri Aki Kapuuno' no ritakau, 8ondo' kalo maalap takau kauntob ngaangai' kapintaran ru kaintutunan ri Aki Kapuuno' ondo' sinauk no ramon.
9Itakau noyo napaintalangan no ra ondo' kalo igondo' pinabala', ioginio inatang no kalalair i, koson ralalom ri Kristus ginio pinongo. 10Gitio noyo inatang ri Aki Kapuuno' am pongoonon nano paat ra inaru' Nano, koson ralalom ri Kristus ngaangai' simpungon No rondo', ioginio giu' ra suruga' kapoam giti ra tana' ti, am i Kristus noyo masauk ra tingganai no.
11Intor poyo ra talimpuun i pinili' takano ri Aki Kapuuno' masauk ra ulun mangintopot riso ralalom pasimpungan takau ri Kristus. Ngaangai' no baalon sumugut ra inatang am inaru' ri Aki Kapuuno'. 12Polosoo' noyo itakau ondo' intor ragili noyo nakalansan ri Kristus, mongompor ri Aki Kapuuno' ondo' kolondo' pogondo'!
13Akau niayuk nasauk noyo ra ulun ri Aki Kapuuno' paat ra akau nokorongog ra tanou ondo' motopot no, ioginio Tanou Moonsoi ondo' nagibit ra pamayagan. Nangintopot kau Riso am tinatanduan kano ri Aki Kapuuno' ra inanian kau ra Ambiluo Nano ondo' binantu' no. 14Ambiluo raginio noyo mapakalansan ritakau ra makaapu toojo ra ngaangai' ondo' binantu' ri Aki Kapuuno', suku' kalabusan ra ulun ondo' mangintopot riso. Sabap raginio, omporo' noyo i Aki Kapuuno' ondo' kolondo' pogondo'!
Pakiasian ri Paulus
15Sabap raginio, intor aku nakaining ra ati kulaan pangintapatan min ra Tuhan Jisus, am niayuk ra togom min ra ngaangai' ulun ri Aki Kapuuno', 16kalo lalanggain ku paringkuanangan kuno ri Aki Kapuuno' sabap ra akau, am ralalom pakiasian kuno pana karaan takamin. 17Makiasi' aku ri Aki Kapuuno', Ama' ra kolondo' pogondo', ioginio Ama' ru Tuhan takau i Jisus Kristus, maa' raginio mangani' ramuyun ra Ambiluo Nano. Io no mampasauk ramuyun mapintar am niayuk paintalangon No ramuyun osoi Io koson totopot kau makaulig Riso. 18Gitio poyo pakiasian kutu ra maalap min kakito sinda Nano, am makapandai kau ra kalansanan ondo' pinataak Nano ra Io nampiau ramuyun. Am poyo ra makapandai kau ra mumpara' boo barakat ondo' kolondo' pogondo' no, ioginio bantu' Nano ra ulun mangintopot Riso. 19Am niayuk ra makapandai kau ra mumpara' boo gayo ru kuasa' Nano ondo' mangandoi ra guang takau. 20 Am kuasa' Nano ondo' soroi ritakau, nogondo' ra kuasa' ondo' pinaintalang paat ra Io namayag saguli' ri Jisus intor ra kapatayan am nangani' Riso panturungan ra tampilon pamiris Nano giu' ra suruga'. 21Giu' no i Kristus manguasa' ra ngaangai' mamarinta, tingganai, mangunguasa', kaikangan am tuan-tuan. Kuasa' Nati maayo kaga' ka atan ayuk soroi ra raino ti kapoam niayuk ra matong no. 22 Pinatinduku' noyo ri Aki Kapuuno' ngaangai' no ra saang ri Kristus, am pinasauk Io ra tingganai ru pasimpungan ulun Kristian ralalom ngaangai' baal ru kaayagan nilo sigagama'. 23Pasimpungan ulun Kristian ti noyo inan ri Kristus, ioginio kaukapan ri Kristus ondo' galama' mampaukop ra ngaangai' ra ati-ati ayuk.
Currently Selected:
IPISUS 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.