DANIL 1
1
TUNUNG RI DANIL AM RANGAN-RANGAN NANO
(1:1—6:28)
Ungkuyon mangamulok ru Jaudi giu' ra istana ru Raja' Nibukadnijar
1 Paat ra bilor katalu pamarintaan ri Joyakim koson ra raja' ru Jiuda, Raja' Nibukadnijar, raja' ru Babilonia namulunsar ra Jirusalim am nagawang ra bandar no. 2 Nangiou Tuhan ra Raja' Nibukadnijar namparakop ra Raja' Joyakim am nampagaau santayaran intor ra kuliamos mongologo giu' ra Baloi ru Tuhan. Nagibit Raja' Nibukadnijar nababaya' riso kukula' ngaulun rinakop am pinaayan ilo giu' ra kuil ru dewa-dewa nano giu' ra Babil. Nambuli io ra kuliamos mongologo no giu' ra ralalom ru intok-intok pambulian ru kuil.
3Nanusub raja' Nibukadnijar ri Aspinas, tingganai ru pagawai istana nano, koson mampili' ra kukula' ngaulun ungkuyon mamulok intor ra gino ngai' ru ulun ru Israil ondo' ralalom ru pamatiran. Ungkuyon mangamulok no musiti' intor ra papag ru raja' kapoam bangsawan. 4Ilo musiti' maindon, masawat inigilaan, maligag am masuang napandayan am niayuk kalo najamaran, maa' raginio makapangandoi ilo ra istana ru raja'. Sinusub i Aspinas maa' raginio mangila' risilo mambasa' am manulis ra ragu ru Babilonia. 5Nanusub niayuk raja' maa' raginio moonong orou ilo aniin ra akanon am wain nogondo' koson ra ondo' pataakon ra pabukat ru raja'. Kopongo igilaan buoi talu ngambilor, paumaan ilo ra raja'. 6Ilo ondo' pinili' iono i Danil, Gananya, Misail am i Ajaria, ngaangai' no intor ra bansa' ru Jiuda. 7Tingganai pagawai ru istana no nangani' risilo ra inggalan-inggalan bagu iono i Biltsajar, Sadrak, Misak am i Abidnigo.
8Inaru' toojo ri Danil koson kalo jamalin inan nano ra akanon am wain ondo' inaru' ru raja'. Ginio ra nakiindangan io ri Aspinas, 9am i Aki Kapuuno' nangkinibit ri Aspinas makaasi' am motogom ri Danil. 10Kaa' indagu i Aspinas ri Danil, “Malaa' aku ra raja' no. Nangaru' io noyo ra akanon am inumon min. Amon ru okou ilain kalo maligag koson ra ungkuyon mamulok ra bokon no, potoyon aku ru raja' no.”
11I Danil pana mindagu boo ra ulun magalung ondo' sinusub ri Aspinas koson magalung riso am talu ngaulun rangan nano, 12“Pangkinam no ramon buoi mopor ngoorou. Anii' akai sansam am timug ayuk koson akanon am inumon. 13Mopongo mopor ngoorou, pogondoon baal mai ra baal ru ungkuyon mamulok ra bokon, ondo' nangakan ra akanon ondo' inaru' ru raja'. Mopongo raginio pamatas mimpuun ra pangurio muno.”
14Nangiou ulun magalung no am nangiou risilo mangkinam buoi mopor ngoorou. 15Kopongo mopor ngoorou, ilain ilo maligag poyo am maikang poyo intor ra ngaangai' ungkuyon mamulok ondo' nangakan ra akanon ondo' inaru' ru raja'. 16Intor ra orou raginio ulun magalung no nangiou risilo mangakan ayuk ra sansam, am kalo mangakan ra akanon kapoam manginum ra wain ondo' inaru' ru raja'.
17Nangani' i Aki Kapuuno' ra apat ngaulun ungkuyon mamulok no ra napandayan am katandaan ralalom kasusasteraan am falsafah. Rinuangan poyo, nangani' Io ri Danil ra mapandai koson mambala' ra arati' ru pinaintalang am inupi.
18Paat ra pupus ru talu ngambilor buoi igilaan ondo' inaru' ru raja' no, pinauma' ri Aspinas ngaangai' ungkuyon mamulok no ra Raja' Nibukadnijar. 19Nangkuot raja' risilo am nakapandai ra i Danil, Gananya, Misail am i Ajaria makasigulu poyo ra ungkuyon mangamulok ra bokon ralalom ru ngaangai' katutunan. Ginio ra inalap ilo koson mangandoi giu' ra istana ru raja'. 20Moonong raja' mangkuot ra ondo' pataamon no maawar am karaan toojo, makapandai raja' ra pataamon am guangon ru kaapat ngaulun ungkuyon mamulok no inggopor moonsoi poyo intor ra pataamon am guangon ru ngaangai' ulun mangilong am ulun mapandai kaga' ra sihir giu' ra titikop ru pamarintaan nano. 21Narayus i Danil nangandoi giu' ra istana no saboi ra Raja' Koris intor ra Pirsia, tumalimpuun mamarinta.
Currently Selected:
DANIL 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.