Isaya 58
58
Kuliimya kulya: kuliimya kwancobeni mbukubede
1Ongolola canguzu cakutayoowa. Lila ajwi lyako mbuli mweembo. Kolwiida bantu bangu milandu yabo, akuzibya luzubo lwa-Jakobo zibi zyabo. 2Ncobeni balandiyandaula mazuba oonse, balayandisya kuziba inzila zyangu, mbuli musyobo uucita bululami akutaluba imbeta zya-Leza wawo. Balakumbila kwangu imbeta zyabululami, balayandisya kuswena kufwaafwi kuli-Leza. 3#Mal 3:14Bati, Ino nkaambonzi notuliimya kulya pele toboni? Nkaambonzi notulibombya pele tolubikili moyo? Ma! Mubuzuba bwanu bwakuliimya mulalibotezya nubeni akupenzya basimilimo banu boonse. 4Ma! Kuliimya kwanu kulabusya inkondo akukazyanya buyo, mane lumwi mulauma antuku zyanu zyabubi. Kuliimya obo mbumucita sunu takukonzyi kusisya majwi aanu kujulu pe. 5#Zek 7:5Sa kuliimya nkunjanda kuliboobo? Sa mbobuzuba muntu naapenzya moyo wakwe? Sa nceciindi cakukotamya mutwe wakwe mbuli itete akuliyalila zisani zyamasaka atwe? Sa nceeci ncimuyeeya kuti nkokuliimya kulya abuzuba butambulika mumeso aa-Jehova? 6Sa kuliimya nkunjanda mebo takweensi kwaangununa zyaanzyo zyabubi, kusungulula intambo zyajokwe, kulubula bapengede kuti beende, akutyolaula majokwe oonse? 7#Mt 25:34; Int 112:9; Tus 22:9; Muk 11:1,2; Dan 4:27; Lk 11:41; Matl 29:14; Neh 5:5; Mt 15:5Sa takweensi kwaabila basinzala cilyo cako, kunjizya bapengede batandidwe muŋanda yako, kusamika simudukwa nomubona, akutayuba kumeso aabantunyokwe? 8Lino mumuni wako unoemunika mbuli bucedo, nkabela uyoofwambaana kuponezegwa. Bululami bwako buyookusololela, abulemu bwa-Jehova buyookusindikila. 9Uyooita, nkabela Jehova uyoovuwa; wakwiila buyo, uyooamba kuti, Mpendi. Na wagwisya majokwe aali akati kanu, na waleka kutondesya munwe akwaamba bubi, 10#Job 11:17na waabila basinzala zilyo zyako akukutya myoyo yabapengede, lino uyoocedwa mumuni mukati kamudima, aciindi cisia mbi ciyoosanduka kuba mbuli isikati. 11Lino Jehova uyookweenzya lyoonse, akukatalusya moyo wako mumasena mayumu. Uyooabila zifuwa zyako inguzu, nkabela uyooba mbuli muunda uutuntulilwa, ambuli butoolo bwamaanzi buli amaanzi aatayuminini. 12Lino bana bako bayooyakulula matongo aaciindi; uyoobukulusya intalisyo zyamazyalani aakamana; nkabela uyootegwa kuti sikumama myaatuko, sikubukulusya meendelo aamakalilo. 13#Lev 19:30; Is 56:2; Mt 12:36Na wakasya maulu aako kusofwaazya Sabata, na waleka kucita ncoyanda omwini buyo mubuzuba bwangu busalala, na buzuba bwa-Sabata mbuyandisi mumeso aako, alimwi buzuba busalala bwa-Jehova mbulemu, na wabulemeka kukutatola inzila zyako omwini nikuba kulibotezya buyo nikuba kwaamba majwi aabuyo, 14#Job 22:26; Dt 32:13; Is 1:20; Mik 4:4; Mt 24:3-5lino unoolijanina busekelezi muli-Jehova, nkabela njookutansika amasena aasumpwidwe aanyika akukulisya caabilo causo Jakobo, nkaambo mbuboobo mbuuamba mulomo wa-Jehova.
Currently Selected:
Isaya 58: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.