1 Ba-Korinto 1
1
1Ndime Paulo, nendakaitwa kubukanze bwa-Leza kuba apostolo wa-Jesu Kristo, tuli a-Sositene mukwesu. 2#Inc 18:1; 1 Kor 6:11; Inc 9:14Ndamujuzya nywebo nombungano ya-Leza iili mu-Korinto nomusalazidwe muli-Kristo Jesu nobasalali baite, antoomwe abaabo boonse bali mumasena oonse balemeka izina lya-Mwami wesu Jesu Kristo, nguwenya Mwami waboonse buyo balo aswebo. 3#Rom 1:7Akube anywe luzyalo aluumuno kuzwa kwa-Leza Taateesu aku-Mwami Jesu Kristo.
4Lyoonse ndalumba Leza wangu aandinywe, nkaambo kaluzyalo lwaLeza ndumwapegwa muli-Kristo Jesu, 5Ikuti mulinguwe mwavubizigwa kumakani oonse, naaba makani aabwaambe naaba makani aaluzibo. 6Mbubonya obo mbulwasimpizigwa lusillizyo lwamakani aa-Kristo aakakambaukwa akati kanu. 7#Lk 17:30; 2 Tes 1:7; Tit 2:13Nkaambo kaako taakwe caabilo ncimukonzya kubula ciindi ncimucilindila kuyubununwa kwa-Mwamr wesu Jesu Kristo. 8#Flp 1:6; 1 Tes 3:13; 5:23Nguwenya uuyoomusimpizya mane kusikila kumamanino, kuti mutabikilwi kaambo mubuzuba bwa-Mwami wesu Jesu Kristo. 9#1 Tes 5:24; 1 Joh 1:3Wasyomeka Leza, oyo iwakamwiitila muciinga ca-Mwanaakwe Jesu Kristo Mwami wesu.
Mipampo mipampo yamumbungano yaku-Korinto
10 #
Flp 2:2; 3:16 Lino ndamukumbila, nubakwesu, muzina lya-Mwami Jesu Kristo, kuti mwaambe cintu comwe, kutabi mipampo mipampo akati kanu. Amube alukamantano lwamoyo omwe alwamiyeeyo yomwe. 11Nkaambo kwandisikila impuwo yandinywe, nubakwesu, iizwa kubantu ba-Kloe, yakuti kuli inkazyanyo akati kanu. 12#Inc 18:24,27; 1 Kor 3:4; Joh 1:42Nkukwaamba kuti, umwi ulaamba kuti, Ime ndi wa-Paulo, aumwi uti, Ime ndi wa-Apolo, aumwi uti, Ime ndi wa-Kefa, aumwi uti, Ime ndi wa-Kristo, 13Ma! Sa Kristo ulyaabawidwe? Sa Paulo nguwakamubambulwa aciingano? Sa kuzina lya-Paulo nkumwakabapatizizigwa? 14#Inc 18:8; 19:29; Rom 16:23Ndalumba Leza kuti taakwe naba omwe akati kanu ngundakabapatizya pele Kristo a-Gayo. 15Lino taakwe muntu uukonzya kwaamba kuti kuzina lyangu ndemwini nkundakabapatizizya, 16#1 Kor 16:15Alimwi, ndakabapatizyabana ba-Stefana, pele nsikonzyi kwiibaluka umbi ngundakabapatizya, 17#Joh 4:2; Mt 28:19Nkaambo teensi kubapatizya nkwaakanditumina Kristo pe, pele kukambauka Makani Mabotu, Alimwi teensi majwi aabusongo-songo nginjeelede kukambauka, pe, kuti ciingano ca-Kristo citasampuki.
Lukambauko lwaciingano
18 #
2 Kor 4:3; Rom 1:16 Nkaambo kulibaabo bali mukunyonyooka makani aaciingano mbufubafuba buyo, anukuti kulindiswe nituli mukufutuka ninguzu zya-Leza. 19#Is 29:14Nkaambo kulilembedwe kuti,
Nzoonyonyoona busongo bwabasongo,
Aalo maanu aabasimaanu nzooalobya.
20 #
Job 12:17; Is 19:12; 33:18; 44:25 Ino uli kuli musongo? Uli kuli mulembi? Uli kuli sikubuzyanya waciindi ecino? Sa Leza takabufubaazizye busongo bwaciindi ecino? 21#Mt 11:25; Lk 8:12Nkaambo mbuli busongo bwa-Leza mbubwakacitya kuti bantu batakakonzyi kuziba Leza kubusongo bwabo beni, elyo Leza wakakosola kufutuzya basilusyomo bufubafuba bwalukambauko. 22#Mt 12:38; Joh 4:48; Inc 17:18,32Nkaambo ba-Juda balayandaula citondezyo, abalo ba-Helene balalangaula busongo, 23#1 Kor 2:14; Rom 9:32pele iswe tulakambauka Kristo iwakabambulwa aciingano. Kuliba-Juda ncilebyo, kuliba-Helene mbufubafuba buyo, 24#Kol 2:3anukuti kulibaabo baitidwe, nibaba ba-Juda nibaba ba-Helene, ninguzu zya-Leza, alimwi mbusongo bwa-Leza. 25#2 Kor 13:4Ikuti nibuba bufubafuba bwa-Leza bulainda bantu kubusongo, abwalo bukompami bwa-Leza bulainda bantu kunguzu.
Mumbungano yaku-Korinto kamutakwe bantu banji bapati
26 #
Mt 11:25; Joh 7:48; Jak 2:1-5 Amubone, bakwesu, mbwiibede inkamu yabaite iili kulindinywe nubeni. Akati kanu taakwe bantu banji beelezegwa kuti mbasongo kumeso aabantu, alimwi tabali banji basibwami, alimwi tabali banji bana babaami. 27Pe, Leza ulisalide zintu zifubafuba zyanyika kuti ausye insoni basongo, azyalo zintu zikompeme zyanyika Leza ulizisalide kuti ausye insoni basinguzu. 28Alimwi zintu zyuubausidwe zyanyika azintu zisampaulidwe Leza ulizisalide, azyalo zintu zitawo, kuti alobye zintu ziliwo, 29#Rom 3:27; Ef 2:9kuti kutabi muntu naba omwe uukonzya kulisumpula kumeso aa-Leza. 30#Jer 23:5,6; 2 Kor 5:21; Joh 17:19Nkaambo kanguwe nkimwaba muli-Kristo Jesu. Nguwenya wakatubeda busongo buzwa kwa-Leza, alimwi bululami abusalazigwi abununu, 31#Jer 9:23,24kuti kukabe mbuli mbukulembedwe, kuti, Oyo uulikankaizya alikankaizizye Jehova.
Currently Selected:
1 Ba-Korinto 1: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.