MATHI 9
9
Jisuei Tuokshatei Shatbü Müt che Maitibü
(Mk 2.1-12; Lk 5.17-26)
1Hobaje hao long to atkei hoba dei khatjung hauan jembü sang to loukei. 2Haoenei tuokshatei shatbü müt che, yepshanga lengan hao jungto sungbakei; hoba ladang Jisuei haoeneibü mailem hapbei haoei tuokshatei shatbou to laukei, “Nashoubou, maang kangashi! Kaibü shabü apbua.” 3Hobaje Ngühkhüm lenbou shuong atei maangphanga laukei, “Ho mütei Mühghaü nyikuda.” 4Jisuei haoenei dambü ngekei hoba laukei, “Ainyula kanei kaneibü maangpona amaibü dameida? 5Aishanga, ‘Ka shabü apbua’, dogo laula sobou si; ayingsi, ‘Laksepashi, hoba paiashi,’ dogo laula sobou? 6Lausikei kaodaka Müteibü Shou la shabü apbula sei kia dogo ngei kan la lenlabü.” Kheijinei haoei tuokshatei shatbou to laukei, “Laksepashi, ka yepshang peashi, hoba chem to ngaiashi.” 7Hobaje hao pienkei, hoba haoen chem to haukei. 8Ladang noknyühei kho hapbei haoen hatkei, hoba müt la seisihau khütetche kubou Mühghaü la nyensang kukei.
Jisuei Mathi Ngabü
(Mk 2.13-17; Lk 5.27-32)
9Hobaje Jisuei khüka satjinei Mathi nyenbü müt che khüm heshanga setan hapbei, hoba haoei hao to laukei, “Kü phai semashi.” Hobaje Mathi meimeikei hoba hao phai sembei.
10Hobaje Jisu chema shaushang yungshanga setjinei khüm hebü hoba shabü shuong juong loukei hoba hao hoba eikshuong yoa setkei. 11Ladang Farisibüei kho hapbei, haoenei hao eikshuong to laukei, “Aila kaneibü lenbouei khüm hebü hoba shabü shuong yoa shauda yungda?” 12Lausikei haoei kho ditkei hoba laukei, “Ashat anyatbü shuong shanga daktar akhamda, lausikei shatbü shuong shanga kümsilei. 13Lausikei hauashi hoba, ‘Ngei lembü ji, lausikei onou mangsühda’ dogo laubü kho ngühtet ai yingkeije ditletashi. Aishanga ngo saopobü shuong aying, lausikei shabü shuong ngala loukei.”
Nyengbü shangabü Pheyobü
(Mk 2.18-22; Lk 5.33-39)
14Kheijinei Johaneibü eikshuong hao jungto louan laukei, “Aila kün hoba Farisibü shuongei hanghangko nyengda, lausikei ka eikshuongei anyengda?” 15Jisuei haoen to laukei, “Chemkanbou haoen yoa ki shongko, chemkanshanga kibü thangbou shuongei manghaapla thükkei sai? Lausikei chemkanbou haoen ka ngailanglabü chalou che sühlabü; kheijinei haoenei nyenglabü. 16Aishanga neisimei hangbüa aoeikei nei haanbü athipda, aieilausi thipbü nei khoei neinyu ka jitlangda hoba khün amaibou yetda. 17Hobaje mütshuongei ih haanbü phekhon shongmok hangbüa atakda; khei kümsije phekhon shongmok kho thada, hoba ih kho apda hoba phekhon shongmok kho leiluda; lausikei haoenei ih haanbü phekhon shongmok haanbüa takda, hoba ham püetda.”
Yaangboueibü Nouyangshou hoba Jisueibü Nei to Meitinyu Yaksa
(Mk 5.21-43; Lk 8.40-56)
18Haoei khübü kho haoen to lautoua sinagog kabü pangsa che loukei hoba hao thedanga khüpetko laukei, “Kü shou nouyangshou toutham hakshema; lausikei kaiya hoba sao to ka ikei jungashi, hoba sao singngailabü.” 19Hobaje Jisu hao eikshuong yoa meimeikei hoba hao phai sembei.
20Hobaje chühashi, yaksa che, ao po anthüknyi sii koubü kiteikei, hao phaito loukei hoba haoeibü neiyik to meitikei; 21aishanga saoei jembü lolo maangpona laukei, “Ngei haoeibü neia ongkei meitialonga ngo maian aplabü.” 22Jisuei sepeikei hoba sao hapbei; hoba haoei laukei, “Nashounyu, maang kangashi! Ka mailemei no maitia.” Hobaje yaksa kho kho jihatham maian apbei.
23Hobaje ladang Jisu pangsa chem khüto atkei, hoba pithung metbü hoba noknyüh panglangyoko hapbei, 24haoei laukei, “Satkhümashi! Yaksa kho ühaikei; lausikei sao yepbei!” Hobaje haoenei hao to nyikukei; 25lausikei ladang noknyüh kho lintikei, hao atkei hoba saoeibü ika jungkei, hoba medeinyu kho laksepbei. 26Hobaje kho ngühlang kaonyek pendoua phinthonkei.
Jisuei Nyekthubü Müt Nyi Maitibü
27Hobaje Jisu khüka satjinei nyekthubü müt nyi hao phai sembei, hoba ngekko laukei, “Dawid Shou, küsi to onoukai.” 28Hobaje ladang hao chem to atkei, nyekthubü nyi hao jungto loukei. Hobaje Jisuei haosi to laukei, “Ngei ho kümenlabü dogo kasiei mailemda si?” Hobaje haosiei hao to laukei, “Haü, Bunyubou.” 29Kheijinei haoei haosieibü nyek to meitiko laukei, “Kasieibü mailem thüng kasi to yingkushi.” 30Hobaje haosieibü nyek khitkei. Hobaje Jisuei kaangkhühtham haosi to sakkuko laukei, “Aolakei tengeti.” 31Lausikei haosi satkei hoba kaonyek jembo kho ngühlang phinthonkei.
Jisuei Ngoubü Maitibü
32Hobaje haoen ngaijinei, chühashi shabü souei lapbü ngoubü müt che hao jungto leibakei. 33Hobaje ladang shabü sou kho shian sattikei, ngoubü müt khoei ngüh joyokei. Hobaje noknyüh maangpangkei hoba laukei, “Israela ho tegü ladangkei hapan achühkei.” 34Lausikei Farisibüei laukei, “Haoei shabü sou shian sattila shabü soushou shuongeibü Choba jungeida.”
35Hobaje Jisuei sangshou hoba sangyaang pendoua sinagoga lenko, hoba Khuthük Sangle Ngühlangmaibü songlenko, hoba shat phang phangei shatbü hoba shatsinyat phang phanga maitiko paikei.
36Ladang haoei noknyüh hapbei, haoei haoen shanga aeibou sanouko dambukei, aieilausi haoen lombou akibü sanshuong tegü haoen khonkuko hoba aan kiteikei. 37Kheijinei haoei hao eikshuong to laukei, “Youlatlabü shangakei, lausikei eik shijo ong. 38Hibü kanei youlatbü Bunyubou to, haoei jembü youlatbü to eik koutila welauashi.”
Currently Selected:
MATHI 9: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.